Read tiv Numeri 30 Bible Online

Numeri 30 - tiv bible

Numeri 30

¹Mose ôr kwagh a mbavesen mba sha ikwe i Mbaiserael, a kaa er: TER ngu kaan nahan er:

²Aluer or á tsegha zwa a TER shin nana bum er nana kighir ishima i nan inya yô, nana̱ de bundu kwaghôron u nan la ga, nana̱ er sha kwagh u a dugh ken zwa u nan la cii.

³Man aluer kwase tsegha zwa a TER, shin nana bum nana kighir ishima i nan inya, shighe u nan lu iyev hen ya u ter u nan la yô,

⁴man ter u nan una ungwa iceghzwa i nan man er nan kighir iyol i nan inya sha kwagh yô, ter u nan una bugh zwa a nan sha mi ga yô, uiceghzwa mba nan cii vea lu dông, hanma kwagh u nan kighir ishima i nan inya sha mi yô, una lu her dông.

⁵Kpa aluer ter u nan venda a nan sha iyange i a ongo la yô, ma iceghzwa i nan môm, shin ma kwagh u nan kighir iyol i nan inya sha mi kpaa, una kera lu dông ga; TER Una de nan, sha ci u ter u nan a vende a nan yô.

⁶Aluer nana er nom er uiceghzwa mba nan ve lu nan iyol her la yô, shin kwagh u nan er sha zwa gagh nan kighir ishima i nan inya sha mi kpaa,

⁷nom u nan la una bugh zwa a nan sha iyange i a ongo la ga yô, uiceghzwa mba nan vea lu her dông man ma kwagh u nan kighir ishima i nan inya sha mi kpaa una lu her dông.

⁸Kpa aluer nom u nan una venda a nan sha iyange i a ongo kwagh la yô, una bunde iceghzwa i i lu sha nan la, kua kwagh u nan er sha zwa u nan gagh nan kighir ishima i nan inya sha mi la kpaa; TER Una de nan.

⁹Kpa iceghzwa i kwasecôghol shin i kwase u nan dugh hen nom yô, hanma kwagh u nan kighir ishima i nan inya sha mi yô, una lu her dông.

¹⁰Man aluer nana tsegha zwa hen ya u nom u nan shin nana bum er nana kighir ishima i nan inya kpaa,

¹¹nom u nan una ungwa, kpa una bugh zwa a nan una venda a nan ga yô, uiceghzwa mba nan la cii, vea lu her dông; hanma kwagh u nan kighir ishima i nan inya sha mi kpaa, una lu her dông.

¹²Kpa aluer nom u nan una bunde akaa la iyange i a ongo a la yô, nahan akaa a a dugh ken zwa u nan sha uiceghzwa mba nan, shin sha akaa a nan kighir ishima i nan inya sha mi kpaa, aa kera lu her dông ga; nom u nan bunde a ve; TER Una de nan.

¹³Hanma iceghzwa shin hanma mbum u i kighir inya u eren yô, nom u nan una kôrcio u taver un, shin una kôrcio u bunden un kpaa.

¹⁴Kpa aluer nom u nan una bugh zwa a nan ga ayange ayange gbem yô, nahan a taver uiceghzwa mba nan cii kua akaa a nan kighir ishima i nan sha mi la kpaa, a taver a taver a je ve, sha er a bugh zwa a nan sha iyange i a ungwa a la ga yô.

¹⁵Kpa aluer una ungwa nahan man ken masejime una bunde a yô, una lu a ibo iyol.

¹⁶Ka akaawan a TER na Mose sha kwagh u nom a kwase u nan, kua ter a wan u nan u kwase, er nan lu hen ya u ter u nan her la.