Read tiv Esekiel 38 Bible Online

Esekiel 38 - tiv bible

Esekiel 38

¹Kwaghôron u TER va her a mo er:

²Wan u or, ver ishigh you sha Gogi, u ken tar u Magogi, tor u Roshi man Mesheki man Tubal,

³ôr kwaghôron u profeti sha a na, kaa wer: Ter AÔNDO ngu kaan nahan er: Nenge, M ngu num a we, we Gogi tor u Roshi man Mesheki man Tubal;

⁴Me gema u, ú hide ijime, Me wa u utsuwe ken azegher, Me due a we kera a ikumutya you cii, anyinya man mbaanyinyav, ve cii ve haa ikav mbi utyav iyol, ka zegeikumutya a iper man mbaakuva, ve cii mba a sanker sha ave;

⁵Pershia man Kushi man Puti a ve imôngo; ve cii a iperutya man aderautya;

⁶Gomer man akumautya na cii; ior i Togarma ken akighiratar a imbusutarimese la, man akumautya na cii; ior kpishi a we imôngo.

⁷Yô, wa iyol man wa ago iyol, we a ikpelaior you i i kohol her a we la cii, lu or u hemen ve.

⁸Ayange á va kar kera kpishi yô, á umbur we; ken anyom a masetyô yô, wea va ken tar u i ser u, u sanker lu vihi la, hen ior i i kohol ve ken akuraior kpishi, i va a ve sha iwo i Iserael, i i lu ice gbem la, kpa i due a ve ken akuraior, man ve cii vea tema bem bem.

⁹Wea kôndo er ijeverahumbe nahan, wea lu er ibeenegh ki cirin tar nahan, we man akum a ou cii, man ior kpishi a we imôngo.

¹⁰Ter AÔNDO ngu kaan nahan er: Tsô sha iyange la, mbamhen vea va ken ishima you, ú hen mhen u bo;

¹¹ú kaa wer: Me kôndo hen tar u agar a u, a lu a ugir ga la, me za ta sha mba ve tem bem bem a mkpeyol la, ve cii ve tema mba a ugir ga, shi mba a uishindan man ihinda kpaa ga,

¹²sha u yan ishar man u kuran akaa, man u zan uwegh ough sha atse a ayoughough a ior ve hir ve va tem ker yô, mba i za kor ve ken akuraior la, mba ve zough a uzendenya man akaa, mba ve tem sha icombotar yô.

¹³Sheba man Dedan man mbakasuav mba Tarshishi a agumabegha a na, vea kaa a we er: U va sha u va yan ishara? U kohol ior ou sha u va kuran akaa? sha u yemen a azurfa man zenaria kera, man u kuran ilev man akaa, man u yan ishar kpishi?

¹⁴Nahan yô, wan u or, ôr kwaghôron u profeti, kaa a Gogi wer: Ter AÔNDO ngu kaan nahan er: Sha iyange i ior Av Iserael vea tema bem bem la yô, wea fa gaa?

¹⁵Nahan wea mough hen ijiir you hen akighiratar a ken imbusutarimese, we man ior kpishi a we imôngo, ve cii lu sha anyinya, ikpelaior i ngeen tsung, man ikumutya i ageegh;

¹⁶wea va ta sha ior Av Iserael er ibeenegh ki ki cir tar nahan; kwagh ne una va er sha ayange a masetyô la; sha shighe la, Me va a we sha u u̱ va nôngo ityav a tar Wam sha u akuraior a̱ fam yô, zum u Me tese mtsegh Wam ken a we sha ashe ve la, we Gogi.

¹⁷Ter AÔNDO ngu kaan nahan er: Ka we M ter u tsuaa sha zwa u mbayev Av uprofeti mba Iserael, mba ve lu ôron kwaghôron u profeti anyom kpishi, sha kwagh u ayange shon la, er Mea va a we sha u va nôngon ityav a ve gaa?

¹⁸Tsô sha iyange la, zum u Gogi una va ta num sha tar u Iserael yô, kape Ter AÔNDO A kaa ne, iyugh Yam ia kôndom ken ahenga.

¹⁹Gadia ka sha iwuhe Yam man sha myegh u ishima Yam i vihin M kaa kwagh ye: Mimi je, sha iyange la zegemtenger u tar una tenger ken tar u Iserael;

²⁰ishu i shin zegemnger man inyon i sha, man inyamtoho, man akaa a kpelan iyav inya shin tar cii, man ior mba ve lu sha tar cii, vea gbidye akarkase iyol sha ishigh Yagh á yôhôl iwo kera, man ajiir a taven sha aa tsehe, man hanma kpekpe una yôhôl.

²¹Me yila sanker hen iwo Yam cii, sha u tan num sha a na, kape Ter AÔNDO A kaa ne; sanker u hanma or una lu num a anngô u nan.

²²Me ôr un ijir sha bouange man awambe; Me nôô ikumenura man awombo a kehen a usu man sulfur sha a na, man sha akum a na la, man sha ior kpishi, mba ve lu a na imôngo la.

²³Nahan Me tese mhembe Wam man mtsegh wam, Me pase iyol Yam ken igbar sha ashe a akuraior kpishi; nahan man vea fa er Mo M lu TER ye.