Read tiv Yeremia 35 Bible Online

Yeremia 35 - tiv bible

Yeremia 35

¹Kwaghôron ne due hen TER va hen Yeremia sha ayange a Yehoyakim wan u Yoshia, tor u Yuda la, er:

²Za hen ya u Mbarekabi, za ôr kwagh a ve, nyôr a ve ken iyou i TER, ken kparyoughough, na ve wain ve̱ ma.

³Tsô m kua a Yaasania, wan u Yeremia, wan u Habashinia, man anngôôv nav man ônov nav cii, man ya u Mbarekabi cii;

⁴m nyôr a ve ken iyou i TER, ken kpar u ônov mba Hanan, wan u Igadalia, or u Aôndo; kpar u a dondo a kpar u atiator, u a lu sha ijime i kpar u Maaseya, wan u Shalum, orkuranhunda la;

⁵tsô m ver utasa iv a wain, kua ayongo, sha ishigh ki ior mba ken ya u Mbarekabi, m kaa a ve mer: Ma nen wain.

⁶Kpa ve kaa er: Sé ma wain je ga, gadia Yonadabi wan u Rekabi, ter wase, ta se icin kaa er: De me nen wain sha won ga, ne kua ônov enev kpaa;

⁷shi de maan nen iyou ga, de lee nen ivor ga, man de môôr nen ikon i wain ga, man de luun nen a mi kpaa ga; kpa tema nen ken utenti ayange a uma wen cii; sha u ne tsa ayange á ngee ken tar u ne lu shir ken u yô.

⁸Se kpaa se wa imo i Yonadabi wan u Rekabi, ter wase la iko, sha akaa a a kaa se cii, se kera ma wain ga, sha ayange ase cii, se a kasev asev man ônov asev mba nomso kua mba kasev kpaa,

⁹man shi se kera maa ayou a teman ken a kpaa ga; se mba a ikon i wain ga, sule kpaa ga, ivor kpaa ga;

¹⁰kpa se tema ken utenti, se wa iko, se er akaa cii a Yonadabi ter wase a kaa se yô.

¹¹Kpa er Nebukadinesar tor u Babilon va sha tar ne yô, se kaa ser: Sé yem nen ken Yerusalem sha ci u cian mbautyav mba Mbakaldi, man sha ci u cian mbautyav mba Mbashiria, ka nahan se va tem ken Yerusalem ye.

¹²Tsô kwaghôron u TER va hen Yeremia, er:

¹³TER u akum a Sha, Aôndo u Iserael, ngu kaan nahan er: Za, za kaa ior mba Yuda man mba ve tem ken Yerusalem, wer: Ne rumun u ngohol ityesen sha u wan iko sha akaaôron Am gaa? Kape TER A kaa ne.

¹⁴Akaaôron a Yonadabi wan u Rekabi, a a kaa mbayev nav er ve̱ de me wain ga la, ve er sha mi vough, mba me ga zan zan nyian, gadia ve wa icin i ter ve ta ve la iko; kpa Mo M ôr kwagh a ven pepe kua aikighe, kpa ne ver ato her a Mo ga.

¹⁵Shi M tindi mbatomov Av cii, uprofeti her a ven pepe kua aikighe, M kaa Mer: Shi hide nen, hanmô wen nana̱ undu gbenda u nan u bo, sôr nen aeren a en, de kera dondon nen sha mbaaôndo mbagenev sha u eren ve tom ga, nahan né tema ken tar u M na ne kua uter enev la; kpa ne ver ato ga, iko kpaa ne wam her je ga.

¹⁶Ônov mba Yonadabi wan u Rekabi ve er sha tindi u ter ve wa ve la vough; kpa ior mban yô, ve wam iko ga.

¹⁷Nahan yô, TER, Aôndo u akum a Sha, Aôndo u Iserael, ngu kaan nahan er: Nenge, Me va a kwaghbo la cii sha Yuda man sha mba ve tem ken Yerusalem cii u lu M ter sha a ve la, sha ci u M ôr kwagh a ve kpa ve ungwa ga; shi M yila ve, kpa ve vengese ga.

¹⁸Tsô Yeremia kaa a ya u Mbarekabi la er: TER u akum a Sha, Aôndo u Iserael, ngu kaan nahan er: Er ne we iko sha imo i Yonadabi ter wen, ne kor atindi na cii, man ne er sha akaa a a kaa ne la cii yô,

¹⁹nahan yô, TER u akum a Sha, Aôndo u Iserael, ngu kaan nahan er: Yonadabi wan u Rekabi una ban a or u nana tile sha ishigh Yagh sha won ga.