Read tiv Yeremia 37 Bible Online

Yeremia 37 - tiv bible

Yeremia 37

¹Sedekia, wan u Yoshia, tema tor sha ityough ki Konia, wan u Yehoyakim, u Nebukadinesar tor u Babilon ver un tor ken tar u Yuda la.

²Kpa un, shin mbatomov nav, shin ior mba ken tar la, ve wa iko sha akaaôron a TER ôr sha ikev i profeti Yeremia la, ga.

³Tsô tor Sedekia tindi Yehukal wan u Shelemia, man pristi Sefania, wan u Maaseya, hen profeti Yeremia, a kaa er: Shi sôn TER, Aôndo wase, sha ci wase.

⁴Yeremia yô, lu nyôron man duen hen ior, gadia ve lu a wuhe un ken gaadi ga.

⁵Mbautyav mba Farao kpaa due ken Igipiti; tsô zum u Mbakaldi mba ve kase Yerusalem la, ve ungwa aun a ve yô, ve hembe ve mough ken Yerusalem kera.

⁶Nahan kwaghôron u TER va hen profeti Yeremia, er:

⁷TER, Aôndo u Iserael, ngu kaan nahan er: Kaa nen tor u Yuda, u a tindi ne her a Mo sha u ne̱ va pinem la, ner: Nenge, mbautyav mba Farao, mba ve dugh sha u va wasen we la, vea cin á hide hen Igipiti ken tar ve.

⁸Man Mbakaldi shi vea hide, vea nôngo ityav a gar ne, vea ngohol un, vea nande un sha usu kpaa.

⁹TER ngu kaan nahan er: De kera tsughun nen ayol a en kaan nen ner: Mbakaldi vea mough hen a vese kera kpaa la ga; gadia vea mough ga.

¹⁰Gadia shin nea hemba mbautyav mba Mbakaldi cii mba ve nenge ityav a ven la je, á mase shin mbavihinyol tseegh tsô, kpa ma ve mough hanma or ken tenti u nan, ma ve nande gar ne sha usu.

¹¹Tsô zum u mbautyav mba Mbakaldi ve hembe hen Yerusalem kera, sha ci u cian mbautyav mba Farao la yô,

¹²Yeremia due ken Yerusalem er una za ken tar u Benyamin, una za ngohol dyako keregh ker atô u ior.

¹³Zum u a lu hen Hundagar u Benyamin yô, orhemen u mbakuran lu her, iti na er Iriya wan u Shelemia, wan u Hanania, a kôr profeti Yeremia er: U ngu meen yemen hen Mbakaldi.

¹⁴Nahan Yeremia nyiman er: Ka mimi ga; m ngu yemen hen Mbakaldi ga; kpa a wa un iko her ga; nahan Iriya kôr Yeremia za a na hen atiator.

¹⁵Tsô asema vihi atiator a Yeremia ve gbidye un, ve wa un ken gaadi ken ya u orngeren Yonatan; gadia ve gema ya la, hingir gaadi.

¹⁶Zum u Yeremia nyôr ken gaadi ken ukpar mbala, man a vande tsan ker ayange ngee,

¹⁷nahan tor Sedekia tindi er i̱ za dugh un i̱ va a na; tsô tor pine un ken myer ken iyou na, a kaa er: Ma kwaghôron u TER ngu shinii? Yeremia kaa er: Ngu yum. Tsô a kaa er: Á gema u á na sha ikev i tor u Babilon.

¹⁸Shi Yeremia kaa a tor Sedekia, er: M er u nyi, shin mbatomov ou, shin ior mban, man ne wuhum ken gaadii?

¹⁹Uprofeti enev, mba ve tsengeôron ne kwagh, ve kaan er: Tor u Babilon una va nôngo ityav a ven ga, shin hen tar ne kpaa ga la, mba han ahegene?

²⁰Shi ungwa ase hegen terem tor; m zamber, zamber wam a̱ gba u hen ikum, m de kera hidi ken ya u orngeren Yonatan la ga, sha er m̱ de za kpeen ker ga yô.

²¹Tsô tor Sedekia na zwa er ve̱ wa un ken tembe u mbakuran, man ve̱ naan un kpenbredi u duen hen ya u orkaanbredi ayange ayange, zan zan bredi u ken gar á bee cii. Kape Yeremia tema ken tembe u mbakuran la.