Read tiv Esekiel 23 Bible Online

Esekiel 23 - tiv bible

Esekiel 23

¹Tsô kwaghôron u TER shi va her a mo er:

²Wan u or, yan kasev lu uhar, ve lu ônov mba kwase môm;

³Ve er idya ken Igipiti; ve er idya shighe u ve lu iyev la je; ka keregh i kighir ve atumba ye, man shi ka keregh kpaa i bende ve atumba a iniun ve la ave ye.

⁴Ati a ve lu Ohola, ka u vesen je la, man Oholiba anngô na u kwase; ve hingir mba Av man ve mar ônov mba nomso man mba kasev. Sha kwagh u ati ve yô, Samaria ka Ohola, man Yerusalem gema ka Oholiba.

⁵Nahan Ohola er idya zum u a lu u Wam la je, ishima na gema var sha mba ve doo un ishima la, ka Mbaashiria je la, mbautyav

⁶mba haan akondo a kwel, ugomna man mbatarev, ve cii ka ikaior i kuman ashe, mbaanyinyav mba hendan anyinya.

⁷A gema uidya nav a na ve, ve cii ka uicuwanmbaiorov mba Ashiria; man mba ishima na i var a ve la, a hôngor iyol na sha akombo a ve cii.

⁸Hii sha ayange a Igipiti la je a undu ijimba na ga; er a lu iyev la je, ve yav a na man ve bende atumba a iniun na; ve gema ijimba ve la ve haa sha a na.

⁹Nahan yô, M na un sha ikev i mba ve doon un ishima la, ka sha ikev i Mbaashiria je la, mba ishima na i var a ve la.

¹⁰Mban bugh idyelegh na; ve tôô ônov nav mba nomso man mba kasev, man un iyol na kpaa ve wua un sha sanker; a hingir kasev kwagh u eren ishor a min; gadia ve ôr un ijir, ve tsaha un.

¹¹Anngô na u kwase, Oholiba, a nenge kwagh ne, nahan kpaa, a hôngor iyol na sha isharen na hemba ngula, a er idya hemba idya i anngô na la kpaa.

¹²Ishima na var a Mbaashiria: ugomna man mbatarev, mbautyav mba ve hee akondo a dedoo, mbaanyinyav mba hendan anyinya, ve cii ka ikaior i kuman ashe.

¹³Tsô m nenge a hôngor; ve uhar cii ve za gbenda môm je.

¹⁴A shi a seer idya na kpaa, gadia a nenge ior mba i kpel foto ve sha kpekpe, foto u Mbakaldi, mba i kper ve sha icigh ki nyian bong;

¹⁵ve zer ikange shin iwenge, a atsar a kenden icombo sha ityouv vev; ve cii ve lu er ka utor nahan, bee ior i Babilon ken Kaldia, tar u i mar ve ker la.

¹⁶Er a nenge ve la je, ishima na var a ve, nahan a tindi mbatyomov her a ve ken Kaldia.

¹⁷Tsô Mbababilon va her a na sha gambe u dooshima, ve hôngor a na sha idya ve; a hôngor a ve, tsô ve due un ishima.

¹⁸Zum u a due a idya na ken igbar man a bugh idyelegh na la, nahan a duem ishima, er anngô na u kwase lu duem ishima nahan.

¹⁹Nahan kpaa a seer idya na, er a umbur ayange a iyev na a a lu eren idya ken tar u Igipiti la yô.

²⁰Ishima na kpaa var a mba lu ve doo un ishima la, mba ve mgbough a asaren a bo er ujaki nahan, man asaren a iyolough a ve a lu er a anyinya nahan.

²¹Kape u umbur idya i iyev ou ne, zum u Mbaigipiti bende atumba a ou ave la, man ve kighir atumba a iyev ou la.

²²Nahan, we Oholiba, Ter AÔNDO ngu kaan nahan er: Nenge, Me na mba ve doo u ishima la vea ta num sha a we, ve mba ve dugh u ishima la, Me va a ve sha u ve̱ va ta num sha a we sha hanma vegher cii:

²³Mbababilon man Mbakaldi cii, Pekodi man Shoa man Koa, kua Mbaashiria cii a ve imôngo; mbayevikaior mba kuman ashe, ugomna man mbatarev, ve cii ka utor man mbaajiriv, ve cii mba ve hendan anyinya.

²⁴Vea ta num sha a we a akekeautya man akaver man a akuraior kpishi, vea kase u sha utya a iper man mbaakuva man ader a iyôô, á tser; man Me gema ijirôron Me na ve, vea ôr u ijir sha inja i ajir a ve a ôron.

