Read tiv Numeri 3 Bible Online

Numeri 3 - tiv bible

Numeri 3

¹Ka icombor i Aron man Mose sha iyange i TER ôr kwagh a Mose sha uwo u Senai la ne:

²Ati a ônov mba Aron yô, ka a ne: Waniunda lu Nadabi, man Abihu man Eleasar kua Itamar.

³Ka ati a ônov mba Aron, upristi mba i shighe ve mkurem, mba i ver ve er ve̱ er tom u pristi je ne.

⁴Kpa Nadabi man Abihu yô, ve kpe sha ishigh ki TER zum u ve na nagh sha usu ugen kposo, sha ishigh ki TER, ken desereti u Senai la, ve mar ônov ga; nahan Eleasar man Itamar, ve gema ve er tom u pristi sha ishigh ki ter ve Aron.

⁵Tsô TER ôr kwagh a Mose, kaa er:

⁶Kporom a kwe u Levi, ver ve sha ishigh ki pristi Aron, ve̱ wasen un tom.

⁷Ve̱ waan iko sha tom na kua tom u mkohol u ior cii, sha ishigh ki tenti u kohol ker la, ve̱ eren tom u tabernakel la;

⁸ve̱ kuran ikav mbi tenti u kohol ker la cii, shi ve waan iko sha tom u Mbaiserael ve̱ eren tom u tabernakel la.

⁹Gema Mbalevi na Aron a ônov nav; i tsuwa ve ken Mbaiserael, i na a na un je.

¹⁰Ver Aron man ônov nav, ve̱ eren tom ve u pristi; or u ken inya nana kporom, her yô, i̱ wua nan.

¹¹TER shi ôr kwagh a Mose kaa er:

¹²Ka Mo je, M tsough Mbalevi ken Mbaiserael sha ityough ki mbaiundav mba ve hii duen ken uya, ken Mbaiserael la, Mer, Mbalevi ve̱ lu mba Av ye;

¹³gadia mbaiundav cii ka mba Av; sha iyange i M wua mbaiundav cii ken tar u Igipiti la, M tsegha mbaiundav mba ken Iserael cii sha ci Wam, mba iorov kua mba uzendenya kpaa; ka mba Av je; ka Mo TER.

¹⁴TER shi ôr kwagh a Mose ken desereti u Senai, A kaa er:

¹⁵Ôr iyenge i ônov mba Levi, sha uya mba uter vev, sha uipaven vev; hanma nomsoor, hii sha mba ve kom uwer môm man mba ve hembe nahan; ka ve, ôr ve ye.

¹⁶Tsô Mose ôr ve sha imo i TER, er i kaa un nahan.

¹⁷Ônov mba Levi sha ati ati yô, ka: Gershon man Kohati kua Merari.

¹⁸Ati a ônov mba Gershon sha uipaven vev yô, ka: Libeni kua Shimei.

¹⁹Ônov mba Kohati sha uipaven vev yô, ka: Amram kua Isehar man Heberon kua Ushiel.

²⁰Ônov mba Merari sha uipaven vev yô, ka: Maheli man Mushi. Mban ka uipaven mba Levi sha uya mba uter vev je ne.

²¹Uipaven mba Gershon yô, ka ipaven u Mbalevi man ipaven u Mbashimei; ka uipaven mba Mbagershon je la.

²²Ior vev mba i ôr ve, sha iyenge i nomsombaiorov cii, hii sha mba ve kom uwer môm man mba ve hembe nahan, ior vev mba i ôr ve yô, lu ior dubu utaankaruhar man deri utaan.

²³Uipaven mba Mbagershon yô, ve̱ haan afo ken ijime i tabernakel vegher u shin ityôtar la.

²⁴Orhemenegh u hen ya u ter, u Mbagershon yô, lu Eliasav wan u Lael.

²⁵Tom u i ver Mbagershon ken tenti u kohol ker la yô, lu u nengen sha tabernakel man tenti a kwagh u cirin sha mi, man kwagh u yisan hunda u tenti u kohol ker la a mi,

²⁶man akondo a kasen tembe a mi, man kwagh yisan hunda u tembe a mi u u we tabernakel man atse a nanden nagh sha mi atô la, man ikor na, akaa a sha tom na cii.

²⁷Uipaven mba Kohati yô, ka ipaven u Mbaamram man ipaven u Mbaisehar man ipaven u Mbaheberon man ipaven u Mbaushiel, ka uipaven mba Mbakohati je la.

²⁸Sha iyenge i nomsombaiorov cii, hii sha mba ve kom uwer môm man mba ve hembe nahan, lu ior dubu anigheni man deri ataratar; tom ve lu u nengen sha icighanjiir.

