Read tiv Yeremia 29 Bible Online

Yeremia 29 - tiv bible

Yeremia 29

¹Angan ka akaaôron a washika u profeti Yeremia nger ken Yerusalem tindi hen mbatamen mba mbauikangenev mba ve shi her, man hen upristi, man hen uprofeti kua ior cii mba Nebukadinesar kôr ve hen Yerusalem yem a ve uikangen sha Babilon la—

²ken masetyô u tor Yekonia man ngô u tor man mbatomov mba ken ya u tor atiator a Yuda man Yerusalem man mbafan ityomaveegh man mbavareniwa, vande moughon ken Yerusalem kera la

³sha ikev i Elasa wan u Shafan man Gemaria wan u Hilkia mba Sedekia tor u Yuda tindi ve sha Babilon hen Nebukadinesar tor u Babilon la—er:

⁴TER u akum a Sha, Aôndo u Iserael, ngu kaan a mbauikangenev cii, mba i kôr ve hen Yerusalem i yem a ve uikangen sha Babilon la nahan er:

⁵Maa nen uya, tema nen ker, môôr nen ikon, yaan nen atam a i;

⁶er nen kasev, mar nen ônov mba nomso kua mba kasev, er nen kasev na nen ônov enev mba nomso man naan nen ônov enev mba kasev ken unoo, ve̱ mar ônov mba nomso kua mba kasev; seer nen a seer ngeen, de panden nen a pande ga.

⁷Ker nen bem u gar u M ne i yem a ven uikangen ker la, sôn nen TER sha ci na; gadia ka sha bem na, ne kpaa né zua a bem ye.

⁸TER u akum a Sha, Aôndo u Iserael, ngu kaan nahan er: De rumun nen uprofeti enev mba ve lu a ven kua mbakpehenasor enev ner, ve̱ tsugh ne ga, man shi de veren nen ato sha mnyam ma cien ma ma cien ne la ga.

⁹Gadia ka sha aie ve ôron ne kwaghôron u profeti ken iti Yam ye; M tindi ve ga, kape TER A kaa ne.

¹⁰Gadia TER ngu kaan nahan er: Saa anyom akunduatargber á iv sha ci u Babilon, man Me va sôr ne, Me kure kwaghôron Wam u dedoo a ven, Me hide a ven hen ijiir ne ye.

¹¹Gadia M fa mbamhen mba M lu henen sha a ven ne, kape TER A kaa ne, ka mhen u bem, ka u bo ga, sha u nan ne ishimaverenkeghen i dedoo ken masetyô.

¹²Nahan né vaa a Mo, man né za, né za sônom man Mo kpaa Me ver ato her a ven.

¹³Nahan né kerem, man né zua a Mo kpaa, zum u né kerem a ishima i môm la.

¹⁴Me rumun er ne̱ zua a Mo kpaa, kape TER A kaa ne, Me gema mlu wen, Me kohol ne ken akuraior cii, man ken ajiir a Me zenda ne ne yem ker la cii, kape TER A kaa ne; Me shi Me hide a ven hen ijiir i lu M na, i kura ne her kera, i yem a ven uikangen la.

¹⁵Aluer ne kaa ner: TER na se uprofeti ken Babilon yô—

¹⁶kpa TER ngu kaan sha kwagh u tor u a tem sha ikônough ki torough ki Davidi, kua sha kwagh u ior cii mba ve tem ken gar ne, ka anmgbianev enev mba ve ze a ven ken uikangen imôngo ga la,

¹⁷TER u akum a Sha ngu kaan nahan er: Nenge, Me tindi ve a sanker man ijen kua bouange, Me gema ve, vea hingir er ubombaatamev mba tur nahan, mba ve vihi i gande u yan la.

¹⁸Me zenda ve ityô a sanker, man ijen kua bouange, Me na ve sha u i̱ tumbul a ve ken ityartor i sha won cii, ve̱ hingir kwagh u lun a ifan iyol man kwagh u cieryol man kwagh u gbiren iwer a mi, man kwagh u aheenegh, ken akuraior cii a M zende ve ve yem ker la;

¹⁹er ve ver ato sha akaaôron Am ga yô, kape TER A kaa ne,

²⁰nahan ungwa nen ase kwaghôron u TER, ne mba ne lu ken uikangen cii, mba M ne ne gbenda ken Yerusalem ne yem ken Babilon la.

²¹TER u akum a Sha, Aôndo u Iserael, ngu kaan sha kwagh u Ahaba wan u Kolaia, man sha kwagh u Sedekia wan u Maaseya, mba ve ôron ne kwaghôron u profeti ken iti Yam sha aie la er: Nenge, Me na ve sha ikav i Nebukadinesar tor u Babilon, una wua ve sha ashe a en;

²²man ka sha a ve mbauikangenev mba Yuda mba ve lu ken Babilon la cii vea dugh kwaghôron u wan ifan a mi er: TER A̱ gema u, hingir er Sedekia man Ahaba nahan, mba tor u Babilon lu mgbagh ve sha usu la,

²³sha ci u ve er kwagh u ibume ken Iserael, man ve er idya a kasev mba ior mba wan ndor a ve man ve ôr kwagh ken iti Yam sha aie je, kwagh u M ne ve zwa sha mi ga yô; ka Mo M fe, shi M eren shiada kpaa ye, kape TER A̱ kaa ne.

²⁴Man shi ôr kwagh a Shemaia, Ornehelam, kaa wer:

²⁵TER u akum a Sha, Aôndo u Iserael, ngu kaan nahan er: Er we, u tindi uwashika ken iti you hen ior mba ve lu ken Yerusalem cii, man hen Sefania wan u pristi Maaseya, kua hen upristi cii, wer:

²⁶Ka TER je A ver u pristi sha ityough ki pristi Yehoyada, sha u mbahemenev ve̱ lu ken iyou i TER yô, sha er hanma or u nan lu bumen, nan veren iyol er nan ngu profeti yô, ú mande nan igbe shi ú senda nan itiligh sha mon kpaa ye.

²⁷Tsô hii nan man u yange Yeremia Oranatoti, u a ver iyol na er un ngu profeti hen a ven la ga?—

²⁸gadia a tindi se loho ken Babilon, er: Ica ia gba; maa nen ayou, tema nen ker, môôr nen ikon, man ya nen atam a i.

²⁹Nahan pristi Sefania ôr washika ne sha ato a profeti Yeremia.

³⁰Nahan kwaghôron u TER va hen Yeremia, kaa er:

³¹Tindi hen mbauikangenev cii, kaa wer: TER ngu kaan sha kwagh u Shemaia Ornehelam nahan er: Er Shemaia a er ne kwaghôron u profeti man M tindi un kpaa ga, a na, ne suur sha aie,

³²nahan yô, TER ngu kaan nahan er: Nenge, Me tsaha Shemaia Ornehelam kua tsombor na; una lu a ma or u nana tema ken ior mban ga, man shi una nenge a kwagh u dedoo u Mea er a ior Av kpaa ga, kape Ter A kaa ne gadia a tese er i̱ hendan kwagh a Ter.