Read tiv Esekiel 16 Bible Online

Esekiel 16 - tiv bible

Esekiel 16

²Wan u or, pase Yerusalem aeren a na ndôhôrshima la,

³kaa a na wer: Ter AÔNDO ngu kaan a Yerusalem nahan er: Mdugh wou man mmar wou ka ken tar u Kanaan, teru ka Oramor man ngôu ka kwase u Hiti.

⁴Sha kwagh u mmar wou yô, sha iyange i i mar u la, i tôndo u tsombo ga, man i ôô u iyol sha mnger sha u wanger we ga; bar kpaa i shighe u iyol ga, man shi i wa u ken ikondo kpaa ga.

⁵Ma ishe zungwe u mhôônom sha u eren we akaa angan, sha mhôônom ma zungwen ga; kpa i ta u kera ken ikôngo, gadia i nyagh u sha iyange i i mar u la je.

⁶Er M kar her a we, M nenge u lu nôngon ken awambe a ou yô, M kaa a we ken awambe a ou, Mer: Lu uma; een, M kaa a we ken awambe ou, Mer: Lu uma.

⁷M er u, u ngee iyenge er imendenev mbi ken toho nahan, u vese, u tav, u hia, u va atumba, ice you kpaa mende; nahan kpaa u lu idyelegh deleghee.

⁸Nahan zum u M kar her a we, man M kenger we yô, nenge, shighe wou u doon ishima kuma; nahan M haa u riga wam iyol, M cir u idyelegh wou; een, M bum a we man M tôndo zwa a we, kape Ter AÔNDO A kaa ne, nahan u hingir u Wam.

⁹Nahan M ôô u sha mnger, M ôô awambe a ou kera purututu, man M shighe u mkurem.

¹⁰M cir u ikondo i hwe iyol, M wa u akôvangahar a sha ikôvough ki ayu man M zer u ikondo i lugh lugh man M haa u ikondo i shiliti iyol.

¹¹M er u hwe anza kposo kposo, M wa u ahye sha ave man ishirigh sha mon.

¹²M wa u kunya sha ihinga, man asa ken ato, man idyer i tor i doon ashe sha ityou kpaa.

¹³Kape i er u hwe sha zenaria man azurfa ne; akondo a ou kpaa lu sha ikondo i lugh lugh man shiliti man tom u sha hwe; u ya mwem ma kengese man iyough man mkurem; u hingir dedoo tsung mimi je, u zua a mkpeyol zan zan ar sha mlu u tor.

¹⁴Iti you za gwa ken akuraior sha ci u mdooashe wou; gadia a iv, sha mkendesha Wam u M kende u yô; kape Ter AÔNDO A kaa ne.

¹⁵Kpa u suur sha mdooashe wou, man u er idya sha ci u gwa u iti you la, u haa ijimba you sha hanma or u karen cii, i hingir i nan.

¹⁶U pande akondo a ou, u er ajiir a taven sha, a lun a hwe anza kposo kposo, u er idya sha a; ambaakaa angan vande lun ga, man shi doo u aa va lu nahan kpaa ga.

¹⁷Man shi u tôô ikav you mbi hweev mbi sha zenaria Wam man sha azurfa Wam mbi M ne u yô, u er ieev mbi nomso a mi, u er idya sha mi.

¹⁸U tôô akondo a ou a sha hwe, u cir mbi iyol, man u ver mkurem Am man kwaghhumandoon Wam sha ishiv mbi mbi.

¹⁹Kwaghyan Wam u M ne u kpaa, mwem ma kengese ma m koso u sha mi kua mkurem man iyough, u ver mbi sha ishi sha ci u ihuma i dedoo; kape i lu la, kape Ter AÔNDO A kaa ne.

²⁰Man shi ônov ou mba nomso man mba kasev, mba u marem la, u gema ve u na mbi nagh a mi, sha u ve̱ hingir kwaghyan u mbi. Idya you la, ka kwagh u kiriki,

²¹er shi u gem u woo ônov Av, u ne ve, i̱ nande ve sha usu sha ci u mbi?

²²Ken akaa a ou a ndôhôrshima cii man ijimba you i eren la, u kera umbur ayange a iyev ou ga, zum u u lu idyelegh deleghee, u lu nôngon ken awambe ou la.

²³Tsô ken masetyô u iferkwagh you cii yô, uwu! Kwagh á tser u! Kape Ter AÔNDO A kaa ne.

