Read tiv Esekiel 40 Bible Online

Esekiel 40 - tiv bible

Esekiel 40

¹Sha inyom i sha ikyundu kar utaan i mlu wase ken uikangen la, sha mhii u inyom la, sha uwer la, ayange a u pue, sha inyom i sha pue kar unyiin er i hembe gar kera la, sha iyange la je, uwegh ku TER lu sha a mo, man A za a mo keela.

²Sha mbampase mba Aôndo, A za a mo ken tar u Iserael, A verem sha uwo u taven tsung, kwagh lu sha mi er ka gar nahan, vegher u ken imbusutariyan la.

³Er A za a mo keela yô, nenge, or lu her, u mluashe u nan lu er ka togula nahan, lu a kor u ada sha uwe kua iyiagh ki karen kwagh a mi; a tile sha hunda.

⁴Or la gema kaa a mo er: Wan u or, nenge sha ashe ou, man ungwa sha ato ou, man ver ishima sha akaa a Me tese u ne cii, gadia ka sha u á tese u a man i ve a we heen ye; pase ya u Iserael akaa a u nenge ne cii.

⁵Nenge, kpekpe kase iyou ken won ningir tser, man iyiagh ki karen kwagh a mi lu sha uwegh ku or la, ilihen na lu aseva ataratar, hanma ishiva, i seer igbanger i ikevwe sha mi; a kar mcivir u kpekpe la, iyiagh i môm; ityaven na kpaa lu iyiagh i môm.

⁶Nahan a va hen hunda u u ver ishigh sha ityoughkitaregh la, a unde sha agbur a u; a kar kpandehunda u shin, igbanger i u lu iyiagh i môm; man kpandehunda u shin ugen la kpaa, igbanger i u lu iyiagh i môm.

⁷Hanma iyou i orkuran, ilihen i i lu iyiagh i môm, man igbanger i i kpaa lu iyiagh i môm; hen haregh u ayou a mbakuran la, lu aseva ataan ataan; man kpandehunda u hen puadwer u hunda, vegher u ken atô, lu iyiagh i môm je.

⁸Shi a kar puadwer u hunda, vegher u ken atô la, lu iyiagh i môm je.

⁹Nahan a kar puadwer u hunda la, lu aseva anigheni, man ambusu a u, aseva ahar; puadwer u hunda la, lu vegher u ken atô.

¹⁰Man ayou a mbakuran, a sha hunda u sha ityoughkitaregh la, lu atar ken vegher ne, atar di ken vegher ugen la; ayou atar la cii lu ikaren inja i môm; ambusu a u kpaa lu ikaren inja i môm, ken vegher ngun man ngula kpaa.

¹¹Shi a kar igbangese i ijiir i nyôron hen hunda la, lu aseva pue; man iniembe i hunda lu aseva pue kar atar;

¹²kur u sha ishigh ki ayou a mbakuran la, lu ishiva i môm hen vegher ngun, shi kur u ken vegher ugen la kpaa, lu ishiva i môm; ayou a mbakuran lu aseva ataratar vegher ngun, man shi aseva ataratar vegher ugen la kpaa.

¹³A kar hunda, hii sha haav mbu iyou i mbakuran ingin zan zan za ar hen haav mbu igen la, igbanger lu aseva ikundu kar ataan; hunda ver ishigh sha hunda ugen.

¹⁴A er ambusu a ihinda kpaa, aseva akunduatar; tembe ar sha imbusuhunda, ningir hunda tser.

¹⁵Hii sha ishigh ki hundagh hen ijiir i nyôron zan zan za ar sha ishigh ki puadwer u hunda u ker atô la, lu aseva akunduahargber.

¹⁶Uwindou mba lun ahura ahura lu ken ayou a mbakuran man ken ambusu a a kpaa vegher u ker atô u hunda, ningir tser; man ka di nahan hen puadwer la kpaa; uwindou ningir tser kimi, hanma imbusuhunda atineavilegh lu sha mi.

¹⁷Tsô a va a mo hen tembe u ken won, man nenge, ayou lu her, man tembe u i wa u awen, ningir tser tembe la cii; ayou ikundugber lu sha tembe u i wa u awen la.

¹⁸Tembe u i wa u awen la lu hen kpe ihinda, kighir sha ilihen i ihinda vough, ka tembe u i wa u awen u gban shin la.

¹⁹Nahan a kar igbanger hii sha ishigh ki hunda u gban shin zan zan za ar sha ishigh ki tembe u kimi ken won, lu aseva deri, vegher u sha ityoughkitaregh man shi vegher u shin imbusutarimese kpaa.

²⁰Hunda u tembe u ken won u u ver ishigh ki u ken imbusutarimese la, a kar ilihen i u man igbanger i u kpaa.

²¹Ayou a mbakuran u, lu atar ken vegher ne man atar di ken vegher ngula; ambusu a u man puadwer u u lu ikaren môm a hunda u hiihii la, ilihen i u lu aseva akunduahargber man igbanger i u lu aseva ikundu kar ataan.

²²Uwindou mba u man puadwer u u, man atineavilegh a u, lu ikaren i môm a hunda u u ver ishigh sha ityoughkitaregh la; agbur lu ataankarahar a unden sha mi, za nyôron sha u; puadwer u u, lu a ken hemen.

²³Hunda lu u nyôron hen tembe u ken atô, u ver ishigh sha hunda u ken imbusutarimese man lu er hunda u sha ityoughkitaregh nahan; a kar, hii hen hunda ungun zan zan za ar hen hunda ungula lu aseva akunduataan.

