Read tiv Yeremia 11 Bible Online

Yeremia 11 - tiv bible

Yeremia 11

¹Kwaghôron ne due hen TER va hen Yeremia er:

²Ungwa nen akaaôron a ikuryan ne, man ôr kwagh a ior mba Yuda, kua mba ve tem ken Yerusalem kpaa,

³kaa a ve wer: TER, Aôndo u Iserael, ngu kaan nahan er: Or u nan ver ato sha akaaôron a ikuryan ne ga yô, nan ngu a ifan iyol. Ka akaaôron

⁴a M ôr uter enev sha iyange i M due a ve ken tar u Igipiti, shin adum u soughon iyôgh la, M kaa Mer: Ungwa nen imo Yam, er nen er M we ne kwagh nahan cii; ka nahan man né hingir ior Av ye, Mo kpaa Me lu Aôndo wen;

⁵sha u Me kure mbum u M bum a uter enev, Mer, Me na ve tar u atumbabua kua iyough ve dumbur ker la, er i lu nyian nahan ne. Tsô m rumun, mer: Amen, TERE.

⁶TER shi kaa a mo er: Yôô akaaôron ne ken agar a Yuda cii, man sha igbenda i Yerusalem, kaa wer: Ungwa nen akaaôron a ikuryan ne, er nen sha a kpaa.

⁷Gadia M wa uter enev kwagh gbang gbang je sha iyange i M due a ve ken tar u Igipiti la, zan zan nyian, pepe kua aikighe, M kaa Mer: Ungwa nen imo Yam.

⁸Nahan kpaa ve ungwa ga, ve ver ato ga, hanmô ve nan gba zenden sha mcighir u ishima i nan i bo la; nahan M kure akaaôron a ikuryan ne cii, a M kaa a ve Mer, ve̱ er a, kpa ve er a ga la.

⁹TER shi kaa a mo er: I tser a mzoughzwa u bo hen ior mba Yuda, kua mba ve tem ken Yerusalem kpaa.

¹⁰Ve gema ve hide sha u eren aferakaa a uter vev, mba ve venda u ungwan akaaôron Am la; ve gba dondon mbaaôndo mbagenev, civir ve; ya u Iserael kua ya u Yuda ve vihi ikuryan Yam i M ya a uter vev la.

¹¹Nahan yô, TER ngu kaan nahan er: Nenge, Me va a kwaghbo sha a ve, u vea fatyô u waren un ga yô; tsô vea vaa a Mo, kpa Me ver ato hen a ve ga.

¹²Nahan agar a Yuda man mba ve tem ken Yerusalem ve̱ za vaa a mbaaôndo mba ve ne ve nagh ku human doon la; kpa vea yima ve sha ayange a kwagh á tser ve la je ga.

¹³Gadia er iyenge i agar a ou i lu nahan, kape mbaaôndo ou kpaa ve ngee la, we Yuda! man er iyenge i igbenda i Yerusalem i ngee nahan kape ne te atse sha ci u kwaghkunya, ka atse a nanden Baal nagh a mi je la.

¹⁴We yô, de eren msen sha ci u ior mban ga, man de genger mliam shin msen sha ci ve ga; gadia Me kera ungwa ve sha shighe u ve vaa mliam a Mo sha ci u kwagh u a tser ve la ga.

¹⁵U a doom ishima la, ka nyi i gbe un, ken iyou Yama? Gadia ka imanger a lu manger ye. Uiceghzwa man icighaninyam vea fatyô u karen a kwagh u una va tser u la kera kpa? Nahan shighe la ú ember kpa?

¹⁶TER ii u iti er: Kon u olev u hômon pivir pivir, man u doon atam; ka sha ihuran i zegeayôôso A nande u sha usu, man agbaa a u kpaa kever kera.

¹⁷Gadia TER u akum a Sha u A môôr we, A ter er Una haa u kwaghbo iyol sha ci u iferkwagh i ya u Iserael man i ya u Yuda kpaa, i ve er sha u bamen Mo, sha u nanden Baal nagh la.

¹⁸TER kpaa pasem kwagh ne, sha u m̱ fa un; tsô U tesem aeren a ve.

¹⁹Kpa mo m lu er waniyôngo u sulan or yô, u i ze a mi hen ijiir i sôngon un yô; m kera fa er ve we kwaghbo ishima a mo nahan ga, er: Sé tim nen kon kua atam a u, man shi sé paa un sha tar u mbaumav kera, i̱ de kera umbur iti na ga.

²⁰Kpa, We TER u akum a Sha, u U er ijir sha mimi kpaa yô, ma m nenge iyev i Ú or ve yô; gadia ka We m we U kwagh wam sha ikev ye.

²¹Nahan yô, TER ngu kaan nahan sha kwagh u ior mba Anatoti ne, mba ve keren uma wou ve kaan er: Mayange de kera pasen kwagh sha iti i TER ga, gayô kpen you sha ikev yase.

²²Nahan yô, TER u akum a Sha ngu kaan nahan er: Nenge, Me tsaha ve; ikaior ia kpe ku u sha sanker; ônov vev mba nomso kua mba kasev vea kpe ijen;

²³asande tsô kpaa aa shi ve her ga; gadia Me haa ior mba Anatoti kwaghbo iyol, sha inyom i á va tsaha ve la.