Read tiv Yeremia 15 Bible Online

Yeremia 15 - tiv bible

Yeremia 15

¹Nahan TER kaa a mo er: Shin Mose kua Samuel vea tile sha ishigh Yagh je kpaa, mayange Me kera ver ishima sha ior mban ga; zenda ve sha ishigh Yagh kera, ve̱ yem kera.

²Man aluer vea pine u er: Se̱ yem hana? Yô, ú kaa a ve wer: TER ngu kaan nahan er: Mba i ver ve sha ci u ku la, ve̱ za hen ku; mba i ver ve sha ci u sanker la, ve̱ za hen sanker; mba i ver ve sha ci u ijen la, ve̱ za hen ijen; mba i ver ve sha ci u ikangenev la, ve̱ za di ken uikangen.

³Me tsaha ve sha mbamtsaha anza anyiin, kape TER A kaa ne: sanker sha ci u wuan kera, man iwa sha ci u tusen a mi, inyon i sha kua inyam ikume sha tar sha ci u yan man u anden kera.

⁴Me na, vea hingir ityartor i sha won cii kwagh u cieryol, sha ci u Manase, wan u Hesekia, tor u Yuda, sha ci u kwagh u a er ken Yerusalem la.

⁵Gadia ka anti mhôônom maa kôr nan a we, we Yerusalem? Shin ka anti nana zungwe u? Man ka anti nana kaha sha u pinen mlu wouwe?

⁶We, u tem kera, kape TER A kaa ne, u hide ijime je; ka sha ci u nahan, M naregh uwegh Agh sha a we, M tim u kera ye; M vôr a afanyô a vaan.

⁷M peer ve sha tser hen ihinda i tar ve la; M tsuwe ve ônov kera, M tim ior Av; ve undu igbenda ve la ga.

⁸Kasev mba côgholov vev ngeem je, ve hemba ngeen a waarawa u uzegembamngerev; M va a ortimin iyange sha tembe, a va bur ngô u mbayevikaior; M na ican kua mcieryol va ta sha a na fese.

⁹U a mar utaankaruhar la, ngu uren; a kpe, iyange na mire er iyange i lu her je yô; a va ahenge, a̱ hingir tumbuluu; man Me gema asande a ve a a shi her me na sanker sha ishigh ki mbaihomov vev, kape TER A kaa ne.

¹⁰Kpe ahii, ngôm! er u marem, m lu or u num man or u ayongo hen tar ne yô! M na or injô ga, ve kpaa ve nam injô ga; nahan kpaa, ve cii mba tuhwan mo.

¹¹TER kaa er: Mimi je, Me pase u Me tuhwa, á kpe u iyol; mimi je, Me na mbaihomov ou vea zamber we sha iyange i kwaghbo kua sha iyange i ican la.

¹²Or á fatyô u kever iyôgh ki iligh, iyôgh ki iligh ki ki dugh ken Imbusutarimese la kua togula, kpa?

¹³Akaa a ou kua inyaregh you, Me na, á ya ishar sha mi, á yam a yam ga, sha ci u asorabo a ou cii, ken tar wou cii.

¹⁴Me na u, ú er mbaihomov ou tom ken tar u u fe u ga yô; gadia i keer usu sha iyugh Yam, u ua hia ne yô.

¹⁵TERE, We U fa, umbur mo, va sôrom, orom iyev sha mba ve tevem a ican la; sha ishima You i wan la, de karen a mo kera ga; fa, ka sha ci Wou i heem ye.

¹⁶Ka a zua a akaaôron a Ou yô, m ya a, akaaôron a Ou hingir mo iember man msaanyol ken ishima yam; gadia i yilam sha iti You je, TERE, Aôndo u akum a Sha.

¹⁷M tema nongo a mba i lu ve iyol yagh yagh la ga, m ember kpaa ga; m tema tswen, sha ci u uwegh Ough ku lu sha a mo yô, gadia U ivim a iyugh.

¹⁸Ka nyi man mnyoonom am ma nyoon mo gbemee, man ivav yam kpaa i den ga, i rumun u been ga nahana? Nahan Ú hingir mo er uwagh u icughugh nahan? Er mngerem ma ka ma va uma kera nahana?

¹⁹Nahan yô, TER ngu kaan nahan er: Aluer wea hide yô, nahan Me hide a we, ú va tile sha ishigh Yagh; man aluer wea ôr kwagh u injaa, á kera lu kwagh u gbilinigh ga yô, ú hingir er ka zwa Wam nahan; ve yô, ve̱ hide her a we je, kpa we yô, de kera hidi her a ve ga.

²⁰Me gema u, ú hingir ior mban er gilgar u taver u iyôgh ki togula nahan; vea nôngo ityav a we, kpa vea hemba u ga, gadia M ngu a we sha u waren we man u yiman we, kape TER A ne.

²¹Me yima u sha ikev i mbaaferev, man Me paa u sha ikev i mbacieryol.