Read tiv Ukwelegh 1 Bible Online

Ukwelegh 1 - tiv bible

Ukwelegh 1

¹Uwu! Nenge, gar a gbe teman gbilin, ma or kera ngu ker ga; gar u yan mgbough a ior ne; a hingir er kwasecôghol nahan, un u a lu kwagh u vesen ken akuraior! Un u a lu wan u tor u kwase ken uipaven mba taregh la, a hingir u tan kpandegh!

²Ngu vaan mliam tsung tugh, mliam nam ndôôr un sha ahenge; mba a doo ve ishima mbala cii, mo ve u surun un ishima ngu ga; akar a na cii tsugh un, ve hingir mbaihomov nav.

³I kura Yuda ken tar na kera sha ci u atsan, man sha ci u tom u kpan u tsung; a tema ken akuraior, a zua a mmem ga; mbazendan un mbala za kohol un ken ajiir a hogholoo.

⁴Igbenda i zan hen Shion ngi zungwen, sha ci u ma or kera ngu van hen iniongo i i ver la ga yô; ihindagar na cii hingir kuree; upristi nav mba shirin ishima; ishima vihi anuunaukase a na; un iyol na kpaa, ican ngi eren un tsung.

⁵Mbaahendanev nav hingir mba sha hemen, mbaihomov nav tema a mkpeyol; gadia TER er un ican sha ci u mngee u afer a na; i yem a mbayev nav uikangen sha ishigh ki orhendan.

⁶Icivir i wankwase u Shion cii i undu un; atiator a na cii hingir er ishôso i i zough a ijiir i yan toho ga yô, ve yevese a agee iyol shio sha ishigh ki ortôvon ve hwange.

⁷Sha ayange a atsan a na man ijende na i wue wue la Yerusalem umbur akaa a na a dedoo a a lu a mi sha ayange a tsuaa la; zum u ior nav gba sha ikev i orhendan, man ma or u wasen un lu ga la, mbaahendanev kenger un, ve nahan un tar sha mkur na u vihin la.

⁸Yerusalem er isholibo tsung je; nahan a hingir er kwagh u ndôhôrshima nahan; mba ve civir un ngise la, mba lahan un, sha ci u ve nenge idyelegh na; een, un iyol na kpaa ngu shirin ishima geman ishigh kera.

⁹Ihôngor na var un sha akondo; a umbur mkur na ga; nahan yô, mgbe na kpiligh iyol je; ngu a ma or u surun un ishima ga; TERE, nenge ican yam, gadia orihom kende iyol na sha!

¹⁰Orhendan naregh uwegh nagh sha akaa a na a dedoo cii; gadia a nenge er atôatyev nyôr ken ichighanjiir na la, u U yange wer, a̱ de nyer ken mkohol Wou ga yô.

¹¹Ior nav cii mba shirin ishima, mba keren kwaghyan; ve gema akaa a ve a dedoo, ve yam kwaghyan a mi, sha u taver uma ve. Nenge, TERE, nenge er m hingir kwagh u aheenegh yô.

¹²Ka ne ma kwagh ga, ne mba ne lu karen ne cii? Ver ashe, nenge nen, shin ma ican ngi er ican yam ne kpaou? i TER vam a mi sha iyange i iyugh Na i tsung la.

¹³Ka Sha, A tindi usu ken akuhe am ye, u hemba a kpaa. A wam kper angahar, A hide a mo ijime; A er i kondom iyol, m shi uren didi.

¹⁴A harem igbur i aferakaa am; uwegh Nagh tume a, ngam sha mon; a na agee am yina; TER nam sha ikev i mba m fatyô u hendan kwagh a ve ga yô.

¹⁵TER gema mbaageev av ker atô wam cii hingir gbilinkwagh: A lôhô iniongo sha u tan num sha a mo sha u timin ikaior yam; TER shoghol iniunkwase, wan u Yuda, ken ihungwa i shoghol atam a wain.

¹⁶Ka nahan man m lu vaan mliam ye; ashe am nga ndôôr mliam, sha ci u orsurunshima u una taver uma wam ngu ca a mo; ônov av kpaa kondo ve iyol sha ci u orihom hemba.

¹⁷Shion ngu naregh ave na, orsurun un ishima nan ngu ga; TER na zwa sha Yakob er, mba ve kase un cii ve̱ lu mbaahendanev nav; Yerusalem hingir ve er ka kwagh u hôngorough ken atô ve nahan.

¹⁸TER ka u perapera je, gadia m hendan a imo Na; shi ungwa nen, ne ior cii, nenge nen ican yam; anuunaukase am man ikaior yam, i yem a ve uikangen.

¹⁹M yila mba ve doom ishima la, kpa ve tsughum a tsugh; upristi man mbatamen av ve kpe ken gar, er ve lu keren kwaghyan sha u taver uuma vev yô.

²⁰Nenge, TERE, gadia ican tserem; myam am ma zômon; ishima ngi geman mo ken vanger; gadia m hendan sha apera. Ken won sanker ngu wuan, ken ya yô, gema ka ku.

²¹Mba ungwan ishimashirin yam; orsurun mo ishima nan ngu ga; mbaihomov av cii ve ungwa kwagh u a tserem yô; ve ember sha ci u U er nahan yô; Wea va a iyange i U yôô i la, nahan vea hingir er mo nahan.

²²Iferkwagh ve la cii, i̱ va U sha ishi; er a ve er U er a mo nahan, sha ci u atindi am a peren la cii. Gadia asema am a shirin nga kpishi, ishima yam kpaa ure.