Read tiv Numeri 10 Bible Online

Numeri 10 - tiv bible

Numeri 10

¹TER ôr kwagh a Mose, kaa er:

²Er ukakaki uhar sha azurfa, var a var ve, ve̱ lu u kwagh u yilan ior a mi, man u yôôn sha er i̱ hembe hen afo i̱ yem hemen yô.

³Zum u á tôngo ve uhar yô, ior cii ve̱ kohol her a we hen hunda u tenti u kohol ker la.

⁴Aluer á tôngo môm tseegh yô, mbahemenev, ka uityombaiorov mba sha ikwe i Iserael je la, ve̱ va kohol her a we.

⁵Aluer nea tôngo puusu puusu yô, mba ve hee afo vegher u sha ityoughkitaregh la, ve̱ hembe ve̱ gba yemen je.

⁶Aluer nea tôngo puusu puusu sha kwa har yô, mba ve hee afo vegher u ken imbusutariyan la, ve̱ hembe; ve̱ tôngon puusu puusu zum a á kuma u hemben la.

⁷Kpa zum u á lu u kohol a kohol ior tseegh yô, tôngo nen, kpa de tenge nen puusu puusu ga.

⁸Upristi, ônov mba Aron ve̱ tôngon ukakaki mbala; i̱ hingir ne tindi u gbem sha ikov ikov.

⁹Zum u né mough hen tar wen u za nôngon ityav a mbaihomov enev mba ve eren ne ican yô, tôngo nen ukakaki puusu puusu, tsô á umbur ne sha ishigh ki TER, Aôndo wen, á yima ne sha ikev i mbaihomov enev.

¹⁰Sha ayange a en a ember kpaa, man sha ayange a uiniongo enev, man mdugh u iweregh kpaa, tôngon nen ukakaki sha iniav yenev mbi nanden kua iniav yenev mbi sôngon mbi bem kpaa, vea na á umbur ne sha ishigh ki Aôndo wen; ka Mo TER M lu Aôndo wen ye.

¹¹Tsô sha inyom i sha uhar, uwer u sha uhar, sha ayange a u ikundu la, ibeenegh kila mough sha tabernakel u shiada la sha.

¹²Mbaiserael hembe hen desereti u Senai gba haan afo yemen; ibeenegh za tile ken desereti u Paran.

¹³Ka mhii u ve hii hemben sha imo i TER, er A kaa Mose, Mose gema kaa ve nahan.

¹⁴Hiihii yô, tuta u afo a ônov mba Yuda hemen akum akum; orhemenegh u ikum na yô, lu Nakeson wan u Aminadabi.

¹⁵Orhemenegh u ikum i kwe u ônov mba Isakar yô, lu Netanel wan u Suar.

¹⁶Orhemenegh u ikum i kwe u ônov mba Sebulon yô, lu Eliabi wan u Helon.

¹⁷Tsô i sough tabernakel; ônov mba Gershon man ônov mba Merari mba ve tôôn tabernakel la, ve mough.

¹⁸Tuta u afo a Ruben mough akum akum, orhemenegh u ikum na yô, lu Elisur wan u Sedeur.

¹⁹Orhemenegh u ikum i kwe u ônov mba Shimeon yô, lu Selumiel wan u Surisadai.

²⁰Orhemenegh u ikum i kwe u ônov mba Gadi yô, lu Eliasav wan u Reuel.

²¹Tsô Mbakohati, mba ve tôôn uicighanmbaakaav la kpaa mough; i vande timin tabernakel kera man ve ve mase za nyôron ye.

²²Tuta u afo a ônov mba Eferaim mough akum akum; orhemenegh u sha ikum na yô, lu Elishama wan u Amihudi.

²³Orhemenegh u ikum i kwe u ônov mba Manase yô, lu Gamaliel wan u Pedasur.

²⁴Orhemenegh u ikum i kwe u ônov mba Benyamin yô, lu Abidan wan u Gideoni.

²⁵Tuta u afo a ônov mba Dan a mase jime cii la, mough akum akum; orhemenegh u ikum na lu Ahieser wan u Amisadai.

²⁶Orhemenegh u ikum i kwe u ônov mba Asher yô, lu Pagiel wan u Okeran.

²⁷Orhemenegh u ikum i kwe u ônov mba Nafetali yô, lu Ahira wan u Enan.

²⁸Kape mhembe u Mbaiserael luun sha akum akum la; nahan ve hembe ve gba yemen.

²⁹Tsô Mose kaa a Hobabi, wan u Reuel, Ormidian u a lu terkem u Mose la er: Se mba yemen hen ijiir i TER A kaa er: Me na ne i la; yô, mough a vese imôngo, sé er a we dedoo; gadia TER ôr kwagh u dedoo sha Iserael.

³⁰A kaa a na er: Me za ga, me hide ken tar wam hen anmgbianev av.

³¹A kaa a na er: De undun se ze he; gadia ka we ú faan er sé eren man sé haan afo ken desereti ye, ú hingir ashe ase.

³²Nahan aluer ú za a vese imôngo yô, mimi je, kwagh u dedoo u TER Una er se la, se kpaa sé er a we nahan.

³³Ve hembe hen uwo u TER, ve zende ayange atar, areki u ikuryan u TER hemen ve gbenda ayange atar je, lu keren ve ijiir i memen.

³⁴Ibeenegh ki TER luun ve sha atetan, zum u vea hembe hen afo vea gba yemen yô.

³⁵Zum u areki una mough una gba yemen yô, Mose a kaa er: Mough sha TERE, i̱ sambe mbaihomov Ou; mba ve ker U ihom ve̱ yevese ve̱ kar sha ishigh You kera.

³⁶Una za tilen yô, a kaa er: TERE, hide hen udubu pue mba udubu mba Iserael.