Read tiv Levitiku 8 Bible Online

Levitiku 8 - tiv bible

Levitiku 8

¹TER shi ôr kwagh a Mose kaa er:

²Va a Aron kua ônov nav a na imôngo, man akondo la man mkurem ma shighen man nombua u nagh ku isholibo man anomaiyôngo ahar kua ikese i umasa mba i we kwa sha mi ga yô;

³yô, kohol ior cii hen hunda u tenti u kohol ker la.

⁴Tsô Mose er er TER kaa un nahan, i kohol ior hen hunda u tenti u kohol ker la.

⁵Mose kaa mkohol u ior er: Ka kwagh u TER A kaa er i̱ er ne:

⁶Nahan Mose va a Aron man ônov nav, a ôô ve iyol sha mnger.

⁷A haa un riga, a zer un kwange, a haa un togo, shi a haa un efodi man a zer un kor u efodi, a tsule un efodi sha u.

⁸A har un ikpa i sha vanger; ken ikpa i sha vanger la, a wa Urim man Tumim ker.

⁹A kange un atsar sha ityou, a zer kpande u zenaria u icighanikav la sha atsar la, vegher u ken ishi, er TER kaa Mose nahan.

¹⁰Tsô Mose tôô mkurem ma shighen, a shighe tabernakel kua akaa a a lu kimi cii, a tsegha un.

¹¹Shi a mishi ma sha atse kwa taankaruhar, a shighe atse la kua ikav mbi a cii kua tasa u ôôn iyol a ityô na kpaa, sha u tseghan ve.

¹²A haa Aron mkurem ma shighen sha ityou, a shighe un, sha u tseghan un.

¹³Shi Mose va a ônov mba Aron kpaa, a haa ve akondo, a zer ve ikange, a cir ve ader er TER kaa Mose nahan.

¹⁴Tsô a va a nombua u nagh ku isholibo la; Aron kua ônov nav ve va penda ave sha ityough ki nombua u nagh ku isholibo la.

¹⁵Nahan a sôngo un; Mose er awambe sha ihôwe feregh sha akoratseegh ningir tser, a wanger atse la, a gema awambe, a haa hen ityôatsegh, a tsegha a, a na iwom sha ci u a.

¹⁶A tôô ahôm a sha ikav mbi kimi la cii; man ishwalegh ki mtema, man ahi ahar kua ahôm a a lu sha mi la, Mose gema nande sha atse a nanden nagh sha mi.

¹⁷Kpa nombua a ikôvough nagh man inyam na kua icômbov yô, a nande sha usu ken akôngoafogh, er TER kaa Mose nahan.

¹⁸Shi a va a nomiyôngo u nagh ku nanden la, Aron kua ônov nav ve penda ave sha ityough ki nomiyôngo la,

¹⁹a sôngo un, Mose haa awambe la sha ambusuatsegh ningir tser.

²⁰Tsô a bur iyôngo la aci, Mose nande ityough man aci a inyam la kua ahôm.

²¹A ôô ikav mbi kimi kua angahar sha mnger; tsô Mose nande nomiyôngo la jimin sha atse a nanden nagh sha mi; lu nagh ku nanden ku human doon; ka nagh ku usugh ku nan TER, er TER kaa Mose nahan.

²²Shi a va a nomiyôngo ugen la kpaa, ka nomiyôngo u tseghan or a min la, Aron kua ônov nav ve penda ave sha ityough ki nomiyôngo la,

²³a sôngo un, Mose er awambe la, feregh Aron sha kpe u togh ku yanegh man sha ihônguhar na u tamen u ken yan.

²⁴Tsô a va a ônov mba Aron, Mose feregh ve awambe sha akpeatogh a ve a yan, man sha ahôaveegh a ve a tamen a ken yan man sha ahôangahar a ve a tamen a ken yan; Mose shi haa awambe la sha atse ningir tser.

²⁵A tôô ahôm la kua tsa u ahômough man ahôm a sha ikav mbi kimi cii, man ishwalegh ki mtema, man ahi ahar kua ahôm a sha mi la, man namegh ku yanegh,

²⁶man shin ikese i masa u i we kwa sha mi ga yô, i i lu sha ishigh ki TER la, a dugh masa môm u i we kwa sha mi ga, man masa môm u bredi u sha mkure kua masa môm u par par, a penda ve sha ahôm la kua sha namegh ku yanegh kura;

²⁷a gema akaa la cii, a penda Aron sha ave kua sha ave a ônov nav kpaa, a cia a, hingir nagh ku cian sha ishigh ki TER.

²⁸Tsô Mose tôô a sha ave ve kera, a gema a nande a sha atse sha nagh ku nanden, hingir nagh ku tseghan or a mi, ku human doon; ka nagh ku usugh ku nan TER.

²⁹Tsô Mose tôô gugu la cia, hingir nagh ku cian sha ishigh ki TER; ka kwar u Mose sha iyôngo i tseghan or a mi je la, er TER kaa Mose nahan.

³⁰Shi Mose tôô mkurem ma shighen kua awambe a sha atse la, mishi Aron iyol kua sha akondo a na, man shi ônov nav kua sha akondo a ônov nav kpaa; a tsegha Aron kua akondo a na man ônov nav kua akondo a ve kpaa.

³¹Tsô Mose kaa a Aron man ônov nav er: Jiir nen inyam la hen hunda u tenti u kohol ker la, ya nen i heregh sha bredi u a lu shin ikese i iniav mbi tseghan la, er m vande kaan nahan mer: Aron a ônov nav ve̱ yaan la.

³²Inyam i i shi her kua bredi u a shi la yô, nande nen sha usu.

³³Ayange ataankarahar cii, de dugh nen hen hunda u tenti u kohol ker la ga, saa ayange a mtsegh wen la á bee kera; gadia á tsegha ne ayange ataankarahar je.

³⁴Er i er nyian nahan, kape TER A kaa er á eren á naan iwom sha ci wen ne.

³⁵Ayange a ataankarahar la cii luun nen hen hunda u tenti u kohol ker la, tugh man tetan; waan nen iko sha imo i TER sha er né kpe ga yô, gadia kape i kaam je la.

³⁶Tsô Aron kua ônov nav ve er akaa a TER kaa Mose la cii.