Read tiv Daniel 10 Bible Online

Daniel 10 - tiv bible

Daniel 10

¹Sha inyom i sha utar i Shirushi tor u Pershia la, i pase Daniel, u i yilan un er Belete-shasar la kwagh; kwagh la lu kwagh u mimi je, lu kwagh u ican i vesen; a kav kwagh la, mpase u sha mnenge la wanger un.

²Sha ayange la, mo Daniel m lu zungwen kuma ulahadi utar je.

³M ya kwaghyan u dedoo ga, inyam shin wain kpaa nyôr ken zwa wam ga, m shighe mkurem iyol je ga, zan zan ulahadi mba jimin utar.

⁴Uwer u hiihii ayange a u ikundu kar anyiin la, m lu hen kpe u zegeifi, ka Tigeri je la;

⁵yô, m kende ashe sha, m kenger; yô, nenge, or cir ikondo i pupuu i kôngor iyol, zer kwange u zenaria u Ufashi shin iwenge;

⁶iyol na lu er iwen i beril nahan, ishigh nagh lu er inyiar yô, man ashe a na lu er akagh a usu nahan, akaseaveegh a na man angahar a na lu er togula u engem nahan, man imo i akaaôron a na lu er ka imo i ikpelaior yô.

⁷Ka mo Daniel tseegh m nenge mpase u sha mnenge ne ye; ior mba ve lu a mo imôngo ve nenge a mpase ne ga; kpa zegemcie ta ve iyol, nahan ve yevese ve za yer.

⁸Nahan m mase shin tswen, tsô m nenge zegempase ne, ma agee kera lu ken a mo ga; gadia mluashe wam u dedoo gema hingir dang, m kera shi a ma agee ga.

⁹Nahan kpaa m ungwa imo i akaaôron a na; zum u m ungwa imo i akaaôron a na yô, m gba mnyam mem mem, m cir ishigh inya.

¹⁰Man nenge, uwegh bende a mo, ku erem, m gure a ikarikase sha anu man ave am.

¹¹A gema a kaa a mo er: We, Daniel, or u doon ishima tsung ne, ver ishima sha kwaghôron u me ôr u ne, mough tile sha jighilii, gadia ka her a we i tindim hegen ye. Zum u a lu ôron mo kwagh ne yô, m tile sha, a ikarikase iyol.

¹²Tsô a kaa a mo er: De kera cie ga, Daniel; gadia hii sha iyange i u hii veren ishima sha u kaven man u hiden a iyol you ijime sha ishigh ki Aôndo wou la je, i ungwa kwaghôron wou, man m va ka sha kwaghôron wou la.

¹³Kpa ortaregh u tartor u Pershia la hendan a mo ayange ikundu kar môm; nenge, Mikael, u môm ken mbatarev mba vesen va wasem; nahan m shi her a utor mba Pershia.

¹⁴Hegen yô, m va sha u me na u ú kav kwagh u una va er ior ou sha ayange a masetyô yô, gadia mpase ne ngu sha kwagh u ayange a ken hemen ca.

¹⁵Er a ôrom akaaôron ne nahan, m kuma ishigh inya, m kondo iker.

¹⁶Yô, nenge, ugen u a bee or va bende ityumbuzwaagh yam; nahan m bugh zwa m ôr kwagh, m kaa a u a tile sha ishigh yagh la, mer: Terem, mpase u sha mnenge ne nam mnyoonom kôrom, m kera shi a ma agee ga.

¹⁷Gadia á hii nan man wanakiriki u terem ne una ôr kwagh a we terem? Gadia, mo yô, ma agee kera nga ken a mo ga, iôôn kpaa kera shi ken a mo ga.

¹⁸Nahan u a bee or la shi bende a mo; a nam agee.

¹⁹A kaa er: De cie ga, we or u doon ishima tsung ne, lu bem bem, taver, een, taver. Er a lu ôron kwagh a mo nahan, maa m taver, nahan m kaa mer: Terem, gba ôron kwagh tsô, gadia u nam agee.

²⁰Nahan a kaa er: U fa kwagh u m ve hen a we ne kpa? Hegen yô, hiden yam sha u za nôngon ityav a ortaregh u Pershia; zum u me due yô, nenge, ortaregh u Grika una va.

²¹Nahan kpaa me ôr u kwagh u i nger ken Ruamabera u mimi la, ma or u tavershima u wasen mo u nôngon a ve nan ngu ga, saa Mikael ortaregh wen.