Read tiv Numeri 18 Bible Online

Numeri 18 - tiv bible

Numeri 18

¹TER kaa a Aron er: We a ônov ou man ya u teru a we imôngo, né tôô ibo i sha icighanjiir la, man we a ônov ou kpaa né tôô ibo i sha tom wen u pristi kpaa.

²Anngôôv ou, kwe u teru, ve̱ kporom a we imôngo, ve̱ kohol we, ve̱ eren we tom; kpa we a ônov ou yô, lu nen sha ishigh ki tenti u shiada.

³Ve̱ eren we tom kua tom u tenti cii; saa mkporom tsô, ve̱ de kporom hen ikav mbi icighanjiir man hen atse a nanden nagh sha mi la ga ye, sha er vea kpe ga, ve man ne kpaa ga yô.

⁴Ve̱ kohol we, ve̱ eren tom u tenti u kohol ker la, hanma tom u tenti cii; or u ken inya nana̱ de mgbôghom a ve ga.

⁵Eren nen tom u icighanjiir kua tom u atse a nanden nagh sha mi kpaa, sha er i̱ de kera shi yuwen a Mbaiserael ga yô.

⁶Nenge, Mo M tsuwa anngôôv enev mba Levi ken Mbaiserael, ve̱ lu ne iwua i i ne ne yô, i gema ve i na TER sha u ve̱ eren tom u tenti u kohol ker la.

⁷Kpa we a ônov ou yô, eren nen tom u pristi u sha hanma kwagh u hen atse a nanden nagh sha mi man u ken atô u ikondo i yisan la; ka her né eren tom ye; M na ne tom u pristi gbilin; or u ken inya u nana kporom her yô, i̱ wua nan.

⁸TER kaa a Aron er: Nenge, ka Mo je, M ne u tom u nengen sha iniav mbi kenden sha la ye; uicighanmbaakaav mba Mbaiserael la cii, ka we M ne u ve a ônov ou, ka kwar wen gbem je la.

⁹Uicighanmbaakaav mba hemban cii mba i nanden sha usu ga yô, kwagh u una lu u wou sha mi yô, ka iniav vev cii, hanma nagh vegh ku sha samuyia man hanma nagh vegh ku isholibo man hanma nagh vegh ku iboogh ku vea nam la, kua hingir we kua ônov ou icighankwagh u hemban cii je.

¹⁰Yaan mbi er i ye icighankwagh u hemban cii nahan; hanma nomsoor nana̱ ya mbi; mbi̱ lu u icighankwagh.

¹¹Kwagh u shi una lu u wou yô, ka nagh ku kenden sha ku uiwua vev la, ka iniav mbi cian mbi Mbaiserael cii, M na u mbi, a ônov ou mba nomso man mba kasev, ka kwar wen gbem; hanma or u hen ya wou u nan lu wang yô, nana̱ ya mbi.

¹²Mkurem ma hemban doon cii, man wain u hemban doon cii, kua alakema kpaa; iyiav mbi tsutswav vev, mbi ve ne TER yô, M na u mbi.

¹³Hanma iyiav mbi tsutswav, mbi ken tar ve cii, mbi ve ve TER a mi, mbia hingir mbi you; hanma or u hen ya wou u nan lu wang yô, nana̱ ya mbi.

¹⁴Hanma kwagh u ken Iserael, u i tswer yô, á lu u wou.

¹⁵Hanma kwaghuma u a hii duen ken uya, u ve ne TER yô, shin á lu or, shin a lu zendenya kpaa, á lu u wou; kpa á lu waniunda u or yô, ú paa un kpee, man shi waniunda u uzendenya mba ve lu wang ga kpaa ú paa un.

¹⁶Ipaan i á paa un la yô, wan u a kom uwer môm la, ú paa un er u we ishe la, i̱ lu ushekel utaan, shekel u icighanjiir la, ka ugera ikundu je la.

¹⁷Kpa wanbua u iunda, shin waniyôngo u iunda, shin wanivo u iunda yô, de paan ve ga; ve ka uicighanmbaakaav je, haa awambe ve sha atse a nanden nagh sha mi, gema ahôm a ve nande TER nagh ku usugh ku human doon a mi.

¹⁸Inyam ve i̱ lu i you, er vanger u cian a mi kua namegh ku yanegh nahan, kape ia lu i you la.

¹⁹Iniav mbi kenden sha, mbi uicighanmbaakaav cii, mbi Mbaiserael ve ne TER yô, M na u mbi a ônov ou mba nomso man mba kasev a we imôngo, ka kwar wen gbem; we a tsombor wou, á lu ne ikuryan i bar gbem, sha ishigh ki TER.

²⁰TER kaa a Aron er: Ú zua a dyako ken tar ve ga, kwar kpaa ú zua a mi her a ve ga; Mo M ngu kwar wou man dyako wou ken Mbaiserael.

²¹Nenge, M na ônov mba Levi môm-ken-upue u ken Iserael la cii, i̱ hingir dyako ve, sha ci u tom ve u ve eren yô, ka tom u tenti u kohol ker la.

²²Nahan yô, Mbaiserael ve̱ de kera kporom hen tenti u kohol ker la ga, sha u ve̱ de kper ibo i isholibo, ve̱ kpeen ga yô.

²³Kpa Mbalevi ve̱ eren tom u tenti u kohol ker, man shi ka ve vea tôôn ibo ve ye; ka tindi u gbem sha ikov ikov; ken Mbaiserael yô, vea zua a ma dyako ga.

²⁴Gadia môm-ken-upue u Mbaiserael u ve ne TER nagh ku cian mi la, M na Mbalevi, hingir dyako ve; ka nahan man M kaa Mer, ken Mbaiserael yô, vea zua a ma dyako ga ye.

²⁵TER ôr kwagh a Mose, A kaa er:

²⁶Ôr kwagh a Mbalevi kaa a ve wer: Zum u né ngohol môm-ken-upue hen Mbaiserael, u M ne ne a hingir dyako wen la yô, pande, na nen TER nagh ku kenden sha mi, ka môm-ken-upue u umôm-ken-upue la je la.

²⁷Nagh enegh ku kenden sha kun, kua hingir ne er ka alakema u sha vande u gbiren iyiav yô, man shi er wain u a iv hen ihungwa i shoghol nahan.

²⁸Nahan môm-ken-upue wen cii, mba ne ngohol hen Mbaiserael la, ne kpaa, tsuwan nen nagh ku kenden sha, naan nen TER; gema nen nagh ku kenden sha, ku TER la, naan nen pristi Aron.

²⁹Iwua i i ne ne cii kpaa, tsuwan nen nagh ku kenden sha la cii, naan nen TER, i̱ lu kwagh u a hembe doon cii, shi a̱ lu icighankwagh ker kpaa yô.

³⁰Yô, kaa a ve wer: Zum u nea tsuwan kwagh u a hembe doon ker yô, una hingir Mbalevi er ka iyiav ki sha vande u gbiren iyiav man er wain u hen ihungwa i shoghol nahan.

³¹Gbaa yan nen un hanma ijiir tsô, ne a mba hen uya enev, gadia ka injar yen i sha tom wen u ken tenti u kohol ker la je la.

³²Aluer nea tsuwan kwagh u a hembe doon ker yô, né kera kpela ibo sha mi ga; de hôngor nen a uicighanmbaakaav mba Mbaiserael ga, sha er né kpe ga yô.