Read tiv Yeremia 25 Bible Online

Yeremia 25 - tiv bible

Yeremia 25

¹Kwaghôron ne va hen Yeremia sha kwagh u ior mba Yuda cii, ken inyom i sha unyiin i Yehoyakim wan u Yoshia, tor u Yuda (ka inyom i hiihii i Nebukadinesar tor u Babilon je la);

²ka kwagh u profeti Yeremia ôr a ior i Yuda cii, kua mba ve tem ken Yerusalem kpaa, er:

³Hii sha inyom i sha pue kar utar i Yoshia wan u Amon, tor u Yuda, zan zan nyian, anyom ikundu kar atar ne, kwaghôron u TER va her a mo, man mo di kpaa m lu ôron a ven ye, pepe kua aikighe; kpa ne ver ato ga.

⁴TER kpaa tindi ne a mbatomov Nav cii, uprofeti, pepe kua aikighe; kpa ne wa iko ga, ato tsô kpaa ne ver sha u ungwan ga;

⁵lu kaan er: Shi gema nen, hanmô wen nana̱ undu gbenda u nan u bo kua shi afer a aeren a en la, tema nen ken tar u TER A ne ne kua uter enev sha ikov ikov je;

⁶de kera dondon nen mbaaôndo mbagenev, eren nen ve tom man shi civir ve ga, man shi de kera bamen nen Mo sha tom wen u aveegh la ga; nahan Me er ne kwagh u vihin ga.

⁷Nahan kpaa, ne ver ato her a Mo ga, kape TER A kaa ne; ne gema ne mba bamen Mo sha tom wen u aveegh, u ne eren ne vihin ayol a en a min yô.

⁸Nahan yô, TER u akum a Sha ngu kaan nahan er: Er ne ver ato sha akaaôron Am ga yô,

⁹nenge, Me tindi i̱ za kura icombor i ken imbusutarimese cii, kape TER A kaa ne, kua Nebukadinesar, tor u Babilon, wanakiriki Wam, Me va a ve, vea ta num sha tar ne, kua mba ve tem sha u kpaa, man sha akuraior a a kase ve ne cii; Me tim ve purututu, Me gema ve vea hingir kwagh u cieryol man kwagh u gbiren iwer a min man atse a aa lu gbem sha won.

¹⁰Man shi Me er imo i ahan man imo i ember man imo i orkwasehe man imo i kwasehe man iov i nase kua iwanger i imenger vea bee ken a ve.

¹¹Tar ne cii kpaa ua hingir ijiir i atse a ayou aa lu her man kwagh u cieryol; man akuraior angan aa lu sha ikev i tor u Babilon anyom akunduatargber.

¹²Tsô shighe u anyom akunduatargber á akuma yô, Me tsaha tor u Babilon man ikurior la, kape TER A kaa ne, sha ci u ifer ve man tar u Kaldi kpaa, Me gema u, ua hingir toho dang gbem sha won.

¹³Me er a tar la sha akaaôron Am cii a M er sha u yô, ka akaa a i nger a ken ruamabera ne cii, a Yeremia ôr sha akuraior ne cii la.

¹⁴Gadia ve kpaa akuraior kpishi man utor mba vesen vea gema ve vea hingir ikpan ve; Me or ve iyev sha aeren a ve, kua sha tom ve u aveegh kpaa.

¹⁵Gadia TER, Aôndo u Iserael, kaa a mo nahan er: Ngohol iyongo i wain i iyugh Yam sha uwegh Agh, za na akuraior a M tindi u hen a la, a̱ ma.

¹⁶A̱ ma, a̱ hingir ze ze ze, a̱ nyôr ihundu sha ci u sanker u M lu tindin hen a yô.

