Read tiv Yona 1 Bible Online

Yona 1 - tiv bible

Yona 1

¹Kwaghôron u TER va hen Yona wan u Amitai kaa er:

²Mough sha, za hen Nineve, zegegar la, za ôr kwagh sha a na, gadia iferkwagh ve kôndo ar her a Mo.

³Kpa Yona mough sha u yevese ishigh ki TER yemen hen Tarshishi; a sen shin Yopa, a za zua a tso u zan Tarshishi; nahan a kimbi injar, a nyôr ker, sha u yemen a ve hen Tarshishi, lu yevese ishigh ki TER.

⁴Kpa TER tindi zegeahumbe sha zegemnger, nahan zegeuraahumbe ta sha zegemnger, zan zan tso gba nôngon u hemben.

⁵Tsô mbatsoov gba cian, hanmô ve gba yilan aôndo u nan; ve gba haan ikav mbi mbi lu ken tso la shin zegemnger, sha u vea heghem un yô. Kpa Yona vande nyôron shin atô u tso la je, za yav shimi gba mnyam mem mem.

⁶Nahan orvesen u tso la va hen na, kaa a na er: Ka nyi mnya u yav nahana? Mough sha, yila Aôndo wou, alaghga Aôndo la Una umbur se er sé kera tim ga yô.

⁷Tsô ve kaa ayol a ve er: Va sé er nen ishor sha u sé fa or u nan ne man kwagh u bo ne a tser se yô. Nahan ve er ishor, ishor kôr Yona.

⁸Tsô ve kaa a na er: Shi kaa se, ka an nan ne ican ne i tser se nahana? Ka nyi tom u erene, man ka han u dughu? Tar wou ka unô? Ka hanma ikurior u lu?

⁹A kaa a ve er: Mo m ngu Orheberu, man m ngu cian TER, Aôndo u Sha, u A gbe zegemnger man tar.

¹⁰Nahan cier ior mbala iyol kpishi, ve kaa a na er: Ka nyi u er nahana? Gadia ior mbala fa er a lu yevese ishigh ki TER yô, sha ci u a vande ôron ve.

¹¹Tsô ve pine un er: Sé er a we nana, sha er zegemnger una tile se ving? Gadia zegemnger lu kpianger zan a za hemen.

¹²A kaa a ve er: Tôôm, gbihim nen shin zegemnger, tsô zegemnger una tile ne ving; gadia m fa ka sha ci wam man zegeuraahumbe ne, a tser ne ye.

¹³Nahan kpaa ior mbala lu nahan sha gbashima sha u vea ar sha kpetar yô, kpa ve fatyô ga, gadia zegemnger lu kpianger a ve zan a za hemen.

¹⁴Nahan ve vaa a TER, ve kaa er: TERE, shi de timin se sha ci u uma u or ne ga, man de ne ike i awambe a orishôôgh i̱ kôr se ga; gadia TERE, We, U er kwagh u a doo U yô.

¹⁵Tsô ve tôô Yona ve gbihi shin zegemnger; zegemnger maa huan ving.

¹⁶Nahan ior mbala seer cian TER tsung; ve na TER nagh ku sôngon, ve tsegha zwa kpaa.

¹⁷Yô, TER vande veren zegeishu sha u a̱ mena Yona; nahan Yona tsa ken iyav mbu ishu ayange atar man aime di atar.