Read tiv Esekiel 28 Bible Online

Esekiel 28 - tiv bible

Esekiel 28

¹Kwaghôron u TER shi va her a mo er:

²Wan u or, kaa tor u Tiru wer: Ter AÔNDO ngu kaan nahan er: Sha ci u ishima you i te ihagh, man u kaa wer: Mo M ngu aôndo, m tema sha ijiir i Aôndo ken atô u zegemnger, nahan kpaa u ngu or tsô, u ngu aôndo ga, shin er u hen ken ishima you wer, u ngu er Aôndo nahan kpaa—

³yô, nenge, u hemba Daniel kwaghfan, ma kwagh u myer kera ngu u á yeren we ga;

⁴ka sha kwaghfan wou man mkav wou la, u zua a inyaregh man u kohol zenaria man azurfa ken ayou a ou a koson inyaregh ker la;

⁵sha mvese u kwaghfan wou man sha kasua wou, u seer inyaregh you man ishima you kpaa i kende sha, sha ci u inyaregh you;

⁶nahan yô, Ter AÔNDO ngu kaan nahan er: Sha ci u u hen ken ishima you wer, u ngu er Aôndo yô,

⁷sha ci u nahan yô, nenge, Me va u a ior mba ve lu nongo ugen, ka ikurior i hemban cihin kwagh a akuraior cii, vea tsuwa usanker vev sha u eren num a mdooashe u kwaghfan wou, vea hôngor a iengem you la.

⁸Vea hungwa a we shin ihungwa, ú kpe ku u ishôm ken atô u zegemnger.

⁹Nahan kpaa shi ú kaa wer: Mo m ngu aôndo, sha ishigh ki u a lu wuan we, er u lu or tsô u lu aôndo ga, sha ikev i u a lu gberen we avav la zee?

¹⁰Ú kpe ku u mbaipusuv sha ikev i ior mba ve lu nongo ugen; gadia ka Mo M kaa nahan ye, kape Ter AÔNDO A kaa ne.

¹¹Man shi kwaghôron u TER va her a mo, er:

¹²Wan u or, dugh kwelegh, ter tor u Tiru, kaa a na wer: Ter AÔNDO ngu kaan nahan er: We, u lu kunya u veren ikav a mi u kuman vough, u mgbough a mfe, man u doo ashe gande.

¹³U lu ken Eden, sule u Aôndo, hanma iwen i injaa cir u iyol: sardiu man topashi man daimondi, beril man oniki man yasepi, safir emeraldi man karbunkel; agbende a varen a sha mi sha u haren we a iyol yô, lu a sha zenaria; iyange i i gba u la, i vande sôron a, i ver a ver.

¹⁴We u lu cerubi u samber akper cirin; M ver u ijiir: U lu sha icighanwo u Aôndo, u zende hen atô u awen a usu.

¹⁵U lu vough sha igbenda you cii, hii sha iyange i i gba u je, zan zan ar sha iyange i i zua a ifer ken a we la.

¹⁶Ka sha mngee u akaa a kasua ou man i iv u a tom u iperagh ye, u maa u er isholibo; ka sha ci u nahan M zende u sha uwo u Aôndo kera er ka kwagh u hôngorough nahan ye, we, cerubi u cirin, M pav u a awen a usu.

¹⁷Ishima you ta ihagh sha ci u mdooashe wou; u vihi kwaghfan wou sha iengem you la; nahan M ta u inya, M gbihi u sha ishigh ki utor sha u ve̱ haa ashe sha a we.

¹⁸Ka sha mngee u aferakaa a ou, man sha mban u mimi u kasua wou, u hôngor a uicighanmbaajiriv ou; ka sha ci u nahan, M due a usu ken atô wou—u hia u—M gema u u hingir mtwem shin inya sha ishigh ki mba ve nenge a we cii.

¹⁹Ken akuraior mba ve fe u cii, kpiligh ve iyol a we; u hingir kwagh u cieryol, ú kera lu sha won ga.

²⁰Kwaghôron u TER shi va her a mo, er:

²¹Wan u or, ver ishigh you sha Shidon, ôr kwaghôron u profeti sha a na,

²²kaa wer: Ter AÔNDO ngu kaan nahan er: Nenge, M ngu num a we, we Shidon; Me pase icivir Yam hen atô wou; man vea fa er Mo M lu TER ye, zum u Me ôr un ijir Me tsaha un, man Me pase mtsegh Wam ker a na kpaa la.

²³Gadia Me tindi un a bouange man awambe sha ityembe na; mba i gber ve avav vea gba inya ken a na sha sanker u a lu num a na sha hanma ian cii, man vea fa er Mo M lu TER ye.

²⁴Ma saa u kuman una kera lu ken ya u Iserael ga, shin ma kpamberakpa u vihin iyol una kera lu hen mba ve kase ve la kpaa ga, ka mba ngise ve laha ve la; nahan vea fa er Mo M lu Ter AÔNDO yô.

²⁵Ter AÔNDO ngu kaan nahan er: Zum u Me kohol ya u Iserael hen akuraior a i sambe ve ker la, man Me pase mtsegh Wam ken a ve sha ashe a akuraior la, zum la vea tema ken tar ve, u lu M na wanakiriki Wam Yakob yô.

²⁶Vea tema ken u bem bem, vea maa ayou, man vea môôr ikon i wain, een, vea tema bem bem, zum u Me ôr mba ve kase un ve laha un cii la ijir, Me tsaha ve; man vea fa er Mo TER M lu Aôndo ve ye.