¹⁷Tsô m ngohol iyongo la hen uwegh ku TER, m za na akuraior a TER tindim hen a la cii mer, a̱ ma:

¹⁸Yerusalem man agar a Yuda, man utor nav, man atiator a na; sha u geman ve, ve̱ hingir ijiir i atse a ayou a lu her man kwagh u cieryol man kwagh u gbiren iwer a min man kwagh u lun a ifan iyol, er i lu nyian nahan;

¹⁹Farao, tor u Igipiti man mbatomov nav man atiator a na man ior nav cii

²⁰kua ior anza kposo kposo cii, man utor mba ken tar u Ushi, man utor mba ken tar u Mbafiliti cii man Ashekelon man Gasa man Ekeron man asande a Ashedodi a a shi her,

²¹Edom man Moabi man Mbaamon,

²²man utor mba Tiru cii, man utor mba Shidon cii, man utor mba sha ityar i hen kpe u zegemnger yande la,

²³Dedan man Tema man Busu kua mba ve hondon a-ase cii,

²⁴man utor mba Arabia cii, man utor mba anza a ior kposo kposo mba ve tem ken desereti,

²⁵man utor mba Shimeri man utor mba Elam cii, man utor mba Media cii,

²⁶man utor mba shin imbusutarimese cii, mba ken ica man mba ikua ikua sha adondo adondo, man ityartor i sha won cii, i i lu sha tar; tor u Sheshaki una mase man.

²⁷Kaa a ve, wer: TER u akum a Sha, Aôndo u Iserael, ngu kaan nahan er: Ma nen, hunde nen, haa nen azer, gbidye nen inya, de kera shi moughon nen ga, sha ci u sanker u M lu tindin her a ven yô.

²⁸Tsô, aluer vea venda u ngohol iyongo la sha ikev you man yô, nahan ú kaa a ve wer: TER u akum a Sha ngu kaan nahan er: Man yen i keng.

²⁹Gadia, nenge, gar u i yer un sha iti Yam je kpaa, M ngu hiin u haan akaabo sha a na, man hire ne, á de ne yee? Á de ne ga; gadia M ngu yilan sanker Mer a̱ va ta num sha mba ve tem sha won cii, kape TER u akum a Sha A kaa la.

³⁰Nahan we yô, ôr kwaghôron u profeti ne cii sha a ve, kaa a ve wer: TER Una ta kume Sha, Una kende imo Na hen icighanjiir Na u teman la; Una ta kume tsung a ikumuile Na; Una genger imo a mba ve tem sha won cii, bee er ka mbashoghol atam a wain nahan.

³¹Acin a utya kaa zan zan ar sha ikighir i tar je, gadia TER ngu waren kwagh a akuraior, ngu ôron uumace cii ijir; mbaaferev yô, Una gema ve á na ve sha ikev i sanker, kape TER A kaa ne.

³²TER u akum a Sha ngu kaan nahan er: Nenge, kwaghbo una due ken ikurior igen una va ken igen, man zegeahumbe ngu moughon sha akighir a tar je.

³³Sha iyange la mba TER A woo ve la, vea lu hen inya, á hii sha ikighirtar ngin zan zan á zar ar ikighirtar ngila, á zungwe ve ga, á kohol ve ijiir i môm ga, á ii ve kpaa ga; vea hingir er atihi a ihôghonov mbi sôron sule a min hen inya nahan.

³⁴Gbidye nen vaa, ne mbakuranilev, vaa nen; vingir nen iyol shin mtwe, ne mbahemenev mba ikumuile, gadia ayange a wuan ne kuma ve, man Me sambe ne, né gba inya er gbande u injaa nahan.

³⁵Mbakuranilev vea zua a gbenda u nyôngoso ga, man mbahemen ikumuile kpaa vea zua a gbenda u waren ga.

³⁶Ungwa! imo i mliam ma mbakuranilev, man vaa u mbahemen ikumuile! Gadia TER ngu vihin ijiir ve i yan toho.

³⁷Ajiir a yan toho her bem bem la hingir ving, sha ci u ishima i vihin i tsung i TER.

³⁸A mough hen ijiir Na i yeren kera, er gumbegha nahan; gadia tar ve hingir ice sha ci u sanker u aperagh man sha ci u iyugh Na i tsung.