²⁵Me tese iwuhe Yam sha a we, vea er a we sha ishima i vihin; vea tôndo u ihinga man ato; asande a ou a a shi her, á wua a sha sanker, vea kura ônov ou mba nomso man mba kasev; asande a ou a a shi her la usu ua hia a.

²⁶Vea er u akondo kpaa, man vea kura ikav you mbi hweev mbi doon.

²⁷Kape Me na ijimba you la ia bee her a we, man idya you i i dugh ken tar u Igipiti la, nahan ú kera kende ashe sha a ve ga, man ú kera umbur Igipiti kpaa ga.

²⁸Gadia Ter AÔNDO ngu kaan nahan er: Nenge, Me na u sha ikev i mba u ker ve ihom la, sha ikev i mba ve dugh u ishima la;

²⁹vea er a we sha ihom, man vea kura kwagh u u ye ican sha mi cii, vea undu u idyelegh deleghee; á pase idyelegh u ijimba you ken igbar, ka ijimba you cii kua idya you kpaa.

³⁰Akaa angan á er u, sha ci u u eren idya a akuraior, man sha ci u u hôngor sha akombo a ve kpaa.

³¹U zende sha gbenda u anngôu u kwase; nahan yô, Me na iyongo na sha uwegh ough.

³²Ter AÔNDO ngu kaan nahan er: Ú ma iyongo i anngôu u kwase, i tumuu man i gbanger kpaa; á se u ibumegh, á hee u kpaa, gadia i iv gbing gbing.

³³Ú iv a ihundugh man ishima i vihin; iyongo i cieryol man i mtim, ka iyongo i anngôu Samaria la.

³⁴Ú ma i ndeera, ú tam avur a i kpaa, man ú ande atumba a ou; gadia Mo M kaa nahan ye, kape Ter AÔNDO A kaa ne.

³⁵Nahan yô, Ter AÔNDO ngu kaan nahan er: Sha ci u Mo M hungul we man u tam kera ken ijime you, yô, tôô ase ibo i ijimba you man idya you.

³⁶TER shi kaa a mo er: We wan u or, ú ôr Ohola man Oholiba ijiri? Yô, pase ve akaa a ve a ndôhôrshima la!

³⁷Gadia ve er idya, man awambe nga ve sha ave; ve er idya sha akombo a ve; man ônov vev mba nomso mba ve marem kpaa ve gema ve ve na a, hingir kwaghyan u a.

³⁸Man shi kwagh ne kpaa ve erem: ve hôngor a icighanjiir Wam sha iyange shon i môm, man ve vihi ayange a memen Am.

³⁹Gadia shighe u ve wua mbayev vev sha akombo a ve la je, ve va ken icighanjiir Wam sha iyange la je sha u hôngor un; yô, nenge, kape ve er ken atô u ya Wam ne.

⁴⁰Man shi ve tindi er i̱ za va ve a ior mba ve dugh ca; i tindi ortyom her a ve, man nenge, ve va ve; ka sha ci ve u ôô iyol u wa tojir sha ashe, man u wuha iyol sha ikav mbi hweev ye;

⁴¹u tema sha gambe u icivirigh, a tebul u i ser sha hemen na, u penda kwaghhumandoon Wam man mkurem Am sha mi.

⁴²Imo i ikpelaior lu a na saan saan; seer sha mbainjaav ga, i va a mbahundenmsôrom ken desereti; ve wa ve mbaagba sha ave man shi ve kange ve atsar a hweegh sha ityou.

⁴³Tsô M ter un u a bee iyol sha idya na la Mer: Un je kpaa a shi a er idya a na?

⁴⁴Tsô ve nyôr hen a na er ka ve nyôr ken agbaga nahan; kape ve nyer hen Ohola man Oholiba, kasev mba ijimbav la.

⁴⁵Ior mba perapera vea ôr ve ijir i udyambakasev man ijir i kasev mba haan awambe a ior inya; sha ci u ve mba udyambakasev, man awambe nga ve sha ave.

⁴⁶Gadia Ter AÔNDO ngu kaan nahan er: Va a ikpelaior i tan num sha a ve, ve̱ gema ve, ve̱ hingir kwagh u cieryol man ishar.

⁴⁷Ikpelaior ne ia ta ve awen man ia gber ve sanker, ia wua ônov vev mba nomso man mba kasev, man ia nande uya vev sha usu kpaa.

⁴⁸Kape Me na ijimba ia bee ken tar la, sha u kasev cii ve̱ hen, ve̱ de kera eren ijimba er ne er nahan ga.

⁴⁹Vea or ne iyev sha ijimba i ne er la, man nea tôô ibo i asorabo a akombo a en man nea fa er Mo M lu TER ye.