²⁹Uipaven mba ônov mba Kohati ve̱ haan afo hen kpe tabernakel vegher u ken imbusutariyan la.

³⁰Orhemenegh u hen ya u ter, u uipaven mba Mbakohati yô, lu Elisafan wan u Ushiel.

³¹Tom ve yô, lu u nengen sha areki man tebul man daarimenger man atse a nanden nagh sha mi, man ikav mbi icighanjiir mbi ve eren tom sha mbi, man ikondo i yisan man tom u sha mi la cii.

³²Orvesen u mbahemenev mba Mbalevi lu Eleasar wan u pristi Aron, a lu nengen sha mba ve eren tom u icighanjiir la.

³³Uipaven mba Merari yô, ka ipaven u Mbamaheli man ipaven u Mbamushi, ka uipaven mba Mbamerari je la.

³⁴Ior vev mba i ôr ve, sha iyenge i nomsombaiorov cii, hii sha mba ve kom uwer môm man mba ve hembe nahan, lu ior dubu ataratar man deri uhar.

³⁵Orhemenegh u hen ya u ter, u uipaven mba Merari yô, lu Suriel wan u Abihail; ve̱ haan afo hen kpe tabernakel vegher u ken imbusutarimese la.

³⁶Tom u i ver ônov mba Merari sha mi yô, lu u nengen sha mtôm ma ipeem ma tabernakel man itiran na man mtôm nam man agbur a ma a ikav nav cii, kua tom na cii;

³⁷man mtôm ma tembe ma ma ningir ma tser la, man agbur a ma man amande a ma kua ikor i ma.

³⁸Mba ve̱ haan afo sha ishigh ki tabernakel vegher u sha ityoughkitaregh, sha ishigh ki tenti u kohol ker la, sha vegher u iyange i dugh la yô, lu Mose man Aron a ônov nav, mba ve eren tom u ken icighanjiir la, ka tom u i eren Mbaiserael je la; or u ken inya u nana kporom her yô, i̱ wua nan.

³⁹Mbalevi mba i ôr iyenge ve cii, mba Mose vea Aron ve ôr iyenge ve sha imo i TER, sha uipaven vev yô, nomsombaiorov cii, hii sha mba ve kom uwer môm man mba ve hembe nahan, lu ior dubu ikundu kar uhar.

⁴⁰TER shi kaa a Mose er: Ôr iyenge i ônovmbaiundav mba nomso mba Iserael cii, hii sha mba ve kom uwer môm man mba ve hembe nahan, kohol iyenge i ati ve.

⁴¹Man shi ngohol Mbalevi sha ci Wam, ka Mo TER, sha ityough ki ônovmbaiundav mba Iserael cii, man uzendenya mba Mbalevi kpaa sha ityough ki ônovmbaiundav mba uzendenya mba Mbaiserael.

⁴²Tsô Mose ôr iyenge i ônovmbaiundav mba Mbaiserael cii er, TER kaa un nahan.

⁴³Ônovmbaiundav mba nomso cii, iyenge i ati ve yô, hii sha mba ve kom uwer môm man mba ve hembe nahan, mba i ôr iyenge ve yô, lu ior dubu ikundu kar uhar man deri uhar man akunduatargber kar utar.

⁴⁴TER shi ôr kwagh a Mose kaa er:

⁴⁵Ngohol Mbalevi sha ityough ki ônovmbaiundav mba Iserael man uzendenya mba Mbalevi kpaa sha ityough ki uzendenya vev; Mbalevi ve̱ lu mba Av; ka Mo TER.

⁴⁶Man sha u paan ônovmbaiundav mba Iserael deri uhar man akunduatargber kar utar mba ve hembe Mbalevi ken inya la yô,

⁴⁷ngohol ushekel utaan sha ityough ki hanmô ve; i̱ lu shekel u icighanjiir la, ngohol ye, shekel môm ka ugera ikundu;

⁴⁸inyaregh ki i paa iyenge i mba ve gande ken inya la a mi yô, gema ki, na Aron a ônov nav.

⁴⁹Tsô Mose ngohol inyaregh ki paan kila hen mba ve gande ken inya ve hembe mba i paa ve sha Mbalevi la.

⁵⁰A ngohol inyaregh hen ônovmbaiundav mba Iserael, ushekel dubu man deri utar man akunduatar kar utaan, lu shekel u icighanjiir la.

⁵¹Tsô Mose gema inyaregh ki paan kila na Aron man ônov nav, sha imo i TER, er TER kaa Mose nahan.