Read tiv Esekiel 20 Bible Online

Esekiel 20 - tiv bible

Esekiel 20

¹Tsô sha inyom i sha utaankaruhar uwer u sha utaan, ayange a u pue la, mbatamen mba Iserael mbagenev va sha u va pinen TER kwagh, ve va tema sha ishigh yagh.

²Nahan kwaghôron u TER va her a mo, er:

³Wan u or, ôr kwagh a mbatamen mba Iserael kaa a ve wer: Ter AÔNDO ngu kaan nahan er: Ne va u va pinen Mo kwagha? Er M lu u uma ne, kape Ter AÔNDO A kaa ne: M rumun ne u pinen Mo kwagh ga.

⁴Ú ôr ve ijir, we wan u or, ú ôr ve ijiri? Yô, pase ve aeren a uter vev a ndôhôrshima la, ve̱ fa;

⁵man shi kaa a ve wer: Ter AÔNDO ngu kaan nahan er: Iyange i M tsuwa Iserael la, M bum a tsombor u ya u Yakob, man M pase iyol Yam her a ve ken tar u Igipiti, M bum a ve, Mer: Mo M ngu TER, Aôndo wen.

⁶Sha iyange la je M bum a ve Mer: Me due a ve ken tar u Igipiti, Me va a ve ken tar u lu M tsuwa sha ci ve la, tar u dumbur a atumba man iyough, u hemba ityar igen cii mdoom.

⁷M kaa a ve Mer: Hanma or ker a ven, nana̱ haa akaa a ndôhôrshima a sha ashe a nan kera, man de kera hôngor nen ayol a en sha akombo a Igipiti ga, ka Mo M lu TER, Aôndo wen.

⁸Kpa ve hendan a Mo, ve rumun u ungwan imo Yam ga; or môm haa akaa a ndôhôrshima a sha ashe a nan la kera ga, man ve undu akombo a Igipiti kpaa ga; nahan M kaa Mer: Me haa iyugh Yam sha a ve sha u kuren ishima i vihin Yam sha a ve jimin cii, ker atô u tar u Igipiti je.

⁹Kpa M er kwagh sha ci u icivir i iti Yam, sha u i̱ de kera hôngor a i sha ashe a a akuraior, henpe ve tem la, ga; ka sha ashe a M pase iyol Yam her a ve, er M due a ve ken tar u Igipiti la.

¹⁰Nahan M due a ve ken tar u Igipiti, M va a ve ken desereti.

¹¹M na ve akaawan a Am man M tese ve akaaôron a Am a jirigh, a or nana er sha mi man nana lu uma yô.

¹²Man shi M na ve ayange a memen a Am sha u a̱ lu ikav her atô Wam a ve, sha u ve̱ fa er Mo TER M tsegh ve yô.

¹³Kpa ya u Iserael hendan a Mo ken desereti, ve zende sha akaawan a Am ga man ve venda akaaôron a Am a jirigh a or nana̱ er sha mi man nana lu uma yô; ve vihi ayange a memen a Am tsung je, nahan M kaa Mer, Me haa ishima Yam i vihin sha a ve ken desereti, sha u timin ve.

¹⁴Kpa M er kwagh ne sha ci u icivir i iti Yam sha u i̱ de kera hôngor a i sha ashe a akuraior, a a lu nengen zum u M due a ve la, ga.

¹⁵Man shi M bum a ve ken desereti, Mer: Me kera va a ve ken tar u M na ve la ga, tar u u dumbur a atumbabua man iyough, u u hembe ityar igen cii mdoom la,

¹⁶sha ci u ve venda akaaôron a Am a jirigh, man ve zende sha akaawan a Am ga, man ve hôngor a ayange a memen a Am, gadia asema a ve lu zan sha akombo a ve la.

¹⁷Nahan kpaa, ashe Am zungwe ve mhôônom, M tim ve kera ga, M tim ve ken desereti kpaa ga.

¹⁸Shi M kaa a ônov vev ken desereti Mer: De kera zenden nen ken akaawan a uter enev ga, man shi de kera waan nen akaaôron a jirigh a ve iko ga, man shi de kera hôngor nen ayol a en sha akombo a ve kpaa ga.

¹⁹Mo M ngu TER, Aôndo wen; zenden nen ken akaawan a Am, waan nen akaaôron a Am a jirigh iko, man eren nen sha mi kpaa;

²⁰tseghan nen ayange a memen a Am nahan aa hingir ikav her atô Wam a ven, sha er ne̱ fa er Mo M lu TER, Aôndo wen, yô.

²¹Nahan kpaa ônov mbala hendan a Mo, ve zende sha akaawan a Am ga, man ve wa akaaôron a Am a jirigh iko sha u vea er sha mi kpaa ga, a or nana er sha mi, man nana lu uma yô; ve hôngor a ayange a memen a Am; nahan M kaa Mer, Me haa iyugh Yam sha a ve, sha u kuren ishimavihin Yam jimin cii sha a ve ken desereti.

²²Nahan kpaa M hide a uwegh Agh ijime man M er kwagh sha ci u icivir i iti Yam, sha u i̱ de hôngor a i sha ashe a akuraior, a a lu nengen zum u M due a ve la, ga.

²³M gema M bum a ve ken desereti, Mer: Me sambe ve ken akuraior, man Me tsenda ve sha ityar ityar;

²⁴sha ci u ve er sha akaaôron a Am a jirigh ga, kpa ve venda akaawan a Am, man ve hôngor a ayange a memen a Am man ashe ve lu sha akombo a uter vev.

