Read tiv Numeri 22 Bible Online

Numeri 22 - tiv bible

Numeri 22

¹Tsô Mbaiserael hembe, za haa afo hen ukpuunkpuun mba Moabi yande Yordan tiôn u hen Yeriko la.

²Yô, Balaki wan u Shipor nenge akaa a Mbaiserael er a Mbaamor la cii.

³Nahan Moabi cia ior mbala kpishi sha ci u ve ngee yum yô, ishima gba nyian Moabi a Mbaiserael.

⁴Tsô Moabi kaa a mbavesen mba Midian er: Hegen ikpelaior ne ia ya akaa a a kase se ne cii, er bua ka a kpur toho u ken akôngo nahan. Balaki wan u Shipor lu tor u Moabi hen shighe la.

⁵A tindi mbatyomov hen Balaam wan u Beor, hen Petor, u a lu hen kpe Ifi hen tar u ônov mba ior nav la er, i̱ yila un; a kaa er: Nenge, ior mbagenev za mough ken Igipiti, man nenge, ve va cir tar cii, ve va haa ikua ikua a mo je.

⁶Yô, ma u shi ve, ma u va wem ior mban ifan, gadia ve hembam agee; alaghga me zua a agee a me hemba ve, me zenda ve ken tar ne kera yô; gadia m fa, or u u ver nan doo doo yô, nana lu a iveren je, man u u we nan ifan kpaa, ifan ia kôr di nan je.

⁷Tsô mbavesen mba Moabi man mbavesen mba Midian, ve za a injar i ahir a ve, ve va hen Balaam ve va ôr un kwagh u Balaki la.

⁸A kaa a ve er: Tsa nen heen nyian, tsô me va ôr ne kwagh u TER Una ôrom yô; nahan atiator a Moabi tsa a Balaam.

⁹Tsô Aôndo va hen Balaam, va pine un er: Ka unô ior ve lu a we nee?

¹⁰Balaam gema kaa a Aôndo er: Balaki wan u Shipor, tor u Moabi tindim a loho er:

¹¹Nenge, ior mba ve dugh ken Igipiti la, ve va cir tar cii; yô, va ahegen, va wam ve ifan; alaghga me lu a agee a me nôngo ityav a ve, me zenda ve yô.

¹²Aôndo kaa a Balaam er: De ze a ve imôngo ga; man de we ior mbala ifan kpaa ga, gadia ka mba lun a iveren je.

¹³Tsô Balaam mough pepe kaa atiator a Balaki la er: Yem nen ken tar wen tsô, gadia TER rumun er m̱ za a ven ga.

¹⁴Nahan atiator a Moabi mough hide hen Balaki za kaa er: Balaam rumun u van a vese ga.

¹⁵Tsô Balaki shi tindi atiator agen, hemba a tsuaa la iyenge, shi hemba a icivir kpaa.

¹⁶Ve va hen Balaam, ve va kaa a na er: Balaki wan u Shipor kaa nahan er: De rumun ma kwagh a̱ yangen we u van her a mo ze he;

¹⁷gadia me na u icivir kpishi, hanma kwagh u u kaam cii me er; yô, shi va, va wam ase ior mban ifan.

¹⁸Balaam gema kaa a mbayev mba Balaki la er: Shin Balaki una nam ya na a azurfa man zenaria ker poo kpaa, me fatyô u karen imo i TER, Aôndo wam, shin sha kwagh u vesen, shin u kiriki kpaa ga.

¹⁹Nahan yô, ne kpaa, shi tsa nen heen nyian, sha er me fa kwagh u TER Una shi á ôrom yô.

²⁰Nahan Aôndo va hen Balaam tugh, va kaa a na er: Aluer ior mbala va u va yilan we yô, mough, yem a ve imôngo; kpa ka kwagh u Me kaa la tseegh, za er ye.

²¹Tsô Balaam mough pepe, kange jaki na shidi, yem a atiator a Moabi la imôngo.

²²Kpa ishima vihi Aôndo tsung er a lu zan je yô; Ortyom u TER za tile sha gbenda, sha u yangen un; a lu sha jaki na, mbayev nav uhar kpaa lu a na imôngo.

²³Tsô jaki nenge Ortyom u TER tile sha gbenda tsuwa sanker kôr sha uwe, nahan jaki kaha nyôr ken toho; Balaam gbidye jaki sha u una hire a i sha gbenda.

²⁴Tsô Ortyom u TER za tile hen gbenda u hoghol, hen atô u ishule i wain, i wa gar ken man ken kpaa.

²⁵Jaki nengen Ortyom u TER la yô, gba kômbon iyol ken kpekpe, i kighir Balaam nguhar ken kpekpe; nahan shi a gbidye i.

²⁶Ortyom u TER la kporom ken hemen, za tile he ijiir i hogholoo ape ian lu i á kaha ken iyan shin ken imese kpaa ga yô.

²⁷Jaki nengen a Ortyom u TER la yô, iyav inya a Balaam sha ijime; ishima nyoon Balaam, a gema gbough a gbidye jaki.

²⁸Tsô TER bugh jaki zwa, i kaa a Balaam er: M er u nyi, ve u gbidyem acin atar je?

²⁹Balaam kaa a jaki er: Ka sha er u heem yô; mea lu a sanker sha uwe yô, ma m woo u a wua je.

³⁰Jaki kaa a Balaam er: Ka mo jaki you i u ndera hendan ayange ou cii zan zan nyian ne gaa? M eren a we nahan mayange kpa? A kaa er: Ei.

³¹Tsô TER bugh Balaam ashe, a nenge Ortyom u TER tile sha gbenda tsuwa sanker kôr sha uwe; nahan a suwa ityough inya, a gure a kuma ishigh inya.

³²Tsô Ortyom u TER pine un er: Ka nyi u gbidi jaki you acin atar nahana? Nenge, Mo M va sha u yangen we, gadia gbenda ne kam u bo je;

³³jaki ne nenge a Mo, i kaha sha ishigh Yagh kuma acin a tar je; ia palegh Mo ga yô, mimi je, ma M woo u a wua je, ma M de i, ma i lu uma.

³⁴Tsô Balaam kaa a Ortyom u TER la er: M er isholibo, gadia m fa er We U til sha gbenda sha u hendan a mo ga; yô, ahegen, aluer a doo U ga yô, me hide ijime.

³⁵Ortyom u TER la kaa a Balaam er: Yem a ior mban; kpa ka kwagh u Me kaa u la tseegh, za er ye; tsô Balaam yem a atiator a Balaki la imôngo.

³⁶Zum u Balaki ungwa er Balaam a ve yô, a due a za kegh un gbenda hen gar u Moabi u a lu sha ikighir i Arnon ikighir i tar shon la je.

³⁷Balaki kaa a Balaam er: M tindi loho hen we tsung mer va ga? Man ka nyi u ve her a mo ga nahana? M kera fatyô u nan we icivir kpishi je gaa?

³⁸Balaam kaa a Balaki er: Nenge, m va her a we je ve, kpa kwaghôron yô, me fatyô u ôron ma kwagh jee? Kwagh u TER A ne ken zwa wam ka un je me ôr ye.

³⁹Tsô Balaam yem vea Balaki imôngo, ve va hen Kiriati-husoti.

⁴⁰Nahan Balaki na nagh sha ibua man iyôngo, a pande a tindi Balaam a mi kua atiator a a lu a na imôngo la.

⁴¹Tsô sev mbu aven yô, Balaki mough vea Balaam za a na sha ajiir a taven sha a Baal, pe a fatyô u nengen a kpeafogh u ior la yô.