Read tiv Hosea 7 Bible Online

Hosea 7 - tiv bible

Hosea 7

¹Zum u M ver ishima u wanger Iserael yô, nahan ifer i Eferaim gema due ken igbar kua aeren a bo a Samaria kpaa, gadia ve eren kwagh sha aie; ormbaiv ngu nyôron, man ikum i mbanumungbenda ngi numun ken won.

²Kpa ve kera fa ken asema a ve er Mo M lu umbur aeren a ve a bo la ga; hegen yô, aeren a ve kase ve wa ve atô, nga sha ishigh Yagh.

³Ve na tor iember sha aeren a ve a bo, kua mbatarev kpaa sha mbaaie vev.

⁴Ve cii ka udyambaiorov; mba er atse a kaan kwagh ker a a tseen her yô, shin er orkaankwagh nan de u kenden usu, zum u a hii u hôron mwem zan zan kwa ua kar zuan sha mi cii yô.

⁵Sha iyange i tor wase la mbatarev na ayol a ve angev sha m-oso u wain; a naregh uwegh nagh a mbanahantar imôngo.

⁶Gadia ve gema asema a ve hingir er atse a kaan kwagh sha mi nahan, sha ayom a ve la; shin er orkaan ve yav tugh cii kpaa, sev mbu aven yô, a yegh her er nomborusu nahan.

⁷Ve cii, ve tsee er atse nahan, mba hian mbaajiriv vev kera, utor vev cii gba; mô ve môm ngu yilan Mo ga.

⁸Eferaim nungwa a akuraior; Eferaim ka gbace u kaan u i gem un ga yô.

⁹Atôatyev vihi agee na kera, kpa a fa ga; een, ivu ta un agar sha ityou, kpa a fa ga.

¹⁰Ihagh i Iserael ngi nan un ibo ken igbar je, nahan kpaa ve hide hen TER Aôndo ve ga, ve kera ker Un kpaa ga.

¹¹Eferaim ngu er ibume atii u kaven kwagh ga yô; ka ve yila Igipiti, ve za hen Ashiria.

¹²Zum u vea yemen yô, Me hôn ve sha kper; Me sen a ve shin inya er ka inyon i sha, nahan; Me tsaha ve er i vande yôôn ken mkohol ve nahan.

¹³Kwagh á tser ve! Ve yevese ve undum! I̱ tim ve kera, gadia ve hendan a Mo; ma M paa ve, nahan kpaa ve wam aie iyol.

¹⁴Ve yilam sha ishima i môm ga, kpa mba ngoron sha ugambe vev; ve tôndo avav iyol ayol a ve sha ci u samuyia man wain u he; mba hendan a Mo.

¹⁵Shin er M tese ve man shi M taver ve akaseaveegh nahan kpaa, mba henen akaabo sha a Mo.

¹⁶Ve gema, kpa ve ver ishigh Sha ga; mba er ada u bo nahan; á wua mbatarev vev sha sanker sha ci u kwaghôron ve u dang sha zwa ve. Kwagh ne una hingir u nahan ve tar a mi ken Igipiti.