Read tiv Numeri 17 Bible Online

Numeri 17 - tiv bible

Numeri 17

¹TER ôr kwagh a Mose, kaa er:

²Ôr kwagh a Mbaiserael ngohol igbough her a ve, sha hanma kwe môm môm, hen hanma orhemenegh, sha ikwe ve, ka igbough pue kar ihiar je la; nger iti i hanma or sha gbough ku nan.

³Nger iti i Aron sha gbough ku Levi; gadia gbough môm ku̱ lu sha ci u orhemen u kwe ve.

⁴Ver i ken tenti u kohol ker la, sha ishigh ki Shiada, henpe M kohol a ven la.

⁵Tsô or u Me tsuwa nan yô, gbough ku nan kua hôm; Me er ahon a Mbaiserael a ve hon ne la, a̱ beem ato.

⁶Nahan Mose ôr kwagh a Mbaiserael, mbahemenev vev cii na un igbough, hanma orhemenegh na gbough môm sha ikwe ve cii, igbough pue kar ihiar; gbough ku Aron kpaa lu a igbough vev imôngo.

⁷Mose ver igbough mbila sha ishigh ki TER ken tenti u shiada.

⁸Tsô kper nan Mose za nyer ken tenti u shiada yô, gbough ku Aron ku hen nongo u Levi la mughul amuwe, kpar, ume mbaamondi mba vian.

⁹Nahan Mose due a igbough cii sha ishigh ki TER, a va a mbi hen Mbaiserael cii; ve nenge, hanma or tôô gbough ku nan.

¹⁰TER kaa a Mose er: Hide a gbough ku Aron ver sha ishigh ki Shiada, i̱ koso ku her, ku̱ lu ônov mba ihembeato ikav, sha u u̱ bee ahon a ve, a ve honom la, sha er vea kera kpe ga yô.

¹¹Kape Mose er la; er TER kaa un nahan, kape a er la.

¹²Tsô Mbaiserael ôr kwagh a Mose kaa er: Nenge, se mba kpen, se mba timin, se cii se mba timin.

¹³Hanma or u nan kporom a kporom hen tabernakel u TER tsô kpaa, nana kpe; nahan yô, se cii sea kpe.