Read tiv Yeremia 20 Bible Online

Yeremia 20 - tiv bible

Yeremia 20

¹Tsô Pashur, wan u Imer, u a lu orvesen cii sha tom u iyou i TER la, ungwa er Yeremia lu ôron kwagh pasen akaa angan yô,

²nahan Pashur gbidye profeti Yeremia man a za mande un igbe i i lu hen Hunda u Benyamin u sha u hen iyou i TER la.

³Tsô kper nan gen yô, Pashur dugh Yeremia igbe. Nahan Yeremia kaa a na er: TER kera yila u iti er Pashur ga, kpa er Magor-misa-bibi (Mcieryol kase tser).

⁴Gadia TER ngu kaan nahan er: Nenge, Me gema u ú hingir iyol you kwagh u cieryol, akar a ou cii kpaa ú cier a iyol; aa kpe ku u sha sanker u mbaihomov vev, ashe ou je kpaa aa nenge; man shi Me na Yuda cii sha ikev i tor u Babilon, una yem a ve uikangen hen Babilon, man una wua ve sha sanker.

⁵Man shi Me na inyaregh ki gar ne cii, man mtsera na cii, man ikav nav mbi taver ishe cii; een, akaa a injaa a utor mba Yuda cii, Me na a sha ikev i mbaihomov vev, vea ya ishar sha a, vea kura a, man vea yem a mi sha Babilon

⁶Man we, Pashur, kua mba ve tem ken ya wou cii, á yem a ven uikangen; ú za nyôr sha Babilon je, ka keela ú za kpe, man shi ka keela kpaa á ii u ye, we kua akar a ou cii, a u lu ôron ve kwaghôron u profeti sha aie la.

⁷TERE, U tsulem man mo kpaa m rumun mer, i̱ tsulem. U hembam agee, U nenger mo; m hingir kwagh u ahan iyange jimin cii, hanma or nan ngu nahan mo tar.

⁸Gadia hanma shighe u ka mea ôron kwagh yô, m gba ngoron; m genger imo mer: Ipila man mkighir! Sha ci u kwaghôron u TER gema hingir u nan mo iheen man tarnahan iyange jimin cii.

⁹Ka mea kaa mer: Me kera ter Un ga, me kera ôr kwagh ken iti Na kpaa ga, nahan i hingir mo ken ishima er usu u hian, u i cir u ken akuhe am yô, m wa ishima je, m vôr, hembam kera.

¹⁰Gadia m ungwa mkese u ior kpishi, mcieryol kase tser! Wa un akaa iyol, se kpaa sé wa un akaa iyol. Ior mba m lu a ve doo doo cii mba veren ashe er m̱ nôngo gbev; Adooga una tumbul, nahan sé hemba un, sé or un iyev.

¹¹Kpa TER ngu a mo er orageegh u cier iyol; nahan yô, mba ve tevem a ican vea nôngo gbev, vea hemba ga; vea va ahenge tsung je, sha ci u ikôr doo ve ga, ka kunya u gbem sha won je, u ua hungul mayange ga yô.

¹²Kpa TER u akum a Sha u U kar mbaperapera, U nengen ahi kua ishima kpaa ne, ma̱ m nenge iyev You i oron sha a ve; gadia ka We, m we U kwagh wam sha ikev ye.

¹³Wa nen TER icam, wuese nen TER, gadia A yima uma u oribanave sha ikev i mbaaferev.

¹⁴Ifan i̱ kôr iyange i i marem sha i la; iyange i ngôm marem la i̱ de luun a iveren ga.

¹⁵Ifan i̱ kôr or u nan ve terem a loho, er: I mar u wannomso, nan ne er i̱ saan un iyol kpishi la.

¹⁶Or shon la nana̱ hingir er agar a TER yôhôl a, je A kera vaa afanyô ga la, nana̱ ungwa shisha vaa pepe man ikengeutya iyange sha tembe,

¹⁷sha ci u A wuam er m lu ken uya la ga; ngôm ma a hingir uwar wam, iyav nav ma mbu gbe lun nahan gbem tsô.

¹⁸Ka nyi je man m shi dugh ase ken uya sha u nengen ican man ishima vihin je ayange am a gbe been kera sha kunya nahana?