Read tiv Esekiel 27 Bible Online

Esekiel 27 - tiv bible

Esekiel 27

¹Kwaghôron u TER shi va her a mo er:

²We wan u or, gber kwelegh sha Tiru;

³kaa a Tiru wer: We, u u tem hen ahongo a zegemnger, u u eren kasua a akuraior a a tem hen ityar i hen kpezegemnger la, Ter AÔNDO ngu kaan nahan er: We, Tiru, u kaa wer: M doo ashe je gande.

⁴Akighiratar a ou nga shin sema u uzegembamngerev, mba ve maa u, ve maa u, doo ashe gande.

⁵Ka sha ikon i fer hen Senir ve er ikpande you cii ye; ve tôô kon u sedar ken Lebanon sha u eren we ityôgh ki tsoogh sha mi.

⁶Ka sha ikon i ouki i Bashan ve gba u iniahatsoo ye; ve er tembetsoo wou sha anyinor a i wa sha ikon i pain i i dugh sha acile a Kitim la.

⁷Ka sha ikondo i pupuu i kôngor i i er hwe u Igipiti sha mi yô, i er tenti wou u tan sha tso la ye, sha u a̱ hingir we tuta; ka sha ikondo i kwel man i nyian dindee i i dugh ken acile a Elisha la man i san haav ou ye.

⁸Ior i Shidon man Arvadi ve lu mbanahan we tso je, mbafankwagh ou, we, Tiru, ve lu ken a we, ve lu mbakôôm we tso.

⁹Mbatamen mba Gebal man mbafankwagh nav, ka ve lu mbacirin ahura ken a we ye; utso mba shin zegemnger cii a mbatomov vev, ve lu ken a we, sha u geman a ikav you mbi kasuav ave.

¹⁰Pershia man Ludi man Puti lu ken ikumutya you, ka mbautyav ou; ve har iperutya man ve cir aderautya ken a we; ve seer we iengem.

¹¹Ior mba Arvadi a ikumutya you imôngo, ve lu sha ugilmbaagarev ou, ningir tser, man Mbagamadi kpaa lu sha ugôgômbaayoughouv ou; ve har iperutya ve sha ugilmbaagarev ou, ningir tser; ve er u, u doo ashe je gande.

¹²Tarshishi lu orkasua wou je sha ci u mngee u akaa kposo kposo; ka sha azurfa man iyôgh ki iligh man kwaza man inyelegh ve er kasua a mi a we ye.

¹³Yavan man Tubal man Mesheki, ve lu mbayamen kasua a we; ve lu van a ikpan man ikav mbi togula sha u va yamen akaa a we.

¹⁴Mba ken ya u Togarma ve va a anyinya, man anyinya a utya, man mbaalfadari, sha u yamen ikav youv mbi kasuav.

¹⁵Ior mba Dedan lu mbayamen kasua a we; ityar i shin kpezegemnger kpishi hingir ajiir a ou a teen kasua, ve va u a anyi a nor man ikon i eboni sha u musan.

¹⁶Shiria lu orkasua wou sha ci u mngee u ityom i ave ou; ve yam kasua a we sha emeraldi, man akondo a nyian dindee man tom u hweegh man ikondo i pupuu i kôngor man korali man agati kpaa.

¹⁷Yuda man tar u Iserael ve lu mbayamen kasua a we; ve yam ikav youv mbi kasuav sha alakema u ken Miniti man mwem man iyough man mkurem man balsem.

¹⁸Damaseku lu orkasua wou sha ci u mngee u ityom i ave ou, man sha ci u mngee u akaa a ou anza kposo kposo cii; wain u helbon man ul u pupuu.

¹⁹Vedan man Yavan ka ken Usal ve va a kasua hen a we ye; iyôgh ki engem man kashia man kalamu, lu ken ikav youv mbi kasuav.

²⁰Dedan lu orkasua wou sha akondo a shidi sha ci u, ú hendan nyinya a mi.

²¹Arabia man utor mba Kedar cii, ve lu mbaeren kasua a we; ve lu mbakasuav ou sha agumaiyôngo man anomaiyôngo man ivo; ka akaa a ve a kasua je ne.

²²Mbakasuav mba Sheba man Raama, ve lu mbayamen kasua a we je; ve va yam akaa a we sha ilyôghonov mbi hemban doon anza kposo kposo, man hanma inja i awen a injaa, man zenaria.

²³Haran man Kane man Eden, mbakasuav mba Sheba, Ashur man Kilemadi, ve cii, lu mbayamen kasua a we.

²⁴Mban lu mbayamen kasua a we sha uihembanmbaakondov, akondo a cirin a kwel a ngeren, man ubutu mba ngeren, man ikor i i tume i i taver.

²⁵Utso mba Tarshishi lu kuran ikav youv mbi kasuav. Kape u iv ne, i wa u ikav tsung ken atô u zegemnger.

²⁶Ka sha uzegembamngerev mbanahan we ve za a we ye; ahumbe a ken ityoughkitaregh hembe u ken atô u zegemnger.

²⁷Inyaregh you man akaa a ou man ikav youv mbi kasuav man mbatomov ou mba tsoov, man mbakôôm we tso man mbacirinahura, man mbamusan ikav youv mbi kasuav, man mbautyav ou cii, mba ve lu a we imôngo, a ikpelaior cii mba ve lu ken atô wou, ve cii ve mire shin atô u zegemnger sha iyange i mtim wou la.

²⁸Sha mngor u ikenge i mbakôôm we tso agôndoamnger aa tenger.

²⁹Ior vea due shin utso vev mbanahantso cii, mbatomov mba tsoov, man mbakôômtso sha zegemnger cii, vea va tile sha tar,

³⁰vea ngor mliam vea vaa u sha ishima i vihin tsung, vea haa inya sha ityouv vev, man vea vingir iyol shin mtwe;

³¹man vea torough ityouv vev sha ci wou, vea ta ikondo uya, vea vaa u, sha ishima i vihin man ijungwen i tsung.

³²Ken mliam vem vea dugh kwelegh sha a we, vea ter u er: Ka anti nan lu er Tiru, u i tim un shin atô u zegemnger laa?

³³Zum u ikav youv mbi kasuav mough hen zegemnger samber yô, u na akuraior mgbough a akaa; sha mngee u akaa a ou man ikav youv mbi kasuav la, u na utor mba sha won kpishi hingir mbanyarev.

³⁴Ahegen yô, i hembe u sha zegemnger, u uve shin aiv a mnger, ikav youv mbi kasuav man ikpelaior you cii, ve mire a we imôngo.

³⁵Mbateman hen ityar i shin kpezegemnger cii kpiligh ve iyol a we, utor vev cia ngegh, ishiv vev hingir gbuu.

³⁶Mbakasuav ken akuraior ve naha u tar; u hingir kwagh u cieryol, u kera lu sha won ga.