Read tiv Yeremia 27 Bible Online

Yeremia 27 - tiv bible

Yeremia 27

¹Sha hiihii u Sedekia wan u Yoshia, tor u Yuda, tema tor la, kwaghôron ne due hen TER va hen Yeremia, er:

²TER ngu kaan a mo nahan er: Er ikangenev kua agbur haa sha mon wou;

³gema tindi a mi hen tor u Edom man hen tor u Moabi man hen tor u Mbaamon man hen tor u Tiru, kua hen tor u Shidon, sha ikev i mbatyomov mba ve ve hen Yerusalem hen Sedekia tor u Yuda la;

⁴tindi ve hen uter vev a imo ne wer: TER u akum a Sha, Aôndo u Iserael, ngu kaan nahan er: za kaa nen uter enev nahan ner:

⁵Ka Mo M gbe tar man ior kua ishôso i i lu sha won cii, sha tahav Av mbu vesen kua sha uwegh Agh ku naregh; man M gem u, M ne u i doom u nan nan ye.

⁶Hegen yô, Mo, M gema ityar ingin cii, M na sha ikev i Nebukadinesar tor u Babilon, wanakiriki Wam; inyam i ken toho kpaa, M na un i, i̱ eren ishima na.

⁷Akuraior cii aa eren ishima na, kua wan na man wan u wan na kpaa, zan zan shighe u tar na iyol na kpaa una va kuma; nahan akuraior a ageegh man utor mba tamen vea gema un, una hingir sha ikev ve.

⁸Tsô, ikurior man tartor u u rumun u lun sha ikev i Nebukadinesar tor u Babilon ga, man shi u rumun u huwan igbur i tor u Babilon sha mon ve ga yô, Me tsaha ikurior la sha sanker man ijen kua bouange je, kape TER A kaa ne, zan zan Me tim ve kera sha uwegh nagh.

⁹Nahan ne yô, de veren nen ato sha uprofeti enev, shin sha mbakpehenasor enev, shin sha mnyam ma cien enem, shin sha mbatsenganfan enev, shin sha mbaahiriv enev kpaa ga, mba ve er kwagh aven ve kaa er: sha ikev i tor u Babilon ga la.

¹⁰Ka aie ve tsengeôron ne ye, sha u karen a ven hen tar wen kera, yemen a ven ca; man sha u M̱ zenda ne ne̱ saa ishe kera yô.

¹¹Kpa ikurior i ia huwa mon u i ken igbur i tor u Babilon, man ia er un tom yô, Me de i, ia tema ken tar u i, kape TER A kaa ne; ia shire u, ia tema ken u kpaa.

¹²Sedekia tor u Yuda kpaa, m ôr a na nahan vough, m kaa mer: Huwa nen imon yen ken igbur i tor u Babilon, er nen un tom kua ior nav, tsô né lu uma.

¹³Ka sha ci, u nyi né kpe, we kua ior ou, sha sanker man sha ijen kua bouange er TER A er sha kwagh u ikurior i i vende u eren tor u Babilon tom la?

¹⁴De veren nen ato sha akaaôron a uprofeti, mba ve lu kaan er: Nea lu sha ikev i tor u Babilon ga la ze; gadia ka aie ve tsengeôron ne ye.

¹⁵Gadia M tindi ve ga, kape TER A kaa ne, kpa mba ôron kwaghôron u uprofeti ken iti Yam sha aie tsô, sha u M̱ zenda ne kera, ne̱ saa ishe, ne kua uprofeti mba ve tsengeôron ne kwagh la.

¹⁶Man shi m ôr kwagh a uprofeti man ior ne cii m, kaa mer: TER ngu kaan nahan er: De veren nen ato sha akaaôron a uprofeti enev ga, mba ve ôr ne kwaghôron u profeti er: Nenge, ikav mbi iyou i TER mbi mbi lu ken Babilon la, á hide a mi fefa je; gadia ka aie ve tsengeôron ne ye.

¹⁷De veren ato her a ve ga; er nen tor u Babilon tom, tsô né lu uma; ka sha ci u nyi man gar ne a̱ hingir ice?

¹⁸Kpa aluer vea lu uprofeti je, man kwaghôron u TER una lu a ve yô, nahan yô, ve̱ zamber ase a TER u akum a Sha, er ikav mbi mbi shi ken iyou i TER man ken iyou i tor u Yuda man ken Yerusalem mbia za sha Babilon ga yô.

¹⁹Gadia TER u akum a Sha ngu kaan nahan er: Sha kwagh u mtôm, man sha kwagh u zegetasa u mnger, man sha kwagh u asange a pendan utasa sha mi, man sha kwagh u asande a uika a a shi ken gar ne yô,

²⁰a Nebukadinesar tor u Babilon kor a ga la, zum u a due a Yekonia wan u Yehoyakim, tor u Yuda, ken Yerusalem yem a na uikangen sha Babilon a ashagba a Yuda man Yerusalem cii la,

²¹TER u akum a Sha, Aôndo u Iserael, ngu kaan sha kwagh u ikav mbi mbi shi ken iyou i TER, man ken iyou i tor u Yuda, man ken Yerusalem la nahan er:

²²Á yem a mbi ken Babilon, ka keregh mbia za lu ye, zan zan sha iyange i Me va nenge sha kwagh u mbi yô, kape TER A kaa ne; sha shighe la, Me kura mbi Me hide a mbi hen ijiir ne ye.