²⁵Nahan Mo kpaa M na ve akaawan a doon ga, man akaaôron a jirigh a vea lu uma sha a ga yô;

²⁶man M hôngor a ve sha iniav vev mbi nan er ve̱ na ônov vev mba iundav u karen ken usu, sha er M̱ vihi ve kera man ve̱ fa er Mo M lu TER ye.

²⁷Sha ci u nahan yô, we wan u or, ôr kwagh a ya u Iserael, kaa a ve wer: Ter AÔNDO ngu kaan nahan er: Shi sha kwagh ne kpaa uter enev laham er ve gbihi mimi ve kera yô.

²⁸Gadia zum u M va a ve ken tar, u M bum a ve Mer, Me na ve la, ve gema ve nengen hanma igungu u taven man hanma kon u lun a mure, ka heregh ve na iniav vev mbi sôngon, man ka heregh ve na iniav vev mbi nan ishimavihin; shi ka heregh kpaa ve we kwaghhumandoon ve, man ve toon iniav vev mbi man ye.

²⁹Nahan M kaa a ve Mer: Inja i ijiir i taven sha i ne ze her la er nana? Ka nahan man i yer i iti er Bama (ijiir i taven sha) zan zan nyian ye.

³⁰Nahan yô, kaa a ya u Iserael wer: Ter AÔNDO ngu kaan nahan er: Né hôngor ayol a en sha aeren a uter eneve? Né er idya né dondo akaa a ve a ndôhôrshima laa?

³¹Sha iniav enev mbi ne na, er ne na ônov enev mba nomso u karen ken usu yô, ne mba hôngor a ayol a en sha akombo a en cii zan zan nyian, nahan kpaa shi Me rumun Mer, pinem nen kwagha, we ya u Iseraele? Er M lu u uma ne, kape Ter AÔNDO A kaa ne, M rumun ne u pinen Mo kwagh ga;

³²man kwagh u ne lu henen la kpaa una er je ga; u ne kaa ner: Sé lu nen er akuraior nahan, er uipaven mba ior mba icombor i sha won yô, sha u civir kon man iwen.

³³Er M lu u uma ne, kape Ter AÔNDO A kaa ne, mimi je, ka sha uwegh ku ageegh, man sha uwegh ku naregh, man sha iyugh i haan, Me tema tor sha ven.

³⁴Me due a ven ken akuraior, Me kohol ne ken ityar i ne sambe la, sha uwegh ku ageegh, man sha uwegh ku naregh, man sha iyugh i haan;

³⁵Me va a ven ken desereti u akuraior, ka keela Me ôr ne ijir ishigh a ishigh ye.

³⁶Er lu M ôr uter enev ijir ken desereti u tar u Igipiti nahan, kape Me ôr ne ijir je la, kape Ter AÔNDO A kaa ne.

³⁷Me er ne né kar shin atô u gbo, Me nyôr a ven ken mkange u ikuryan;

³⁸man Me yegher mbahendan kwagh ker atô wen kera kua Mbaperen atindi a Am kpaa; Me due a ve ken tar u ve lu shir ker la, kpa vea nyôr ken tar u Iserael ga, man nea fa er Mo M lu TER ye.

³⁹Sha kwagh wen yô, we ya u Iserael, kape Ter AÔNDO A kaa ne: Yem, hanma or nana̱ gba za civir akombo a nan tsô; kpa ken masetyô yô, nea ver ato her a Mo, man nea kera hôngor a iti Yam i tseghan sha iniav yenev man akombo a en ga.

⁴⁰Gadia sha uwo Wam u tseghan, sha uwo u taven u Iserael, kape Ter AÔNDO A kaa ne, ka keela ya u Iserael cii, vea civir Mo ken tar la; ka keela Me rumun ve, man ka keela kpaa Me ker iniav yenev, man iwua yen i sha iyiav mbi tsutswa, a akaa a en a tseghan cii.

⁴¹Er ka kwaghhumandoon nahan, kape Me rumun ne, zum u Me due a ven ken akuraior, man Me kohol ne ken ityar i i sambe ne ker la; man Me pase mtsegh Wam ken a ven sha ashe a akuraior.

⁴²Nahan nea fa er Mo M lu TER yô, zum u Me va a ven ken tar u Iserael, ken tar u M bum Mer, Me na uter enev la.

⁴³Ka keela nea umbur igbenda yen man aeren a en cii, a ne lu hôngor ayol a en sha mi la ye; kwagh wen una ndôhôrshima sha ci u afer a en cii a ne er yô.

⁴⁴Nea fa er Mo M lu TER, zum u M er a ven nahan sha ci u iti Yam yô, Me kera er a ven sha igbenda yen i ifer la ga, man sha aeren a en a dang la kpaa ga, we ya u Iserael, kape Ter AÔNDO A kaa ne.

⁴⁵Shi kwaghôron u TER va her a mo er:

⁴⁶Wan u or, ver ishigh you shin imbusutariyan, ôr kwagh sha imbusutariyan; ôr kwaghôron u profeti sha ikô i imbusutariyan la;

⁴⁷kaa a ikô i ken imbusutariyan wer: Ungwa kwaghôron u TER; Ter AÔNDO ngu kaan nahan er: Nenge, Me keer usu ken a we, ua hia hanma kon u ndor ken a we, man hanma kon u ombor kpaa; usu u yeghen gam gam la, ua pir ga, ua anger ishiv cii, hii ken imbusutariyan zan zan za ar ken imbusutarimese.

⁴⁸Uumace cii vea nenge er i lu Mo TER M keer u yô; ua pir ga.

⁴⁹Tsô m kaa mer: Kpei! Tere, AÔNDO! Mba teren mo er: Kera ka or u ôron kwagh sha anzaakaa tsô gaa?