²⁴U maa iyou i sha man u er ijiir i taven sha, sha hanma tembe.

²⁵U maa ijiir i taven sha sha hanma akahar a igbenda cii, man u gema mdooashe wou, hingir kwagh u ndôhôrshima, man u na iyol you hen hanma or u karen, u seer idya you.

²⁶U er idya a Mbaigipiti kpaa, mba wan ndor a we, mba ve mgbough a asaren a bo; u seer idya you sha ci u bamen Mo.

²⁷Nahan nenge, M naregh uwegh Agh sha a we, M pande kwaghyan wou, M gema u, M na u sha ikev i mba ve ker u ihom la, ka ônkasev mba Mbafiliti, mba kunya u ker ve sha ci u aeren a ou a ijimbagh la.

²⁸U er idya a Mbaashiria kpaa, gadia isharen you i bee ga; een, u er idya a ve, nahan kpaa kuma u ga.

²⁹Man shi u seer idya you zan zan ar ken tar u ior mba zenden kpenga, ka ken Kaldia je la; nahan kpaa kuma u sha i ga.

³⁰Isharen ngohol we ishima cii, kape Ter AÔNDO A kaa ne, er u eren akaa angan cii yô, ka tom u idyakwase u lun a kunya ga;

³¹gadia u maan iyou you i sha, sha akahar a igbenda cii, man u er ijiir i taven sha sha hanma tembe; nahan kpaa u er er idyakwase nahan ga, gadia u laha inyaregh.

³²Kwase u eren idya u nan nyer a mbavannya er nan lu a nom u nan her je!

³³Mba ne uidyambakasev cii iwua, kpa we yô, u gema u ne mbadoon we ishima cii iwua, u ulugh ve sha i, sha u ve̱ va her a we hanma ian sha ci u idya you.

³⁴Inja you ngi kposo a kasev mbagenev sha idya you i eren la, gadia ma or keren we sha u eren idya a we ga; man shi u kimbin inyaregh, kpa we yô, mba kimbin we ga, kape u lu kposo je ne.

³⁵Nahan yô, we idyakwase, ungwa kwaghôron u TER;

³⁶Ter AÔNDO ngu kaan nahan er: Sha ci u kunya wou due ken igbar, man i bugh idyelegh wou sha idya you i eren a mbadoon we ishima la, man sha ci u akombo ou a ndôhôrshima la cii, man sha ci u awambe a mbayev ou mba u ne a la,

³⁷sha ci u nahan yô, nenge, Me kohol mbadoon we ishima cii mba u doo ve yum la, man mba ve doo u cii, kua mba u ker ve ihom la kpaa; Me kohol ve sha hanma vegher, Me va a ve her a we, Me pase ve idyelegh wou, sha u ve̱ nenge idyelegh wou cii ken igbar.

³⁸Me ôr u imbajir i ka i ôr kasev mba ve vihi ityendezwa i ivôson sha idya la, man i mba ve hee awambe la, Me va a awambe a iyugh man iwuhe sha a we.

³⁹Me gema u Me na sha ikev ve, vea yôhôl iyou you i sha man vea vihi ajiir a ou a taven sha la, man vea er akondo a ou kera, vea ngohol akaa ou a hweegh la, vea undu u idyelegh deleghee.

⁴⁰Vea kohol ikpelaior sha a we kpaa, vea ta u awen, man vea kuma u sha usanker vev.

⁴¹Vea nande ayou a ou sha usu, vea ôr u ijir, vea tsaha u sha ishigh ki kasev kpishi; nahan Me na ú de idya, man shi ú kera kimbi inyaregh ki idyakwase kpaa ga.

⁴²Ka nahan man Me na ishimavihin Yam i sha a we la ia mem ye, iwuhe Yam kpaa ia pav a we, nahan Me mem, Me kera seer u yuwen ga.

⁴³Sha ci u u umbur ayange a iyev ou ga, man u bamem sha akaa angan cii, sha ci u nahan yô, nenge, Mo kpaa me hire u a aeren a ou sha ityough you, kape Ter AÔNDO A kaa ne. U er ijimba u seer sha akaa a ou a ndôhôrshima cii la gaa?

