Read tiv Numeri 25 Bible Online

Numeri 25 - tiv bible

Numeri 25

¹Zum u Iserael lu hen Shitim la, ior hii u eren idya a ônkasev mba Moabi;

²ve ve lôhô ior iniav mbi mbaaôndo vev. Nahan ior ve ya, shi ve gure ve civir mbaaôndo vev kpaa.

³Iserael zua vea Baal-Peor kangenaa; tsô ishima nyoon TER a Iserael tsung.

⁴TER kaa a Mose er: Kôr mbahemenev mba ior mbala cii, sende ve ken oo sha ci u TER, sha er ishima i nyoon i TER i tsung la i̱ hide ijime hen Iserael yô.

⁵Tsô Mose ka a mbaajiriv mba Iserael er: Hanma or nana̱ wua ior mba nan mba ve zough a Baal-Peor la

⁶Yô, orgen u ken Mbaiserael za va a kwase u Midian va nyôr a mi hen anmgbianev nav sha ashe a Mose je kua sha ashe a ior i Mbaiserael cii, er ve lu vaan hen hunda u tenti u kohol ker la je.

⁷Zum u Pinehashi, wan u Eleasar, wan u pristi Aron, nenge nahan yô, a mough hen atô u ior, a kôr iwange sha uwe,

⁸a cir or u Iserael la ijime zan zan a nyôr ken tenti, a za kuma ve uhar cii, a kuma or u Iserael la kar kôr kwase la, a pev un iyav. Nahan bouange la maa mem hen Mbaiserael.

⁹Mba ve kpe bouange la yô, lu ior dubu ikundu kar unyiin je.

¹⁰Tsô TER ôr kwagh a Mose, kaa er:

¹¹Pinehashi wan u Eleasar wan u pristi Aron a kar a ishima i nyoon Yam la hen ônov mba Iserael kera ve, sha er a we iyol sha kwagh Wam ken atô ve, nahan M kera tim ônov mba Iserael sha iyol i wan sha kwagh Wam la ga.

¹²Nahan yô, kaa wer: Nenge, M ya ikur Yam a na i bem,

¹³ia lu un a tsombor na u ken ijime na, ikuryan i sha tom u pristi gbem, sha er a we iyol sha kwagh u Aôndo na, man a ne iwom sha ci u Mbaiserael kpaa yô.

¹⁴Iti i Oriserael u i wua un a kwase u Midian la er, Shimeri wan u Salu, lu orhemen u hen ya u ter na ken nongo u Shimeon.

¹⁵Iti i kwase u Midian u i wua la er, Kosebi wan u Sur u a lu orhemen hen ya u ter na, ken Mbamidian la.

¹⁶Tsô TER ôr kwagh a Mose A kaa er:

¹⁷Ta num sha Mbamidian wua ve,

¹⁸gadia ve nôngo num a ven sha atseregh a ve er a ven sha kwagh u Peor man sha kwagh u Kosebi anngô ve u kwase, wan u ititor i Midian, u i wua un sha iyange i bouange u sha kwagh u Peor la.