Read tiv Levitiku 9 Bible Online

Levitiku 9 - tiv bible

Levitiku 9

¹Tsô sha iyange i anigheni la Mose yila Aron a ônov nav man mbatamen mba Iserael,

²a kaa a Aron er: Kôr gumbua sha ci u nagh ku isholibo man nomiyôngo sha ci u nagh ku nanden, ve̱ de luun a ihogholough iyol ga, va a mi sha ishigh ki TER.

³Yô, ôr kwagh a Mbaiserael kaa a ve wer: Kôr nen kpev sha ci u nagh ku isholibo man gumbua man gumiyôngo, mba ve kom inyom i môm, mba ve lu a ihogholough iyol ga yô, sha ci u nagh ku nanden;

⁴man shi nombua kua nomiyôngo sha ci u nagh ku bem ku sôngon sha ishigh ki TER man nagh ku sha samuyia ku i we ku mkurem yô; gadia nyian TER ngu anden her a ven.

⁵Tsô ve va a kwagh u Mose kaa la sha ishigh ki tenti u kohol ker la; mkohol u ior cii kporom va tile sha ishigh ki TER.

⁶Tsô Mose kaa er: Ka kwagh u TER A kaa er ne̱ er man iengem i TER ia ande her a ven je ne.

⁷Mose shi kaa a Aron er: Kporom hen atse a nan nagh sha mi, na nagh ough ku isholibo man nagh ough ku nanden, na iwom sha ci wou iyol you kua sha ci u ior kpaa, na nagh ku ior, na iwom sha ci ve, er TER A kaa ne nahan

⁸Tsô Aron kporom hen atse a nanden nagh sha mi, a sôngo gumbua u nagh ku isholibo u a lu sha ci na iyol na la.

⁹Ônov mba Aron va na un awambe, a civ ihôwe na shin awambe la, a feregh a sha akoratseegh, a gema awambe la a haa hen ityôatsegh;

¹⁰kpa ahôm a nagh ku isholibo man ahi a ku, kua ishwalegh ki mtema la, a gema a nande sha atse, er TER kaa Mose nahan.

¹¹Ikôvough man inyam yô, a nande ken akôngoafogh sha usu.

¹²Shi a sôngo nagh ku nanden; ônov mba Aron va na un awambe, a haa a sha ambusuatsegh a ningir a tser.

¹³Shi ve va na un nagh ku nanden aci aci kua ityough kpaa, a gema a nande sha atse a nan nagh sha mi.

¹⁴A ôô ikav mbi kimi kua angahar, a nande sha atse sha nagh ku nanden la.

¹⁵Shi a va a nagh ku sha ci u ior la; a kôr ivo i nagh ku isholibo i i lu sha ci u ior la, a sôngon i, a na nagh ku isholibo a mi er i vande eren a ku hiihii la nahan.

¹⁶Shi a na nagh ku nanden, a er a mi sha tindi.

¹⁷A na nagh ku sha samuyia kpaa, a ongo ikevwe poo, a nande sha atse a nanden nagh sha mi la, a nagh ku nanden ku pepe la imôngo cii.

¹⁸A sôngo nombua kua nomiyôngo la, ka nagh ku sôngon ku bem ku ku lu sha ci u ior je la; ônov mba Aron ve na un awambe la — a haa a sha ambusuatsegh a ningir a tser—

¹⁹man ahôm a nombua man a nomiyôngo la, man tsa u ahômough man ahôm a a cir ikav mbi kimi man ahi kua ishwalegh ki mtema;

²⁰ve penda ahôm sha ugugu, a gema a nande ahôm la sha atse a nanden nagh sha mi;

²¹kpa ugugu kua namegh ku yanegh yô, Aron cia ve, hingir nagh ku cian sha ishigh ki TER, er Mose kaa nahan.

²²Tsô Aron kende ave sha, samber sha ior, ver ve doo doo. Been u nan nagh ku isholibo man nagh ku nanden kua nagh ku bem yô, a hungwa.

²³Nahan Mose vea Aron ve nyôr ken tenti u kohol ker la, shi ve hide ve due, ve ver ior doo doo; tsô iengem i TER maa ande hen ior cii.

²⁴Usu due sha ishigh ki TER, hia nagh ku nanden sha atse kua ahôm la cii; ior cii mba nengen nahan yô, ve gba gbiren awer, ve kuma ityough inya.