Read tiv Esekiel 7 Bible Online

Esekiel 7 - tiv bible

Esekiel 7

¹Kwaghôron u TER va her a mo, er:

²We, wan u or, Ter AÔNDO ngu kaan sha kwagh u tar u Iserael er: Mkur! Mkur va sha azongo a tar a anyiin ne.

³Hegen yô, mkur va sha a we, Me tindi ishima Yam i vihin sha a we, man Me ôr u ijir sha aeren a ou, man Me tsaha u sha akaa a ou a ndôhôrshima cii.

⁴Ishe Yam ia tange u ga, man Me zungwe mhôônom kpaa ga; kpa Me tsaha u sha aeren a ou, man akaa a ou a ndôhôrshima a a lu ker atô wou la, man wea fa er Mo M lu TER ye.

⁵Ter AÔNDO ngu kaan nahan er: Kwagh u bo, ka kwagh u bo tseegh, nenge, ngu van;

⁶mkur va, mkur va ve, a nder sha a we; nenge, ngu van.

⁷Iyevoron i á or u iyev va ve, we orteman shin tar ne; shighe va ve, iyange mgbôghom; iyange i ayôôso, kpa ka ikenge i iember sha iwo la ga.

⁸Ahegen yô, kera shi vese ga tsô, Me haa ishimavihin Yam sha a we, Me kure ishimavihin Yam sha a we, Me ôr u ijir sha aeren a ou; man Me tsaha u sha akaa ou a ndôhôrshima la cii.

⁹Ishe Yam ia tange ga, man shi Me zungwe mhôônom kpaa ga; Me tsaha u sha inja i aeren a ou cii, akaa a ou a ndôhôrshima a a lu ker atô wou la, man né fa er i lu Mo TER M lu tsahan ne ye.

¹⁰Nenge, iyange, nenge, i ngi van; mtim wou va ve; tôgh hôm, kpar, iyolmoron mende.

¹¹Ipila vese hingir tôgh ku ifer; ma kwagh una shi ken a ve ga, shin sha mngee ve, shin sha inyaregh vegh kpaa ga, man shi ma icivir i hemban kpaa ia lu ken a ve ga.

¹²Shighe va ve, iyange mgbôghom, or u yamen a̱ de ember ga, man or u teen kpaa a̱ de zungu ga, gadia iyugh ngi sha ikpelaior ve cii.

¹³Gadia orteen una kera hide hen kwagh u i tee la ga, shin er nan lu uma her nahan kpaa; gadia mpase u sha mnenge ngu sha ikpelaior ve cii, ma or nana hide ga; man shi ma or nana taver uma u nan sha iferkwagh i nan ga.

¹⁴Ve tôngo ikpamkor, ve wa ago iyol, ve bee; kpa ma or ngu zan ityav ga; gadia ishima i vihin Yam ngi sha ikpelaior ve cii.

¹⁵Sanker ngu ken won, bouange man ijen mba kimi; u nan lu ken ityev á wua nan sha sanker, u nan lu ken gar ijen man bouange vea kar a nan kera.

¹⁶Shin er mbagenev vea war kpaa, vea lu sha iwo er mbaatii mba shin upev nahan, ve cii vea gber kwelegh, hanma or sha iferkwagh i nan.

¹⁷Ave cii aa shir livaa, man anu cii aa taver ga, er mngerem nahan.

¹⁸Vea ta ikondo uya; mciem maa haa ve iyol; kunya ua lu sha ishiv vev cii, man ityouv vev mbia kpur cii.

¹⁹Vea haa azurfa ve sha igbenda i ken gar, man zenaria ve kpaa una hingir er kwagh u hôngorough nahan; azurfa ve man zenaria ve vea fatyô u yiman ve sha iyange i iyugh i TER la ga; uma ve una ide sha mi ga, man vea iv iyav vev sha mi kpaa ga, gadia lu kwagh u nan ve gbev mbu nôngon sha u eren ifer la.

²⁰Ve gema inyaregh kila ve er akaahweegh a mi, hingir kwagh u ihagh, shi ve var ieev vev mbi ndôhôrshima man akaa a ve a hôngorough a mi; sha ci u nahan yô, Me gema ki kia hingir ve kwagh u hôngorough je.

²¹Me gema ki Me na ikurior igen á hingir ve ishar i yan; man Me na aferaior a sha won sha u ve̱ kura ki kera, sha u ve̱ hôngor ami.

²²Me gema ishigh Yagh her a ve kera kpaa, man á hôngor a ijiir Yam i injaa la, mbanumungbenda vea nyôr kimi man vea hôngor a i.

²³Er ishirigh, gadia tar iv a ibo i awambe, gar la kpaa mgbough a ipila.

²⁴Ka nahan man Me va a akuraior a hemban iferkwagh cii, a a ngohol uya vev ye; Me er ihagh i tan i mbaageev ia bee sha won; man á hôngor a ajiir a ve a tseghan la.

²⁵Ishimanyian ngi van; vea ker bem, kpa vea zua a mi ga.

²⁶Kwaghbo una dondo sha kwaghbo, man ahura di sha ahura; vea ker mpase u sha mnenge hen profeti; ityesen ia saa ishe hen pristi, man mhen di kpaa hen mbatamen.

²⁷Tor una zungwe, man mciem maa haa ortaregh iyol, ave a ior mba hen tar la aa gbidye akarkase; Me er a ve sha aeren a ve, man ka sha inja i aeren a ve la, Me ôr ve ijir; man vea fa er Mo M lu TER ye.