Read tiv Numeri 11 Bible Online

Numeri 11 - tiv bible

Numeri 11

¹Tsô ior gba vaan ican sha ato a TER; zum u TER ungwa nahan ishima nyoon Un, tsô usu u TER gba yeghen hen atô ve, hia kpeafogh.

²Nahan ior vaa a Mose; Mose gema sôn TER, usu maa pir.

³Maa i ii ijiir la iti er, Tabera, sha ci u usu u TER u hie hen atô ve yô.

⁴Tsô agbilinaior a a lu a ve ityô la, akor kôr ve, nahan Mbaiserael shi gba vaan, kaan er: Ka an nana shi na se inyam se̱ ya?

⁵Se umbur ishu i lu se yaan ken Igipiti gbilin kua furum man icegher man alabusa mba kiriki man mbatamen man tapania;

⁶kpa hegen yô, uma wase gema use a use; ma kwagh ngu heen ga; se mba gbe nengen di a mana ne tseegh tsô.

⁷Mana yô, lu er ishange i koliande nahan, mluashe na lu er iniôndo i balsem nahan.

⁸Ior ve due ve za kura un ve wua sha iniase, gayô, ve kume a kume shin mbaakpela, ve jiir shin itye, ve eren masa a mi; aluer ú bende un ken zwa yô, a lu u er ka masa u i kaa sha mkure yô.

⁹Zum u avure aa gba hen afo tugh yô, mana kpaa a haa a a imôngo.

¹⁰Tsô Mose ungwa ior lu vaan sha uipaven vev cii, hanma or her hunda u tenti u nan; ishima nyoon TER tsung; Mose kpaa doo un ga.

¹¹Mose gema kaa a TER er: Ka nyi U er wanakiriki wou ican nahana? Shi ka nyi i kera doo U a mo ga, U gem ior mban cii, zegeuikya ne nahan, U wem avee?

¹²Ka mo m wa iyav mbu ior mban yee? Ka mo m mar ve shinii, ve U kaan a mo Wer: Kôr ve sha ikum er yese ka a kôr wan u man atumba nahan, a ve hen tar u U bum Wer Ú na uter vev la yee?

¹³Me zua a inyam han man me na ior mban cii nahana? Gadia mba vaan a mo kaan er: Na se inyam, se̱ ya.

¹⁴Me fatyô u tôôn ior mban cii, mo tswen ga, gadia yuhwa hembam.

¹⁵Aluer kape U eren a mo nahan ne yô, ma U shi woom tsô; aluer a doo U a mo yô, m̱ de kera nengen ican yam ga.

¹⁶TER kaa a Mose er: Kohol Mo mbatamen mba Mbaiserael akunduatargber mba u fe ve ve lu mbatamen, shi i ver ve ve hemen ior kpaa yô, va a ve hen tenti u kohol ker la, ve̱ va tile a we her imôngo.

¹⁷Me sen, Me va ôr kwagh a we her; Me pande jijingi u a lu ken a we, Me ver sha a ve, ve̱ tôô ior mba ve lu zegeuikya ne, a we imôngo, sha er ú kera tôô, we tswen ga yô.

¹⁸Shi kaa a ior wer: Tsegha nen ayol a en, sha ci u kper nahan, né ya inyam, gadia ne vaa sha ato a TER ner: Ka an nana na se inyam se̱ ya? Gadia lu doo se ken Igipiti; nahan yô, TER Una na ne inyam né ya di je.

¹⁹Né ya iyange i môm shin ayange ahar shin ataan shin pue shin ikundu tsô ga;

²⁰kpa á lu uwer jimin zan zan ia due ne ishima, ia ndôhôr ne ishima kpaa, sha ci u ne vende TER u A lu hen atô wen, ne vaa sha ishigh Nagh ne kaa ner: Ka nyi yan se due ken Igipiti nahana?

²¹Mose kaa er: Ior mba m lu a ve, ka ior dubu deri ataratar je, mba zan angahar, man U kaa Wer: Ne na ve inyam ve̱ ya uwer môm jimin.

²²Á sôngo ve a sôngo akum a iyôngo man a ibua man aa kuma ve yee? Shin á kohol ve ishu i ken zegemnger cii man ia kuma ve yee?

²³TER kaa a Mose er: Nahan uwegh ku TER yina zee? Hegen ú nenge kwaghôron Wam, shin una kure u sha mi vough, shin una kure ga kpaa.

²⁴Tsô Mose due, ôr imo i Aôndo; a kohol mbatamen mba ve hemen ior akunduatargber, a ver ve, ve kase tenti la.

²⁵Tsô TER sen ken ibeenegh ôr kwagh a na; A pande Jijingi u a lu sha a na la, A ver sha mbatamen mba akunduatargber mbala, tsô zum u Jijingi va tema sha a ve la, ve ôr kwagh er uprofeti nahan, tsô ve de, ve kera shi kimbir ga.

²⁶Kpa ior uhar shi ken afo, u môm iti na er Eldadi, ugen iti na er Medadi, Jijingi sen tema sha a ve; ve kpaa i nger ve ati a mbala imôngo, kpa ve za hen tenti ga; nahan ve gba ôron kwagh hen afo er uprofeti nahan.

²⁷Tsô wanye ugen gber ayem za kaa Mose er: Nenge, Eldadi man Medadi mba ôron kwagh er uprofeti nahan.

²⁸Tsô Yosua wan u Num u a lu wanakiriki u Mose, iyev na je, gema kaa er: Terem Mose, yange ve.

²⁹Mose kaa a na er: U wa iyol sha mo tsôô! Ior mba TER ci ca cii ma ve lu uprofeti, TER ma A ver Jijingi Na sha a ve.

³⁰Tsô Mose nyôr ken afo, un kua mbatamen mba Iserael.

³¹Nahan ahumbe due sha TER, kura utakange vegher u shin zege mnger, va haa ve hen afo kuma er zende u iyange i môm vegher ken man zende u iyange i môm vegher ken kpaa, kase akôngoafogh tser; ve zurum a inya je er aseva ahar nahan.

³²Tsô ior mough sha iyange la, ve shi kôron utakange didi, tugh kpaa ve tsa mi kaka man kper nan kpaa ve shi mi nahan cii, or u nan kohol i yen sha mbagenev yô, nan kohol homer pue je; ve tsen ve han han kpaa, kase afo cii.

³³Er inyam lu ve sha anyi her, ve lu a tam cii ga je tsô, ishima nyoon TER a ior tsung, A wua ior sha bouange.

³⁴I ii ijiir la iti er Kiberoti-hataawa, sha ci u ka heregh man i ii ior mba akor a kôr ve yum la ye.

³⁵Ior hembe hen Kiberoti-hataawa la, ve yem hen Haseroti, ve haa hen Haseroti.