Read tiv Yona 4 Bible Online

Yona 4 - tiv bible

Yona 4

¹Kpa kwagh ne vihi Yona ishima tsung, je a yuwe.

²Tsô A sôn TER, a kaa er: TERE, ka kwagh u iyange m vande kaan, je er m lu ken tar wam la gaa? Ka nahan man iyange m gba yevese yemen Tarshishi ye; gadia m fa er U lu Aôndo u mhôônom ma ker U man u zungu mhôônom, U wan ishima, man U ngee a erdoo, man U deen ifer kpaa.

³Nahan yô, TERE, ma U shi ngohol uma wam her a mo kera tsô, gadia guda u me kpe a u m lu uma her.

⁴Nahan TER kaa er: Ishima vihi u sha inja je kpa?

⁵Tsô Yona due ken gar kera, a za tema gar vegher u sha ityoughkitaregh, a er antyumbe na her, a tema ken mure na sha u una nenge kwagh u una er gar la yô.

⁶Tsô TER Aôndo er ishilajôngo i mende i kar Yona sha, sha u i̱ va gba un mure sha ityou yô, sha u yiman un sha ishimavihin na la. Nahan doo Yona kpishi sha ci u ishilajôngo la.

⁷Kpa kper nan pepe dindee nahan, TER na ivungu, nyôr ya ishilajôngo la, maa use.

⁸Tsô zum u iyange due yô, Aôndo na ahumbe a tseen a sha ityoughkitaregh va; nahan iyange ta Yona sha ityou, zan zan a hume, a tôm er ma un kpe, a kaa er: Guda u me kpe a u me lu uma her.

⁹Tsô Aôndo gema kaa a Yona er: Ishima vihi u sha ci u kon u ishilajôngo, ka sha inja je kpa? Tsô a kaa er: Ishima vihim ka sha inja je, i vihim zan zan ar ken ku je.

¹⁰Tsô TER kaa er: We yô, sar u ka ishilajôngo i̱ war, i u er tom sha mi ga, u ne i mvese kpaa ga, i i mende tugh môm shi i saa ishe tugh môm la;

¹¹man Mo ma M kera war Nineve ga yee? Zegegar ne u ior ve iv kimi je, ve hembe dubu deri môm man dubu ikundu, mba ve fe mkposo u uwegh vegh ku yanegh a ku imesegh ga, man shi uzendenya mba keregh kpishi kpaa.