Read tiv Yeremia 46 Bible Online

Yeremia 46 - tiv bible

Yeremia 46

¹Kwaghôron u TER ne va hen profeti Yeremia sha kwagh u akuraior.

²Kwagh u Igipiti. Sha kwagh u mbautyav mba Farao-neko tor u Igipiti, mba ve lu hen kpe ifi u Uferati ken Karkemishi, mba Nebukadinesar tor u Babilon hemba ve ken inyom i sha unyiin i Yehoyakim wan u Yoshia, tor u Yuda la.

³Sôr nen akuva man perutya, kporom nen sha u nôngon ityav.

⁴Zer nen akeke sha anyinya, unde nen, ne mbahendan, due nen ken igbar a mbaakera enev, kile nen awange, a̱ engem, haa nen uriga mba iyôôv!

⁵Ka nyi man m nenge, ishima i nyian ve, ve gem ijime? Kwagh hemba ior vev mbataveryol, mba yevese je; ashe tsô kpaa ve gema ijime ga; mcieryol kase tser! Kape TER A kaa ne.

⁶Or u fefa fatyô u yevese ga, orageegh kpaa fatyô waren ga; ken imbusutarimese hen ifi u Uferati, ve nôngo gbev ve gbidye inya.

⁷Ka anti or nan moron iyol er ifi u Nil, u mngerem nam ma hor er uifi nahana?

⁸Igipiti ngu moron iyol er ifi u Nil nahan man mngerem nam ma hor er uifi nahan; ngu kaan er: Me mor, me cir tar cii me tim agar kua mba ve tem ken a cii!

⁹Kôr nen gbenda u yemen, ne anyinya; yevese nen sha agee, ne akekeautya; ior mba taver ayol ve̱ kôr gbenda ve̱ yem; ka Kushi man Puti mba ve hir perutya man Mbaludi mba ve fe u hendan ada.

¹⁰Gadia iyange i shon la, ka iyange i TER je, TER u akum a Sha; iyange i oron iyev sha u Una or iyev sha mbaihomov Nav; sanker una ya, una ide man una ma awambe a ve je á kuma un; gadia Ter, TER u akum a Sha ngu a nagh ku sôngon je, ken tar u Imbusutarimese, ken ifi u Uferati la.

¹¹Kôndo nen sha Gileadi, za tôô balsem, we iniunkwase, wankwase u Igipiti; u gba di ngeen a icimbiv anza kposo kposo gbilin tsô; man mwar ngu sha ci wou ga.

¹²Akuraior ungwa gwa u kunya wou, mliam ou mgbough sha tar cii, gadia ortaveryol nôngo gbev ta sha ortaveryol ugen, ve uhar cii, ve gbidye inya.

¹³Kwaghôron ne TER ôr a profeti Yeremia sha kwagh u Nebukadinesar tor u Babilon er una va una va tsaha tar u Igipiti yô.

¹⁴Pase nen kwagh ne ken Igipiti, yôô nen un ken Migedol. Een, yôô nen un ken Nofe man ken Tahapanheshi, kaa nen ner: Mough tile sha, wa ago iyol, gadia sanker wua ningir we tser.

¹⁵Er nan man i kar a mbaageev ou la kera? Ve tile ga gadia TER mgbegha ve kera.

¹⁶A na mbagenev kpishi ve nôngo gbev, ve ta sha ayol a ve, ve gbidye inya; ve kaa er: Mough nen, sé hide nen ken ior asev, ken tar u i mar se la, sé war nen sanker u aperagh ne.

¹⁷Ve genger imo keela, ve kaa er: Farao tor u Igipiti yô, ka ayôôso tseegh tsô; a de tso kar ihongo.

¹⁸Er M lu u uma ne, kape Tor A kaa ne, u i yer iti Na er, TER u akum a Sha la, or ngu van, nana lu er Tabor ken iwo yô, man er Karmel u hen kpezegemnger nahan.

¹⁹Kohol iyol u zan ken uikangen we wankwase u u tem ken tar u Igipiti, gadia Nofe hingir ice, á nande un kera, or á kera tema ken a na ga.

²⁰Igipiti ka tulebua u dedoo tsung je, kpa akughô va shin imbusutarimese, va haa sha a na.

²¹Mbautyav mba a er injar a ve la, mba ker atô na er uicighanmbaagumabua nahan; gadia ve kpaa ve na ijime, ve coon ayem imôngo, ve tile ga; gadia iyange i mtim ve gba sha a ve, ka iyange i mtsaha ve je la.

²²Iov na ngi er iov i iyô ka ia karen nahan; gadia mba kôndon a ikumutya, mba tan sha a na a azembe, er ka mba gberen ikon nahan.

²³Mba paan ikô na, kape TER A kaa ne, gadia ve ngee gande; gadia ve hemba ikomon ingeegh, á fatyô u ôron iyenge ve ga.

²⁴Wankwase u Igipiti hingir kwagh u aheenegh, i na un sha ikev i ior mba shin imbusutarimese.

²⁵TER u akum a Sha, Aôndo u Iserael, ngu kaan er: Nenge, Me tsaha Amon u No, man Farao, man Igipiti a mbaaôndo nav kua utor nav, ka Farao a mba ve suur sha a na la;

²⁶man shi Me gema ve Me na sha ikev i mba ve keren uma ve la, man sha ikev i Nebukadinesar tor u Babilon man sha ikev i mbayev nav; kpa ken masetyô la, ior shi vea tema ker, er sha ayange a tsuaa la nahan, kape TER A kaa ne.

²⁷Kpa we yô, de cie ga, wanakiriki Wam Yakob; ishima i̱ de nyian we ga, we Iserael, gadia nenge, Me yima u ken ica je, man vor wou kpaa ken tar u u lu uikangen ker la; Yakob una hide, ishima ia yôhôl un, una mem kpaa, ma or nana kera ta un mciem iyol ga.

²⁸We, Yakob wanakiriki Wam, de cie ga, kape TER A kaa ne; gadia M ngu a we; gadia Me tim akuraior cii, a M sambe u ken a la, kpa we yô, Me tim u cii ga, kpa Me tsaha u akuma akuma, Me gba den we nahan tsô ga.