Read tiv Esekiel 33 Bible Online

Esekiel 33 - tiv bible

Esekiel 33

¹Kwaghôron u TER va her a mo, er:

²Wan u or, ôr kwagh a ônov mba ior ou, kaa a ve wer: Zum u Me va a sanker sha ma tar yô, man ior mba hen tar shon la ve tsuwa or môm ken a ve, ve ver nan orkuran,

³man nana nenge sanker una lu van sha tar la, man nana tôngo korough, nan pase ior yô,

⁴nahan hanma or u nan ongo mkaa u kor la man nan we iko ga, man sanker una va una kar a nan kera yô, awambe a nan aa lu sha ityough ki nan.

⁵Nan ungwa mkaa u kor, kpa nan wa iko ga, awambe a nan aa lu sha ityough ki nan; kpa aluer nana we iko sha kwaghwan la yô, ma nan yem uma u nan.

⁶Kpa aluer orkuran nana nenge sanker van, man nana tôngo korough ga, man ior vea zua a mpase ga, man sanker za va, man una kar a ma or ken a ve kera yô; or la, á kar a nan kera sha ifer i nan, kpa awambe a nan yô, Me pine orkuran la kwagh sha mi.

⁷Nahan we, wan u or, M ver u orkuran sha ya u Iserael; nahan yô, aluer wea ungwa kwaghôron sha zwa Wam yô, wa ve kwagh sha ci Wam.

⁸Zum u M kaa a iferor Mer: We iferor, ú kpe kpee, man ú kera ôr kwagh, ú wa iferor kwagh sha u nana̱ undu gbenda u nan ga yô, nahan iferor la nana kpe ken isholibo i nan, kpa awambe a nan yô, Me ker a her a we.

⁹Nahan kpaa, aluer ú wa iferor kwagh sha gbenda u nan, sha u nana̱ undu u, kpa nana undu gbenda u nan ga yô, nana kpe ken ifer i nan; kpa we yô, u yima uma wou.

¹⁰We, wan u or, kaa ya u Iserael wer: Ne mba kaan nahan ner: Afer a ase man asorabo ase nga sha ityouv yasev, se ure ken a, á er nan sé lu uma?

¹¹Kaa a ve wer: Er M lu u uma ne, Ter AÔNDO ngu kaan nahan er: Ku u iferor doom ga; sarem pe iferor nana̱ gema, nana̱ undu gbenda u nan, nana̱ lu uma; gema nen, gema nen, undu nen igbenda yen i bo la; gadia ka sha ci u nyi né gba kpen nahana, we ya u Iseraele?

¹²We wan u or, kaa a ônov mba ior ou wer: Perapera u ormimi una yima nan sha iyange i nan per tindi la ga; man sha kwagh u ifer i iferor yô, nana kera tim sha i ga, sha iyange i nana gema nana undu iferkwagh i nan la; man orperapera di kpaa, nana fatyô u lun uma sha perapera u nan sha iyange i nana er isholibo la ga.

¹³Zum u Mea kaa a orperapera Mer, nana lu uma kpee je, kpa nana suur sha perapera u nan, man nana gema á er iferkwagh yô, á kera umbur ma ieren i perapera i nan je ga; kpa iferkwagh i nan er la, ka sha i nana kpe ye.

¹⁴Man shi zum u Me kaa a iferor Mer: Ú kpe keng; aluer nana gema nana undu isholibo i nan, man nana er kwagh u sha tindi man u a lu vough yô—

¹⁵aluer iferor nana hide a ityungu, man nana hide a kwagh u nan ngohol sha agee la, nana zende ken akaawan a uma, nana kera er ma iferkwagh ga yô, nana lu uma kpee je, nana kpe ga.

¹⁶Ma isholibo i môm i nan er kpaa, á kera umbur nan i ga; nan er sha tindi vough; nana lu uma kpee je.

¹⁷Nahan kpaa, ônov mba ior ou mba kaan er: Gbenda u TER ngu vough ga; kpa gema ka ve, gbenda ve u lu vough ga ye.

¹⁸Aluer orperapera nana gema nana undu perapera u nan la, nana er iferkwagh yô, nana kpe sha i.

¹⁹Man aluer iferor nana gema nana undu iferkwagh i nan la, man nana er kwagh u sha tindi man u vough yô, nana lu uma sha mi.

²⁰Nahan kpaa, ne mba kaan ner: Gbenda u TER ngu vough ga. We ya u Iserael, Me ôr ne ijir, hanmô wen sha igbenda i nan.

²¹Tsô sha inyom i sha pue kar uhar i i yem a vese uikangen la, uwer u sha pue, ayange a u ataan la yô, or u nan wer ken Yerusalem nan va her a mo, nan va kaa er: I hembe gar.

²²Yô, uwegh ku TER lu sha a mo aikighe, er or u nan wer la lu a va ga la; A bugh zwa wam, shighe u kuma u nana va nyôr her a mo pepe la, nahan zwa wam bugh, m kera lu ving ga.

²³Nahan kwaghôron u TER va her a mo, er:

²⁴Wan u or, ve mba ve tem ken uya mba i yôhôl ve kera ken tar u Iserael la, mba kaan er: Aberaham lu or môm tsô, man a ya dyako u tar ne; man se yô, se mba kpishi, i na se tar ne, u hingir se dyako.

²⁵Nahan yô, kaa a ve wer: Ter AÔNDO ngu kaan nahan er: Ne mba yan inyam a awambe ker, man ne mba kenden ashe a en sha sha akombo a en, shi ne mba haan awambe inya kpaa; nahan kpaa tar ne ua shi á lu dyako wene?

²⁶Ne mba suur sha sanker wen, ne mba eren akaa a ndôhôrshima; hanma or ker a ven nan vihi kwase u or u wan ndor a nan; nahan kpaa tar ne ua shi á lu dyako wene?

²⁷Kaa a ve nahan wer: Ter AÔNDO ngu kaan nahan er: Er M lu u uma ne, ve mba ve lu ken uya mba i yôhôl ve kera la, á wua ve sha sanker kpee, man u nan lu ken toho yô, Me na inyamtoho ia ya nan, man mba ve lu ken ayouautya a taver man ken ubarmbaiwoov, bouange una wua ve.

²⁸Me gema tar ne ua hingir ice man kwagh u kpilighyol, man imanger i agee a u la ia kar kera; iwo i Iserael kpaa ia hingir ice, ma or nana kar sha i ga.

²⁹Nahan vea fa er Mo M lu TER ye, zum u Me gema tar ua hingir ice man kwagh u kpilighyol, sha ci u akaa a ndôhôrshima a ve er la cii.

³⁰Man we yô, wan u or, ônov mba ior ou mba teren we hen ukpekpe man sha ihinda i ayoughough mba ôron ayol a ve, hanmô a anngô u nan, er: Shi va, va ungwa kwaghôron u a dugh hen TER yô.

³¹Mba van her a we er ior ve ve nahan, ve tema sha ishigh you er ka ior Av nahan, ve ungwa akaaôron a ou, kpa mba eren sha a ga; gadia mba tesen dooshima ve sha zwa kpishi, kpa ishima ve yô, ngi sha mtsera ve.

³²Nenge, u ngu ve icam i dedoo i or u nan doo imo, man nan fe u kuhwan ityogholov dedoo yô; gadia ve ungwa akaaôron a ou, kpa mba eren sha a ga.

³³Man zum u kwagh ne una va kure sha mi yô—nenge, ngu van kpee—nahan vea fa er profeti a lu ken a ve yô.