Read tiv Esekiel 1 Bible Online

Esekiel 1 - tiv bible

Esekiel 1

¹Tsô sha inyom i sha ikundugber, uwer u sha unyiin, ayange a u ataan la, er m lu ken mbakwarev hen kpeifi u Cebar yô, i bugh Sha man m nenge mbampase mba Aôndo.

²Sha iyange i sha utaan i uwer la, ka inyom i sha utaan i ikangenev mbi tor Yehoyakin je la,

³kwaghôron u TER va hen pristi Esekiel, wan u Bushi, ken tar u Mbakaldi hen kpeifi u Cebar; uwegh ku TER lu sha a na heregh.

⁴Tsô m kenger yô, nenge, ahumbe a uragh lu duen shin imbusutarimese lu van, ibeenegh ki vesen a usu u haan vir vir gbem, man iengem kase ki tser; ker atô, ka ker atô u usu la, lu er iyôgh ki engem nahan.

⁵Ken atô u u la, kwagh due, lu er akaauma anyiin nahan. Ka mlu u a ne: a lu iyol er ka or nahan.

⁶Hanmô ve lu a ishiv inyiin, man hanmô ve kpaa lu a akper anyiin.

⁷Angahar a a lu jighilii, man akev a angahar a a lu er ka apande a wanbua nahan, engem er ka togula u i kil un yô.

⁸Ave a or gema lu ker akper a a sha avegher a a anyiin la. Ishiv mbi a man akper a a, a anyiin la cii lu nahan:

⁹akper a a zua ayol a a; zum u a yemen yô, a kahan ga; hanmô ve yemen ken hemen jighilii.

¹⁰Mlu u ishiv mbi a yô, lu er ka ishigh ki orough nahan; a anyiin la cii, lu a ishigh ki begha vegher u ken iyan; a anyiin la cii, lu a ishigh ki bua vegher u ken imese; man shi a anyiin la cii, shi lu a ishigh ki gafa.

¹¹A samber akper a a sha; hanmô lu a akper ahar a a za zua sha a agen la, man ahar di gema cir a ayol.

¹²Hanmô yemen ken hemen jighilii; henpe a gba Jijingi u zan cii, ka heregh a yemen ye; zum u a yemen yô, a kahan ga.

¹³Sha kwagh u mlu u akaauma ne yô, mluashe ve lu er akausu a enger nahan, er akagh a yeghen nahan; a lu zan hiden her atô u akaauma la; usu la wanger; ker atô u u kpaa inyiar lu duen.

¹⁴Akaauma la, lu nyôngoso zan hiden, bee er ka mlu u inyiar i ka i nyiar nahan.

¹⁵Tsô er m nenge akaauma shon la, m nenge ikaver môm lu shin inya hen akaauma la, sha ishiv mbi a anyiin la cii ser ser.

¹⁶Mlu u akaver la man m-er u i er a la, lu er iwen i kerisoliti nahan; mlu u a anyiin cii, lu inja i môm; mluashe u a, man m-er u i er a la, lu er ikaver ken atô u ikaver nahan.

¹⁷Zum u a zenden yô, a zaan avegher a anyiin la cii, a kahan shighe u a zenden la ga.

¹⁸Ajime a a, a a menger shin inya yô, a tav je man a cier iyol kpaa; ajime a a anyiin la cii mgbough a ashe ningir tser.

¹⁹Zum u akaauma la a yemen yô, akaver kpaa a zaan a a nongo; man zum u a kenden a akaauma la sha shin tar yô, akaver kpaa a kenden a sha.

²⁰Hanpe a gba Jijingi u zan cii, ka heregh a zaan ye, ka henpe a gba Jijingi u zan la cii; i kenden akaver a a imôngo, gadia jijingi u akaauma la lu ken akaver.

²¹Zum u a yemen yô, angan kpaa a yemen; man zum u a tilen yô, angan kpaa a tile; man zum u a kenden a sha shin tar yô, akaver kpaa a kende a a imôngo; gadia jijingi u akaauma lu ken akaver la.

²²Sha ityouv mbi akaauma la, kwagh lu er kwavaôndo nahan, engem er krusetalu u cier iyol nahan, samber a sha ityouv.

²³Kwavaôndo vegher u shin la, akper a a samber jighilii, kperegh môm ver ishigh sha kugenegh; hanmô lu a akper ahar a cirin iyol na ken ikum man ken ijime kpaa.

²⁴Zum u a lu yemen yô, m ungwa iov i akper a a er ka ihuran i mngerem ma vesen nahan, er ka imo i Uhembanagee, ka ihuran i ayôôso er ka iov i ikumutya nahan; zum u a tilen yô, a shir akper a a.

²⁵Imo due sha kwavaôndo u u lu a sha ityou la; zum u a tilen yô, a shir akper a a.

²⁶Sha kwavaôndo u u lu a sha ityou la, kwagh lu bee ikônough ki torough, lu er ka mluashe u iwen i safir nahan; man sha kwagh u a bee ikônough ki torough la, kwagh lu sha mi er ka mluashe u or nahan.

²⁷Man shi m nenge kwagh engem er iyôgh nahan; hii henpe lu er ka iwenge na la yem sha, lu er mluashe u usu nahan ningir tser; man shi hii henpe lu er ka iwenge na la yem shin lu er ka usu nahan, iwanger ningir tser.

²⁸Lu er mluashe u ikume ken ibeen sha iyange i ura u nee yô, kape mluashe u iengem i i kase i tser la, i lu la. Kape m-ande u mluashe u icivir i TER a lu la. Zum u m nenge a mi yô, m gba, m kuma ityough inya, man m ungwa imo i or, lu ôron kwagh.