Read tiv Daniel 8 Bible Online

Daniel 8 - tiv bible

Daniel 8

¹Sha inyom i sha utar i mtemtor u Beleshasar la, mpase u sha mnenge ugen ande her a mo, mo Daniel, er ugen vande anden her a mo kera la.

²M nenge ken mpase; zum u m nenge la yô, m lu ken Shushan garutya u ken tiôntar u Elam; m nenge ken mpase u sha mnenge, m lu hen kpe ifi u Ulai.

³M kende ashe sha, m nenge; Yô, nomiyôngo tile hen kpeifi lu a akor ahar; akor la lihe; kpa ku mômough hemba lihen a kugenegh, ku hemban lihen kura ku mase duen.

⁴M nenge nomiyôngo la lu keman veren ishigh vegher u shin ityôtar man ken imbusutarimese man ken imbusutariyan; ma inyam i môm lu a tahav u tilen sha ishigh nagh ga, man shi ma or fatyô u yiman kwagh sha ikev na ga, kpa a lu eren sha ishima na, lu kenden iyol na sha.

⁵Er m lu kenger yô, nenge, kpev due shin ityôtar va kar sha tar cii, kpa bende shin inya ga; kpev la lu a korough ku tser tser sha kungwa.

⁶A va hen nomiyôngo u lun a akor ahar la, u m nenge a tile hen kpeifi la, a usa, a za sha a na ayem sha ishima i vihin i agee a na.

⁷M nenge a na, a va ikua ikua a nomiyôngo la, a gen ishima sha a na, a za ta sha nomiyôngo la, a sombo un akor ahar la; ma agee kera lu ken nomiyôngo la u tilen sha ishigh nagh ga; a ta un inya, a shoghol angahar sha mi; ma or lu a tahav u yiman nomiyôngo la sha ikev na ga.

⁸Kpev shon la er akaavesen; zum u a hemba yô, zegekor la tôndo; sha ityough ki korough kura, akor agen anyiin a tseer tseer gema due, ver ishiv sha avegher a ahumbe a anyiin a Sha.

⁹Ken ku mômough ken a, ankor u kiriki due, u a hingir ku vesen kpishi yô, a ver ishigh vegher u ken imbusutariyan man vegher u sha ityoughkitaregh man vegher u ken Tar u Icivirigh.

¹⁰A hingir zegenan zan zan a za ar sha akum a Sha; a pande akum a Sha, ka asan agen je la, a haa a shin inya, a shoghol angahar sha mi.

¹¹Een, a kende iyol na sha zan zan a za ar sha Tor u akum a Sha kpaa; a ngohol Un nagh ku nanden ku gbem la kera, a yôhôl icighanjiir Na kera kpaa.

¹²I na ikum i utya sha ikev i ku a nagh ku nanden ku gbem la imôngo, sha ci u tindi u peren; man ku zôhô mimi inya, ku er sha ishima i ku; ikôr lagh ku kpaa.

¹³Nahan m ungwa icighanor lu ôron kwagh; man icighanor ugen gema kaa a u a lu ôron kwagh la er: Mpase u sha mnenge ne una lu ica ia gba nan je, sha kwagh u nagh ku nanden ku gbem la man mper u tindi u nan mtim sha u nan icighanjiir man ikum i Sha u shoghol angahar sha mi laa?

¹⁴A kaa a mo er: Ka zan zan mbaaikighe man upepe dubu uhar man deri utar, man á sôr icighanjiir ye.

¹⁵Tsô zum u mo Daniel, m nenge mpase u sha mnenge la yô, m ker u kaven inja na; yô, nenge, kwagh tile sha ishigh yagh, lu er ka or nahan.

¹⁶M ungwa imo i or hen atô u ifi u Ulai, i kaa er: Gaberiel, na or ne a̱ kav mpase u sha mnenge ne.

¹⁷Nahan a va hen ape m tile; er a va yô, cier mo iyol, m gure m kuma ityough inya; kpa a kaa a mo er: Kav, wan u or, gadia mpase u sha mnenge ne ka kwagh u sha shighe u mkur.

¹⁸Er a lu ôron kwagh a mo nahan yô, m gba mnyam mem mem, m cir ishigh inya; kpa a kpoghol mo, a mough a mo sha;

¹⁹a kaa er: Nenge, me na u u̱ fa kwagh u una er sha mkur u iyugh la; gadia kwagh ne tese sha shighe u mkur u i ver la.

²⁰Nomiyôngo u u nenge un akor ahar la, ka utor mba Media man Pershia je la.

²¹Man kpev u gban ilyev la ka tor u Grika je la; zegekor u a lu sha kungwa na la ka tor u hiihii la.

²²Man er ku tende, man anyiin a gem a mende sha ityough ki ku la, ka ityartor inyiin ia mough ken ikurior la, kpa ia kera lu a agee na ga.

²³Sha mkur u tartor ve la, zum u mbaaferev vea iv ikaren ve yô, tor u vihin ishigh sha, u fan ayom una mough.

²⁴Tahav nav mbua vese, kpa á lu sha tahav nav iyol na ga; una tim kwagh kera je á cier iyol, ikôr ia lagh un; una tim mbaageev kera, kua uicighanmbaiorov kpaa.

²⁵Sha atseregh a na la una na ayom aa za hemen sha ikev na; una kende iyol na sha ken ishima na, man una bur a bur ior kpishi una tim ve kera, shi una hendan a Tor u utor kpaa; kpa á sombo un, á kera lu sha ave a or ga.

²⁶Mpase u sha mnenge u mbaaikighe man upepe u i er kwagh na la, ka mimi je; kpa we yô, cir mpase u sha mnenge ne, gadia ngu sha kwagh u ayange a ken hemen ca.

²⁷Tsô, mo Daniel m hume, m lu uange ayange kar; nahan m mough sha, m gba eren tor tom; kpiligh mo iyol, sha mpase u sha mnenge la, kpa ma or kav un ga.