²⁴A za a mo ken vegher u imbu-sutariyan, yô, nenge, hunda lu, u ver ishigh ken imbusutariyan la; nahan a kar ambusu a u man puadwer u u, lu ikaren môm a u i vande karen la.

²⁵Uwindou lu ken u man ken puadwer u u, kase tser, lu inja i môm a uwindou mbagenev mbala; ilihen i u lu aseva akunduahargber, man igbanger i u lu aseva ikundu kar ataan;

²⁶agbur lu ataankarahar a unden za nyôron sha u; puadwer u u, lu a ken hemen; u lu a atineavilegh, i môm vegher ne, i môm di vegher ugen sha ambusu a u.

²⁷Shi hunda lu u u nyôr ken tembe u ker atô, vegher u ken imbusutariyan la; a kar, hii hen hunda ungun zan zan za ar hen hunda ungula vegher u imbusutariyan la, lu aseva deri.

²⁸Tsô a nyôr a mo hen tembe u ken atô, sha hunda u ken vegher u imbusutariyan la; a kar hunda u ken vegher u imbusutariyan la, u lu ikaren môm;

²⁹man ayou a mbakuran a u, man ambusu a u, man puadwer u u, lu ikaren môm; uwindou lu ken u man ken puadwer u u, ningir tser; ilihen i u lu aseva akunduahargber man igbanger i u aseva ikundu kar ataan.

³⁰Upuadwer ningir tser, ilihen lu aseva ikundu kar ataan, igbanger aseva ataan.

³¹Puadwer u u la, ver ishigh sha tembe u ken won la; atineavilegh lu sha ambusu a u; agbur a unden za nyôron sha u lu anigheni.

³²A va a mo hen tembe u ken atô, vegher u sha ityoughkitaregh; a kar hunda, lu ikaren môm

³³man ayou a u a mbakuran man ambusu a u, man puadwer u u, lu ikaren môm; man uwindou lu ken u man ken puadwer u u ningir tser; ilihen i u lu aseva akunduahargber, man igbanger i u aseva ikundu kar ataan.

³⁴Puadwer u u la, ver ishigh hen tembe u ken won la; atineavilegh lu sha ambusu a u, hen vegher ngun man ngula; agbur a unden nyôron sha u lu, anigheni.

³⁵A va a mo hen hunda u ken vegher u imbusutarimese la; a kar u, lu ikaren môm:

³⁶ayou a u a mbakuran, ambusu a u, man puadwer u u; uwindou lu ken u ningir tser; ilihen i u, lu aseva akunduahargber man igbanger i u, lu aseva ikundu kar ataan.

³⁷Puadwer u u la, lu vegher u hen tembe u ken won la; atineavilegh lu sha ambusu a u, ken vegher ngun man ngula; agbur a unden nyôron sha u lu anigheni.

³⁸Iyou igen lu a hunda u i, u nyôr ken puadwer u hunda, ka heregh i ôôn nagh ku nanden ye.

³⁹Hen puadwer u hunda, utebul lu uhar ken vegher ne, man utebul uhar ken vegher ngula kpaa, sha u sôngon nagh ku nanden man nagh ku isholibo man nagh ku iboogh sha mi.

⁴⁰Man hen vegher u ken won, henpe i nyôron sha hunda u vegher u ken imbusutarimese la, utebul lu uhar; hen vegher ugen kpaa u u lu hen puadwer u hunda la, utebul lu uhar.

⁴¹Utebul unyiin lu hen vegher ne, man utebul di unyiin hen vegher ngula, hen hunda; ka utebul anigheni, mba i sôngon iniav sha mi.

⁴²Utebul mba unyiin mba sha awen a kuan la, lu sha ci u nagh ku nanden, lihe ishiva i môm man tiôn, igbangese kpaa ishiva i môm man tiôn, itiaven gema lu ishiva i môm; ka sha ve i veren ikav mbi sôngon nagh ku nanden man nagh ku sôngon ye.

⁴³Uiwev mba ve lihe er igbangese i ikevwe nahan la, i mande ve kimi ningir tser; utebul la yô, inyam i nan nagh a min lu sha mi.

⁴⁴Ken won u hunda u ker atô la, ayou lu ahar ken tembe u ker atô la, i môm lu hen kpe u hunda u ken imbusutarimese, i ver ishigh ken imbusutariyan; i môm gema lu hen kpe u hunda u imbusutariyan, i ver ishigh ken imbusutarimese.

⁴⁵A kaa a mo er: Iyou ngin, i i ver ishigh ken imbusutariyan la, ka sha ci u upristi mba ve eren tom ken tempel yô.

⁴⁶Man iyou i i ver ishigh ken imbusutarimese la, ka sha ci u upristi mba ve eren tom sha atse a nanden nagh sha mi yô; mban ka ônov mba Sadoki, ken ônov mba Levi, mba ve kporom hen TER, sha u eren Un tom yô.

⁴⁷A kar tembe, ilihen i u lu aseva deri man igbanger i u kpaa lu aseva deri, u lu akuku; man atse a nanden nagh sha mi lu sha ishigh ki iyou la.

⁴⁸Tsô a va a mo hen puadwer u iyou, a kar hanma imbusu i puadwer la, lu aseva ataan hen vegher ne, man aseva ataan di hen ngula; igbanger i hunda lu aseva atar hen vegher ne, man aseva atar di hen vegher ungula.

⁴⁹Ilihen i puadwer lu aseva ikundu, man igbanger na lu aseva pue kar uhar, ka hen agbur pue a i unden sha mi la; man mtôm lu hen ambusu, ki mômough hen vegher ne, kigenegh di ken vegher ngula.