Read tiv Esekiel 24 Bible Online

Esekiel 24 - tiv bible

Esekiel 24

¹Shi, ken inyom i sha utaankarunyiin, uwer u sha pue, ayange a u di kpaa pue, kwaghôron u TER va her a mo er:

²wan u or, nger iti i iyange ne, iyange i nyian ne je; tor u Babilon ta sha Yerusalem, sha iyange i nyian ne je.

³Pase injakwagh sha ya u hendan ne, kaa a ve wer: Ter AÔNDO ngu kaan nahan er: Penda nen ityegh, penda nen ki, yô, shi haa nen mngerem shimi;

⁴wa nen azuu a inyam shimi, hanma ijuugh ki dedoo, namegh man uwegh; iv ki sha akuhe a hemban doon.

⁵Tsuwa ilegh ki hemban doon cii; wa ikon shin ityô i ki, er ki̱ pughur dedoo; jiidi akuhe shimi kpaa.

⁶Nahan yô, Ter AÔNDO ngu kaan nahan er: Kwagh á tser u, gar u awambe, man ityegh ki nduran u lu shin ki yô, ki nduran u ki u bughun ga ne! Dughun ijuugh i môm i môm shin ki; ma ishor gba sha ki ga.

⁷Gadia awambe na nga ker atô na; a haa a sha vande u lun gbaam gbaam, a haa a shin inya er á cir a sha vuulevu ga.

⁸Ka sha u kenden iyugh sha man u oron iyev, M haa awambe na sha vande u lun gbaam gbaam, sha u i̱ de kera cirin a ga ye.

⁹Nahan yô, Ter AÔNDO ngu kaan nahan er: Kwagh á tser u, gar u awambe! Mo kpaa Me kohol ikon kpishi.

¹⁰Wa nen ikon, kende nen usu, jiir inyam dedoo, mzelam ma̱ kôrough, akuhe a̱ hia.

¹¹Nahan penda ki sha usu gbilin, ki̱ tsee, togola u ki a̱ enger, sha u ihôngor i ki, i̱ sough ken ki kera, man nduran u ki kpaa u̱ hia kera yô.

¹²A nam M vôr sha tom u ican, nahan kpaa nduran na u kpishi la bugh ken na ga; nduran na u̱ yem ken usu.

¹³Sha ci u ijimba you i dang la, sha ci u M wanger we, kpa u wanger ga, nahan á kera wanger we sha hôngor wou ga, zan zan iyugh Yam sha a we ia mem.

¹⁴Ka Mo TER M kaa nahan ye; á va er nahan kpee, Me er un; Me de ga, Me tsegha kpaa ga, man afanyô kpaa Me vaa ga; sha igbenda you, man sha aeren a ou, vea ôr u ijir ye, kape Ter AÔNDO A kaa ne.

¹⁵Shi kwaghôron u TER va her a mo kaa er:

¹⁶Wan u or, nenge, Me tôô isharen i ashe ou kera fese; nahan kpaa de zungu ga, man de vaa ga, mliam ou kpaa ma de hee ga.

¹⁷Shir ishima teghelee, de kera zungu ku u orkpen ga, kange atsar sha ityou, wa akôv a ou shin angahar, de cirin zwa wou ga man de kera ye kwaghyan u ior ve va u a mi la ga.

¹⁸M ôr kwagh a ior pepe, man iyange i been yô, kwase wam kpe kera; tsô kper nan pepe m er er i kaam nahan.

¹⁹Tsô ior kaa a mo er: U kera pase se kwagh u akaa ne a lu tesen sha a vese, er u eren nahan, gaa?

²⁰Nahan m kaa a ve mer: Kwaghôron u TER va her a mo, er:

²¹Kaa ya u Iserael, Ter AÔNDO ngu kaan nahan er: Nenge, Me hôngor icighanjiir Wam, ihagh i tahav enev, isharen i ashe a en, kwagh u i doo uma wen a na la; ônov enev mba nomso man mba kasev mba ne undu, á wua ve sha sanker.

²²Ne kpaa nea er er m er nahan; nea cir zwa wen ga, man nea ya kwaghyan u ior ve va ne a mi la kpaa ga.

²³Atsar a en aa lu ne sha ityou man akôv a en kpaa shin angahar; man nea zungwe shin nea vaa kpaa ga, kpa nea use ken afer a en, man hanma or nana toghor ican a ugen.

²⁴Esekiel una lu ne ikav; hanma kwagh u a er cii, kape ne kpaa né er je la; zum u kwagh ne una er yô, nea fa er Mo M lu Ter AÔNDO yô.

²⁵We wan u or yô, sha iyange i Me ngohol tahav vev kera, iember i iengem ve, isharen i ashe a ve, man kwagh u ve ver asema a ve sha mi la, ônov vev mba nomso man mba kasev la,

²⁶sha iyange la je or u nan wer nana va her a we, sha u va kaan we loho gaa?

²⁷Sha iyange la zwa wou ua bugh zum u or u nan wer la, nana nyôr yô; tsô ú ôr kwagh ú kera huwan ga; kape ú hingir ikav her a ve, man vea fa er Mo M lu TER yô.