Read tiv Yeremia 32 Bible Online

Yeremia 32 - tiv bible

Yeremia 32

¹Kwaghôron ne due hen TER va hen Yeremia sha inyom i sha pue i Sedekia tor Yuda la, man gema lu di inyom i sha pue kar anigheni i Nebukadinesar la.

²Hen shighe la yô, mbautyav mba tor u Babilon kase Yerusalem; profeti Yeremia yô, i gema i wuhe un ken tembe u mbakuran, u u lu ken iyou i tor u Yuda la;

³gadia Sedekia tor u Yuda wuhe un, kaa er: Ka sha ci u nyi man u er kwaghôron u profeti u kaa wer: TER ngu kaan nahan er: Nenge, Me na gar ne sha ikev i tor u Babilon, una ngohol un kpaa;

⁴man Sedekia tor u Yuda una war sha ikev i Mbakaldi ga, kpa á na un sha ikev i tor u Babilon kpee je, una ôr kwagh a na sha zwa na, man ashe a ngun aa nenge a ashe a ngula;

⁵una yem a Sedekia sha Babilon, man una za lu ker zan zan Me va nenge sha kwagh na, kape TER A kaa ne; shin nea nôngo ityav a Mbakaldi kpaa á za ne sha mi ga, nahana?

⁶Tsô Yeremia kaa er: Kwaghôron u TER va her a mo, kaa er:

⁷Nenge, Hanemel wan u Shalum anngô u teru, ngu van her a we, una va kaa er: Yam sule wam u u lu ken Anatoti la, gadia we u ngu a tahav mbu paan u man u yamen u kpaa.

⁸Nahan Hanamel wan u anngô u terem va her a mo hen tembe u mbakuran, er TER kaa la, a kaa a mo er: Shi yam sule wam u u lu ken Anatoti, u u lu ken tar u Benyamin la, gadia we u ngu a tahav mbu ngohol u hingir u wou, mpaa kpaa ka u wou; yam u sha ci wou. Nahan m fa er i lu imo i TER je yô.

⁹Tsô m yam sule u u lu ken Anatoti a Hanamel wan u anngô u terem man m kar un inyaregh, azurfa kuma ushekel pue kar utaankaruhar.

¹⁰Nahan m nger takerada u yamen kwagh, m var ikav sha mi m yila mbashiada, man m kar un inyaregh sha iyôgh ki karen myohom a min.

¹¹Tsô m tôô takerada u pasen kwagh u m yam la, u i var ikav sha mi la, sha atindi man sha ieren la, kua u a lu ivegher la kpaa,

¹²nahan m gema takerada u pasen kwagh u m yam la, m na Baruki wan u Neria, wan u Mahaseya, sha ishigh ki Hanamel, wan u anngô u terem, man sha ishigh ki mbashiada mba ve wa uwegh sha takerada u pasen kwagh u m yam la, kua sha ishigh ki Mbayuda cii mba ve tema sha tembe u mbakuran la.

¹³Tsô m kaa a Baruki sha ishigh vegh, mer:

¹⁴TER u akum a Sha, Aôndo u Iserael, ngu kaan nahan er: Tôô utakerada mban, takerada u pasen kwagh u m yam la, ka u i ver ikav sha mi la, kua u a lu ivegher ne kpaa, wa ve ken ityegh ki inyaagh, sha u ve̱ tsa ayange á ngee yô.

¹⁵Gadia TER u akum a Sha, Aôndo u Iserael, ngu kaan nahan er: Shi á yam uya man ishule man ishule i ikon i wain ken tar ne.

¹⁶Nahan er m gema takerada u pasen kwagh u m yam la, m na Baruki wan u Neria yô, m sôn TER, m kaa mer:

¹⁷Ahi! Tere, AÔNDO. Nenge, We, U er Sha man tar sha agee a Ou a vesen man sha uwegh Ough ku naregh; ma kwagh u hemban we ngu ga;

¹⁸We u U zungu ior udubu imôngo mhôônom man u oron iyev sha ifer i uter, U haa ônov vev mba ken ijime ve la, ikum; ka Aôndo u vesen, u hemban agee, TER u akum a Sha; ka iti Na je la;

¹⁹mhen Na vese, tom Na hemba; ashe Na nga ivegher sha u nengen sha igbenda i ônov mba iorov cii, sha u nan hanma or sha inja i igbenda i nan man sha inja i atam a aeren a nan;

²⁰Wen u A er uivande man akaakpilighyol ken tar u Igipiti, ken Iserael kua ior mbagenev kpaa zan zan nyian, man U er iti You i za er i lu nyian nahan;

²¹U due a ior Ou Iserael ken tar u Igipiti sha uivande man akaakpilighyol man sha uwegh ku ageegh man sha uwegh ku naregh, kua sha mciem ma tan iyol ma vesen;

²²man shi U na ve tar ne U bum a uter vev Wer, Ú na ve, tar u atumbabua man iyough ve dumbur ken u la;

²³nahan ve nyôr, ve ngohol u; kpa ve wa imo You iko ga, man shi ve zende sha atindi a Ou kpaa ga; akaa a U kaa ve Wer, ve̱ er la cii, ve er ma kwagh môm ga; ka nahan man U ne kwaghbo ne cii a va tser ve ye;

²⁴nenge, atihianyaagh a tav je, za ar sha gar sha u ngohol un; i gema gar i na sha ikev i mbakaldi mba ve nenge ityav a na ne, sha sanker man ijen kua bouange; kwagh u U er kpaa a kure sha mi vough; man nenge, U ngu nengen a mi kpaa.

