Read tiv Hosea 4 Bible Online

Hosea 4 - tiv bible

Hosea 4

¹Ungwa nen imo i TER ne Mbaiserael; gadia TER ngu a ayôôso a mba ve tem ken tar ne, sha ci u jighjigh a lu ga, dooshima kpaa ga, shin u fan Aôndo ken tar ne kpaa ga yô.

²Ka u bumun, man u eren aie, man u wuan, man u iin, man u eren idya; mba hemben uya, je awambe a haan inya dondo sha awambe a haan.

³Ka nahan man tar u lu uren man mba ve tem ken u cii ve lu usen ye: inyamtoho kua inyon i purugh sha, een, ishu i shin zegemnger kpaa, á kar a i kera.

⁴Nahan yô, ma or nana̱ de zehe a or ga, shi nana̱ de yangen or kpaa ga; gadia ka we pristi m lu nan we ibo ye.

⁵Wea nôngo gbev atetan, man profeti kpaa una nôngo gbev a we imôngo tugh; Me tim ngôu kpaa.

⁶Ior Av ve saa ishe sha ci u mban u mfe; sha ci u u vende mfe yô, Mo kpaa Me venda u, ú kera lum pristi ga; er tindi u Aôndo wou a hungul we yô, Mo kpaa ônov ou vea hungul Mo.

⁷Er ve seer ngeen yô, kape ve seer di u eren Mo asorabo je la; nahan Me gema icivir ve ia hingir kunya.

⁸Ka sha asorabo a ior Av ve koson ayol a ve ye, man afer a ve la, ka kwagh u doon ve mimi.

⁹Er á er a ior nahan, kape pristi kpaa á er a nan la; Me tsaha un sha ci u igbenda na la man Me na un injar sha aeren a na.

¹⁰Vea ya kwagh, kpa á kuma ve ga; vea er idya, kpa vea seer iyenge ga, sha ci u ve de u wan TER iko yô.

¹¹Idya man wain man zar u wain u he mba kar a kwaghfan kera.

¹²Ior Av mba keren mhen sha ikon ve, gbough vegh ku pasen ve kwagh; gadia jijingi u idya tsume a ve, ve yem ken idya, ve gbihi Aôndo ve.

¹³Mba ne nagh sha ityouv mbi iwoov, mba nanden kwaghhumandoon sha agungu, shin atine a ouki man upopler man uterebin sha ci u mure ve a doo yô; ka sha ci u nahan ônov enev mba kasev ve eren ijimba man kasev mba ônov enev kpaa ve eren idya ye.

¹⁴Me kera tsaha ônov enev mba kasev sha ijimba ve ga, man kasev mba ônov enev sha idya ve kpaa ga; gadia nomso ayol a ve kpaa mba zan hen udyambakasev ken iuv, man mba ne nagh a udyambakasev mba ken ayou a akombo la imôngo; ior mba ve lu a mkav ga yô, á tim ve kera.

¹⁵Shin er we Iserael u eren idya, nahan kpaa Yuda a̱ de hingir u lun a ibo ga; de kera ve nen hen Gilgal ga, man shi de kera ze nen sha Bete-aven ga, man de kera bumun kaan wer: Er TER A lu uma ne, kpaa ga.

¹⁶Gadia Iserael sôghor er ka tulebua u sôghor ityô yô; nahan TER Una shi á koso ve er gumiyôngo nahan hen ijiir i yan toho i i gbangese kpa?

¹⁷Eferaim var a akombo; de un tsô.

¹⁸Zum u ka vea ma msôrom kera yô, ve gba eren idya; mbatarev vev kpaa kunya doo ve ishima tsung.

¹⁹Ahumbe hure ve ken akper a a; vea va ahenge sha ci u iniav vev mbila.