Read tiv Levitiku 7 Bible Online

Levitiku 7 - tiv bible

Levitiku 7

¹Tindi u nagh ku iboogh yô, ka un ne: Ka icighankwagh u hemban cii je.

²Ka hen ijiir i ve senge nagh ku nanden la, ve̱ sôngon nagh ku iboogh kpaa ye; awambe a ku yô, á mishi a sha ambusuatsegh á tser.

³Á na nagh sha ahôm a ku cii: tsa u ahômough man ahôm a a cir ikav mbi kimi,

⁴man ahi ahar man ahôm a a lu sha a, vegher u shin iwenge la, man ishwalegh ki mtema, a̱ dugh ki a ahi imôngo.

⁵Pristi a̱ nande sha atse, i̱ lu nagh ku usugh ku nan TER; ka nagh ku iboogh je.

⁶Hanma nomsoor ken upristi yô, nana ya ku; i̱ yaan ku ken icighanjiir; ka icighankwagh u hemban cii je.

⁷Er nagh ku isholibo ku lu nahan, kape nagh ku iboogh kpaa ku lu je la, tindi ve ngu môm tsô; pristi u a ne iwom sha ku la ka un, una zua a ku ye;

⁸pristi u a ne nagh ku nanden ku hanma or yô, pristi la una zua a ikôvough ki nagh ku a ne la.

⁹Hanma nagh ku sha samuyia, ku i kaa ku sha atse man ku i kaa sha icenge kua shin icenge i tumuu kpaa, pristi u a ne nagh sha ku la, ka un una zua a ku ye.

¹⁰Man shi hanma nagh ku sha samuyia ku i nongo mkurem sha mi, shin ku ombor kpaa, ônov mba Aron cii vea gbaa ngohol tsô, á sange a sange ve ga.

¹¹Tindi u nagh ku sôngon ku bem, ku or á na TER yô, ka un ne:

¹²Aluer nana va a mi á lu nagh ku iwuese yô, nana̱ va a nagh ku iwuese la, a umasa mba i we kwa sha mi ga, mba i nongo mkurem sha mi yô, man umasa mba par par mba i we kwa sha mi ga, mba i shigh ve mkurem yô, man mba i her ve sha mwem ma kengese ma i we mkurem sha mi yô.

¹³Nana̱ na nagh ku nan a umasa mba i we kwa sha mi yô, a nagh ku nan ku bem ku iwuese imôngo.

¹⁴Nana̱ dugh masa môm ken hanma nagh, a̱ hingir nagh ku nan TER; a̱ hingir kwagh u pristi u a mishin awambe a nagh ku bem la.

¹⁵Inyam i nagh ku bem ku iwuese la yô, i̱ ya i sha iyange i nan ne nagh ku nan la je; nana̱ de deen ma kwagh, a̱ lu her zan zan sev mbu̱ aven ga.

¹⁶Kpa aluer nagh ku nan á lu iceghzwa shin nagh ku sha ishima i nan je yô, i̱ ya ku sha iyange i nan ne nagh ku nan la, kper nan kpaa i̱ ya kwagh u a tse her la;

¹⁷kpa inyam i nagh kura ia lu her zan zan ayange atar yô, i̱ nande i sha usu.

¹⁸Aluer á ya ma inyam i nagh ku sôngon ku nagh ku bem sha iyange i atar la yô, á kera lu kwagh u rumun un ga, man u nana va na nagh sha i kpaa, á kera lu nan a inja sha ma kwagh ga, á hingir kwagh u ndôhôrshima, man or u nana ya i kpaa nana lu a ibo iyol.

¹⁹Inyam i i bende a hanma kwagh u a lu wang ga yô, i̱ de ye i ga, i̱ nande sha usu. Inyam yô, hanma or u nan lu wang nana ya i,

²⁰kpa or u nan ye inyam i nagh ku sôngon ku nagh ku bem ku ku lu ku TER yô, er nan lu wang ga la yô, i̱ dugh or la ken nongo u nan kera.

²¹Man shi aluer anti or nana bende a hanma kwagh u a lu wang ga, shin kwagh u a lu wang ga u or, shin swase u u lu wang ga, shin hanma kwagh u a lu wang ga a ndôhôr ishima kpaa yô, man nana gema á ya inyam i nagh ku sôngon ku nagh ku bem ku ku lu ku TER la yô, i̱ dugh or la ken nongo u nan kera.

²²TER shi ôr kwagh a Mose, kaa er:

²³Ôr kwagh a Mbaiserael kaa a ve wer: Ahôm a bua man a iyôngo man a ivo yô, de ye nen a mayange ga.

²⁴Ahôm a kwagh u a gbe kpen tsô, man ahôm a kwagh u inyam i kume i woo un yô, i̱ gba eren hanma injatom a mi tsô, kpa mye yô, i̱ de ye a je ga.

²⁵Gadia hanma or u nana ya ahôm a ilev mbi ka i na TER nagh ku usugh a i yô, or u nan ye la, i̱ dugh nan ken nongo u nan kera.

²⁶Man shi de ye nen ma awambe ken uya enev ga, shin a lu a inyon shin a lu a uile kpaa ga.

²⁷Hanma or u nana ya ma awambe yô, i̱ dugh or la ken nongo u nan kera.

²⁸TER shi ôr kwagh a Mose, kaa er:

²⁹Ôr kwagh a Mbaiserael kaa a ve wer: Or u nan ne TER nagh ku sôngon ku bem yô, nana̱ va na nagh sha kwagh u nan dugh ken nagh ku sôngon ku nagh ku nan ku bem la;

³⁰ka ave a nan iyol i nan je a̱ va a iniav mbi TER mbi usuv ye, nana̱ va a ahôm man gugu; gugu yô, ka sha u cian a cia a mi, a̱ hingir nagh ku cian sha ishigh ki TER.

³¹Pristi a̱ nande ahôm la sha atse; kpa gugu la yô, a̱ lu u Aron a ônov nav.

³²Namegh ku yanegh yô, gema na nen pristi, ku̱ lu nagh ku kenden sha ken iniav mbi sôngon mbi iniav yenev mbi bem.

³³Wan u Aron u nan ne nagh sha awambe a iniav mbi bem kua sha ahôm la, ka nan, namegh ku yanegh kua lu kwar u nan ye.

³⁴Gadia gugu u cian a mi la, kua namegh ku kenden sha la, M ngohol hen Mbaiserael ken iniav mbi sôngon mbi iniav vev mbi bem, M gema M na pristi Aron a ônov nav, ka kwar ve u gbem, u Mbaiserael vea naan ve yô.

³⁵Ungun ka kwar u Aron kua kwar u ônov nav ken iniav mbi TER mbi usuv je ne, sha iyange i A va a ve sha u ve̱ er tom u pristi sha ishigh ki TER la,

³⁶ka kwar u TER kaa er Mbaiserael ve̱ naan ve ne, sha iyange i A shighe ve mkurem la. Ka tindi u eren sha mi gbem je, sha ikov ikov.

³⁷Ka tindi u nagh ku nanden man nagh ku sha samuyia man nagh ku isholibo man nagh ku iboogh man nagh ku tseghan or a mi kua nagh ku sôngon ku bem je ne;

³⁸ka tindi u TER lu na Mose sha uwo u Senai, sha iyange i A kaa a Mbaiserael er, ve̱ va a iniav vev hen TER, ken desereti u Senai je la.