Read tiv Esekiel 14 Bible Online

Esekiel 14 - tiv bible

Esekiel 14

¹Tsô mbagenev ken mbatamen mba Iserael va her a mo, ve va tema sha ishigh yagh.

²Nahan kwaghôron u TER va her a mo, er:

³Wan u or, ior mban nyôr a akombo a ve ken asema a ve, man ve ver kwagh u nan gbev mbu nôngon u iferkwagh ve sha ishigh vegh je; nahan Me rumun Mer, ve̱ pinem kwagh je kpa?

⁴Nahan yô, ôr ve kwagh, kaa a ve wer: Ter AÔNDO ngu kaan nahan er: Hanma or u ken ya u Iserael u nan nyer a akombo a nan ken ishima i nan man nan ver kwagh u nan gbev mbu nôngon u iferkwagh i nan sha ishigh ki nan, man nana va hen profeti yô, Mo TER Me kaa nan imo sha mi sha mngee u akombo a nan la;

⁵sha u Me kôr asema a ya u Iserael, gadia ve cii ve pav a Mo sha akombo a ve la.

⁶Nahan yô, kaa a ya u Iserael wer: Ter AÔNDO ngu kaan nahan er: Gema nen asema; gema nen, undu nen akombo a en, man gema nen ishigh kera, sha akaa a en a ndôhôrshima la cii.

⁷Gadia hanma or u Iserael, shin u ken ikurior igen i i lu shir ken Iserael, u nan pav a Mo, nan nyer a akombo a nan ken ishima i nan, shi nan ver kwagh u nan gbev mbu nôngon u iferkwagh i nan sha ishigh ki nan, man nana va hen profeti sha u nana pinem kwagh yô, Mo Ter Me kaa nan imo sha mi, Mo iyol yam je;

⁸Me ver ishigh sha orshon la, Me gema nan, nana hingir kwagh u kpilighyol man kwagh u veren ishor sha min. Me dugh nan ken atô u ior Av kera, man nea fa er Mo M lu TER ye.

⁹Aluer profeti shon la, nana rumun er i̱ bume nan, nana ôr kwagh yô, ka Mo TER M bum profeti la ye, Me naregh uwegh agh sha a nan, Me tim nan ken atô u ior Av Iserael kera.

¹⁰Vea ya mtsaha u sha iferkwagh ve la; iferkwagh i profeti la ia lu vough a i or u nan va pin kwagh la;

¹¹sha u ya u Iserael a̱ de kera tsumen undun Mo ga, man ve̱ de kera hôngor ayol a ve sha afer a ve cii la ga; kpa ve̱ hingir ior Av, Mo di kpaa Me hingir Aôndo ve, kape Ter AÔNDO A kaa ne.

¹²Kwaghôron u TER va her a mo, er:

¹³Wan u or, aluer ma tar ugen ua erem isholibo sha u gbihin mimi kera yô, man Me naregh uwegh Agh sha u, Me vihi kwaghyan u ve suur sha mi la kera, man Me tindi u a ijen, man Me wua or man zendenya ken u kera yô,

¹⁴shin er ior mba utar mban: Noa man Daniel man Yobu vea lu ken u kpaa, ka ve tseegh ma ve yem uma ve sha perapera ve ye, kape Ter AÔNDO A kaa ne.

¹⁵Aluer Me na inyamikume ia zende ken tar la, man ia wua ior ken, u zan zan ua hingir ice, man ma or nana fatyô u karen ken u ga sha ci u inyamikume la yô,

¹⁶shin er ior mba utar mban vea lu ken u nahan kpaa, er M lu u uma ne, kape Ter AÔNDO A kaa ne, ma ve yom ônov mba nomso shin mba kasev kpaa ga; ka ve tseegh ma ve wer ye, kpa tar la yô, ua hingir ice.

¹⁷Shin aluer Me va a sanker sha tar shon la, Me kaa Mer: Sanker, za kar ken tar shon, zan zan M̱ wua or man zendenya cii ken u kera yô,

¹⁸shin er ior mba utar mban vea lu ken u kpaa, er M lu u uma ne, kape Ter AÔNDO A kaa ne, ma ve yom ônov mba nomso shin mba kasev kpaa ga, saa ayol a ve tseegh ma ve wer ye.

¹⁹Shin aluer Me tindi bouange ken tar shon la, man Me haa u iyugh Yam sha awambe, sha u wuan or man zendenya cii ken u kera yô,

²⁰shin er Noa man Daniel man Yobu vea lu ken u kpaa, er M lu u uma ne, kape Ter AÔNDO A kaa ne, ma ve yem wan u nomso shin u kwase kpaa ga, saa uma ve tseegh, ma ve yem un sha perapera ve ye.

²¹Gadia Ter AÔNDO ngu kaan nahan er: Man hire Mea tindi ajir a ôron a Am a anyiin a bo sha Yerusalem, ka sanker man ijen man inyamikume man bouange, sha u wuan or kua zendenya kera ciili!

²²Nahan kpaa, nenge, á undu asande ker a á due a a la, ka mbayev mba nomso man mba kasev; nenge, vea due vea va her a ven, man nea nenge gbenda ve man aeren a ve; man á sur ne asema sha kwaghbo u M ve a mi sha Yerusalem la, akaa a M ve un a mi la cii.

²³Nahan vea sur ne ishima, zum u né nenge gbenda ve man aeren a ve yô; nahan nea fa er M gbe eren un akaa ne cii gbilin ga ye, kape Ter AÔNDO A kaa ne.