Read tiv Esekiel 37 Bible Online

Esekiel 37 - tiv bible

Esekiel 37

¹Uwegh ku TER lu sha a mo, A due a mo sha Jijingi u TER, A za verem shin atô u pev; a mgbough a akuhe;

²A na, m ningir a, m tser; man nenge, a ngee kpishi shin pev; man nenge, a uma tseghe tseghe.

³Tsô A kaa a mo er: Wam u or, akuhe angan aa fatyô u lun umaa? Nahan m kaa a Na, mer: Ter AÔNDO, U fa.

⁴A shi A kaa a mo er: Ôr kwaghôron u profeti sha akuhe ne, kaa a wer: Ne akuhe a uman ne, ungwa nen kwaghôron u TER.

⁵Ter AÔNDO ngu kaan nahan er: Nenge, Me na iôôn ia nyôr ken a ven, nahan né hingir uma.

⁶Man Me wa ne igbela, Me va ne a inyam man Me cir ne kwav iyol, Me na iôôn ia nyôr ken a ven, nahan né hingir uma; man né fa er Mo M lu TER ye.

⁷Tsô m ôr kwaghôron u profeti er i kaam nahan; er m lu ôron kwaghôron u profeti ave la yô, iov due, man nenge, akaa gba kpoghol iyol, akuhe zua, hanma kuhe sha kuhe u u.

⁸Tsô m nenge, yô igbela gema lu sha a, man inyam kpaa va, man kwav va cir sha mi; kpa iôôn lu ker ga.

⁹Nahan A kaa a mo er: Ôr kwaghôron u profeti a jijingi, ôr kwaghôron u profeti, we wan u or, kaa jijingi wer: Ter AÔNDO ngu kaan nahan er: Va sha ahumbe a anyiin la, we jijingi, va ôô ken mba i woo ve mban, ve̱ hingir uma.

¹⁰Tsô m ôr kwaghôron u profeti er A kaam nahan, nahan iôôn gema va ken a ve, ve hingir mbaumav, ve tile sha, sha angahar a ve, ka ikumior i ngeen tsung je.

¹¹Nahan A kaa a mo er: We wan u or, akuhe angan ka ior i nongo u Iserael cii je la; yô, nenge, mba kaan er: Akuhe ase uma man ishimaverenkeghen yase saa kera; i paa se kera!

¹²Nahan yô, ôr kwaghôron u profeti, kaa a ve wer: Ter AÔNDO ngu kaan nahan er: Nenge, Me bugh iwar yen, Me na, né due ken iwar yen, ne ior Av; Me shi Me va a ven ken tar u Iserael.

¹³Nahan né fa er Mo M lu TER ye, zum u Me bugh iwar yen, man Me na, né due ken iwar yen yô, ne ior Av.

¹⁴Tsô Me er Jijingi Wam ken a ven, man né lu uma, Me ver ne ken tar wen kpaa; nahan né fa er Mo TER M kaa nahan man shi M er sha mi kpaa yô, kape TER A kaa ne.

¹⁵Kwaghôron u TER shi va her a mo er:

¹⁶We, wan u or, tôô aga nger sha mi nahan wer: Sha ci u Yuda man Mbaiserael mba ve lu ken nongo na; shi tôô aga ugen kpaa, nger sha mi, wer: Sha ci u Yosev—aga u Eferaim—man ya u Iserael mba ve lu ken nongo na;

¹⁷zua ve, môm sha ugen ve̱ hingir aga môm, sha u ve̱ hingir môm sha uwegh ough.

¹⁸Man aluer ônov mba ior ou vea ôr kwagh a we, vea kaa er: U kera pase se inja i akaa a u eren ne gaa?

¹⁹Yô, kaa a ve wer: Ter AÔNDO ngu kaan nahan er: Nenge, Me tôô aga u Yosev u a lu sha ikev i Eferaim la, man ikwe i Iserael mba ve lu ken nongo na la, Me zua ve sha aga u Yuda la, Me gema ve vea hingir aga môm, vea hingir môm sha ikev Yam.

²⁰Mbaaga mba u nger kwagh sha min la, ve̱ lu sha uwegh ough sha ashe ve.

²¹Kaa a ve wer: Ter AÔNDO ngu kaan nahan er: Nenge, Me kura Mbaiserael ken atô u akuraior, a ve yem ker la, Me kohol ve hanma vegher cii, man Me va a ve ken tar ve jim;

²²Me gema ve, vea hingir ikurior i môm ken tar la, sha iwo i Iserael; tor môm una tema tor sha a ve cii; vea kera lu akuraior ahar ga, man á kera pav ve ityartor ihiar mayange kpaa ga;

²³man shi vea kera hôngor ayol a ve sha akombo a ve ga, shin sha akaa a ndôhôrshima a ve kpaa ga, shin sha ma atindi a ve a peren kpaa ga; kpa Me yima ve sha mbamhirjime vev cii mba ve er isholibo sha mi la, man Me wanger ve, nahan vea hingir ior Av, Mo kpaa Me lu Aôndo ve.

²⁴Wanakiriki Wan Davidi una tema tor sha a ve; ve cii vea lu a orkuran môm; vea zenden ken akaaôron a Am a jirigh, vea waan akaawan a Am iko man vea eren sha mi kpaa.

²⁵Vea tema ken tar u M na wanakiriki Wam Yakob la, henpe uter enev lu tema la; vea tema ken u, ve kua ônov vev man ônov mba ônov vev, gbem sha won; wanakiriki Wam Davidi kpaa una tema tor sha a ve gbem sha won.

²⁶Man shi Me ya ikur i bem a ve, ia lu ikuryan i tsôron a ve; Me ver ve her, Me na, vea ngee, man Me ver icighanjiir Wam ken atô ve gbem sha won.

²⁷Ijiir Yam i teman ia lu hen ve; Me hingir Aôndo ve, ve kpaa vea hingir ior Av.

²⁸Nahan akuraior aa fa er ka Mo TER M tsegh Iserael ye, zum u icighanjiir Wam una lu ken atô ve gbem sha won yô.