²⁵Kpa We, Tere AÔNDO, U kaa a mo iyol You wer: Yam sule la sha inyar, man yila mbashiada; man i gema gar ne i na Mbakaldi sha ikev kera ve.

²⁶Tsô kwaghôron u TER va hen Yeremia er:

²⁷Nenge, Mo M ngu TER, Aôndo u uuma cii; ma kwagh u hemban Mo ngu jee?

²⁸Nahan yô, TER ngu kaan nahan er: Nenge, Me na gar ne sha ikev i Mbakaldi, man sha ikev i Nebukadinesar, tor u Babilon, una ngohol un kpaa;

²⁹Mbakaldi mba ve nenge ityav a gar ne, vea va nande un sha usu, una hia kera, kua uya mba ve nanden Baal nagh sha ityor ve la, shi ve toon mbaaôndo mbagenev iniav mbi man sha u bamen Mo la kpaa.

³⁰Gadia Mbaiserael man Mbayuda er ma kwagh ugen sha ishigh Yagh ga, saa ifer, hii iyev vev je; gadia Mbaiserael mba bamen Mo a bam tseegh sha tom ve u aveegh la, kape TER A kaa ne.

³¹Gadia gar ne kpoghol ishima Yam i vihin kua iyugh Yam i tsung, hii sha iyange i ve maa un la zan zan nyian ne, sha u M kar a na sha ishigh Yagh kera,

³²sha ci u iferkwagh i Mbaiserael kua i Mbayuda cii, i ve er sha ci u bamen Mo, ve man utor vev, man atiator a ve, man upristi vev man uprofeti vev, man ior mba Yuda, kua mba ve tem ken Yerusalem.

³³Ve gema ijime a Mo, ve ver ishigh sha a Mo ga; shin er M lu tesen ve, pepe kua aikighe, nahan kpaa ve ver ato sha u vea ngohol ityesen ga.

³⁴Kpa ve ver akaa a ve a ndôhôrshima ken iyou i i yer i sha iti Yam la, sha u vea hôngor i yô.

³⁵Ve maa ajiir a taven sha a Baal kpaa, a a lu shin pev u Ben-hinom, sha u nan ônov vev mba nomso kua mba kasev ve kar ken usu sha u civir Moleki; kwagh u M ne ve zwa ga, a nyer ken ishima Yam kpaa ga; sha u vea er kwagh u ndôhôrshima ne, vea na Yuda a er isholibo yô.

³⁶Nahan yô, TER, Aôndo u Iserael, ngu kaan nahan er: sha kwagh u gar, u ne ter un ner: I na un sha ikev i tor u Babilon sha sanker man sha ijen kua sha bouange ne:

³⁷Nenge, Me kohol ve ken ityar cii, i M zende ve ve yem ker sha ishima Yam i vihin, man sha iyugh Yam i tsung kua ishimavihin Yam la; shi Me va a ve hen ijiir ne Me ver ve vea tema bem bem;

³⁸vea hingir ior Av, Mo kpaa Me gema Me hingir Aôndo ve;

³⁹Me na ve ishima i môm man gbenda môm, sha u ve̱ ciam gbem, i̱ kpe ve iyol kua ônov vev mba ken ijime ve;

⁴⁰Me ya ikur i tsôron a ve, Me de u eren a ve dedoo ga; Me ver mciem ma cian Mo ken asema a ve, sha u ve de kera undun Mo ga yô.

⁴¹Een, Me ember ve, Me eren a ve dedoo, Me môôr ve ken tar ne kpee sha ishima Yam cii man sha uma Wam cii kpaa.

⁴²Gadia TER ngu kaan nahan er: Er M hee ior mban kwaghbo u vesen ne iyol nahan, kape Me va di ve a mkpeyol cii u M ter sha ve la.

⁴³Nahan á yam ishule ken tar ne, u ne kaan ner: Ka ice, i or man zendenya kpaa ve kera lu ker ga, i gema u u hingir sha ikev i Mbakaldi kpaa.

⁴⁴Ior vea yam ishule sha inyar, vea nger utakerada mba yamen akaa, vea var ve ikav, vea yila mbashiada ken tar u Benyamin, man ken iningirtar i Yerusalem, man ken agar a Yuda, man ken agar a tar u Iwoogh man ken agar a tar u shin Pev, kua ken agar a ken tar u Imbusutarimese la, gadia Me gema mlu ve la, kape TER A kaa ne.