⁴⁴Nenge, hanma or u nan er kwagh sha anzaakaa, nana ôr injakwagh ne sha a we, er: Er ngô a lu nahan, kape wan na u kwase kpaa a lu je ne:

⁴⁵U ngu wankwase u ngôu je, u a nyagh nom na man ônov nav; man u ngu anngô u kwase, u anngôôv ou mba kasev, mba ve nyagh noov vev man ônov vev; ngôu lu kwase u Hiti man teru lu Oramor.

⁴⁶Wanngôu u tamen u kwase ka Samaria, u a tema ken uwegh ough ku imesegh la, un a ônov nav mba kasev; man anngôu u kiriki u kwase, u a tema ken uwegh ough ku yanegh la, ka Sodom ma ônov nav mba kasev.

⁴⁷Nahan kpaa, u zenden sha igbenda ve ga, man u er sha akaa a ve a ndôhôrshima kpaa ga; ica gba ga tsô u hemba eren dang a ve sha igbenda you cii.

⁴⁸Er M lu u uma ne, kape Ter AÔNDO A kaa ne: Sodom anngôu u kwase man ônov nav mba kasev, ve er er we man ônov ou mba kasev ne er nahan, ga.

⁴⁹Nenge, ka iferkwagh i anngôu u kwase, Sodom ne: iyolgengese, u iden sha kwaghyan, man u lun ken mkpeyol bem bem a ônov nav mba kasev cii; man shi a wase mbaatsanev man mbaibanave ga.

⁵⁰Ve manger man ve er kwagh u ndôhôrshima sha ishigh Yagh, nahan M kar a ve kera, zum u M nenge nahan la.

⁵¹Samaria je kpaa er vegher u isholibo you tsô kpaa ga; kpa u er akaa a ndôhôrshima hemba a ve, je u na anngôôv ou mba kasev hingir er ka mbaishôôv sha akaa a ou a ndôhôrshima a u er la cii.

⁵²We kpaa, ya ase kunya wou, sha ci u u pande ibo i anngôôv ou mba kasev; sha asorabo a ou a u er, a a hemba ndôhôr ishima a a ve la, ve hemba u perapera. Nahan we kpaa va ahenge, ya kunya wou, sha er u ne anngôôv ou mba kasev ve hingir er ka mbaishôôv yô.

⁵³Me dugh a ve ken kwar, ka kwar u Sodom man ônov nav mba kasev, man kwar u Samaria man ônov nav mba kasev, man kwar u mbakwarev ou ken atô ve;

⁵⁴sha u u̱ ya kunya wou man u̱ va ahenge sha akaa a u er la cii, a a hingir ve kwagh u surun ishima yô.

⁵⁵Anngôôv ou mba kasev, Sodom man ônov nav mba kasev, vea hide sha mlu ve u tsuaa la, man Samaria man ônov nav mba kasev kpaa, vea hide sha mlu ve u tsuaa la; we di a ônov ou mba kasev kpaa nea hide sha mlu wen u tsuaa la.

⁵⁶Gadia u ôr kwagh, u ter anngôu u kwase Sodom sha ayange a ou a tan ihagh

⁵⁷zum u i lu a pase iferkwagh you ken igbar ga la, ga; man ahegen yô, u hingir kwagh u nahantar hen ônkasev mba Shiria man mba ve kase un la cii, kua ônkasev mba Mbafiliti, mba ve hee u hanma ian yô.

⁵⁸U tôô ibo i ijimba you man akaa a ou a ndôhôrshima, kape TER Akaa ne.

⁵⁹Gadia Ter AÔNDO ngu kaan nahan er: Me er a we sha ieren you la, we u u lahan mbum u vihi ikuryan ne.

⁶⁰Nahan kpaa, Me umbur ikuryan Yam a we sha ayange a iyev ou la, man shi Me ya ikur i tsôron a we.

⁶¹Nahan wea umbur igbenda you man ú va ahenge, zum u ú ngohol anngôôv ou mba kasev, anngôôv ou mbatamen man mba kiriki la, Me gema ve me na u, vea hingir ônov ou mba kasev, kpa á lu sha ikuryan i i ya a we la ga.

⁶²Me taver ikuryan a we, nahan ú fa er Mo M lu TER yô,

⁶³sha u u̱ umbur man u̱ va ahenge, man u̱ kera seer u bughun zwa wou ga, sha ci u kunya wou, zum u M de u akaa a ou a u er cii yô, kape Ter AÔNDO A kaa ne.