Read tiv Numeri 34 Bible Online

Numeri 34 - tiv bible

Numeri 34

¹TER ôr kwagh a Mose, A kaa er:

²Kaa Mbaiserael wer: Zum u né va ken tar u Kanaan yô, ka tar u né ya dyako sha mi ne, tar u Kanaan pe u za kighir cii:

³Vegher wen u ken imbusutariyan una hii hen desereti u Zin una kar hen kpe u Edom; ikighir tar yen i ken imbusutariyan la, ia hii hen mkur u Zegemnger u Bar vegher u sha ityoughkitaregh;

⁴ikighir yen ia hurugh á kar igungu u Akrabim vegher u ken imbusutariyan la, ia yem ken Zin, ia kar á za kighir Kadeshi-barnea vegher u ken imbusutariyan la, shi ia yem hen Hasar-adar, ia kar á za ar hen Asemon;

⁵ikighir tar la ia hurugh sha Asemon ia yem hen uwagh u Igipiti á za kure hen Zegemnger.

⁶Ikighir tar yen vegher u shin ityôtar yô, ka Zegemnger u Tamen la, hen kpe na; ka ikighir tar yen i shin ityôtar je la.

⁷Ikighir tar yen i ken vegher u imbusutarimese yô: Ver nen ikighir i̱ hii hen Zegemnger u Tamen i̱ yem zan zan i̱ za ar hen uwo u Hor;

⁸hen uwo u Hor la kpaa shi ver nen ikighir i̱ yem zan zan i̱ za ar hen gbenda u karen zan Hamati la; ikighir la i̱ za kighir hen Sedadi;

⁹shi ikighir la i̱ yem zan zan i̱ za ar hen Seferon i̱ za kure hen Hasar-enan; ka ikighir tar yen i ken imbusutarimese je la.

¹⁰Ver nen ikighir yen i sha vegher u ityoughkitaregh la, i̱ hii hen Hasar-enan i̱ yem hen Sefan;

¹¹ikighir la i̱ sen hen Sefan i̱ yem hen Ribela, i̱ kar Ain vegher u sha ityoughkitaregh la; shi ikighir la i̱ sen i̱ tera hen kpe u Zegemnger u Kinereti vegher u sha ityoughkitaregh la;

¹²ikighir la i̱ kar i̱ yem hen Yordan, i̱ za kure hen Zegemnger u Bar. Ka tar wen je ne sha akighir a u ningir tser cii.

¹³Mose kaa a Mbaiserael er: Ka tar u né ya dyako sha mi sha ishor i eren je ne, u TER A kaa er i̱ na ikwe i itiankarinyiin man vegherkwe ne;

¹⁴gadia kwe u ônov mba Ruben sha uya mba uter vev, man kwe u ônov mba Gadi sha uya mba uter vev, kua vegherkwe u Manase kpaa, ve vande ngohol kwar ve kera ve;

¹⁵ikwe ihiar man vegherkwe la ngohol kwar ve yande Yordan, tiôn u hen Yeriko, vegher u sha ityoughkitaregh, sha pe iyange i dugh la.

¹⁶TER ôr kwagh a Mose, A kaa er:

¹⁷Ati a mba vea kar ne tar sha u u̱ hingir dyako wen yô, ka pristi Eleasar man Yosua wan u Num

¹⁸Shi tsuwa nen orhemenegh môm môm sha ikwe ikwe, ve̱ kar dyako u tar.

¹⁹Ati a ior mbala yô, ken kwe u Yuda, ka Kalebu wan u Yefune.

²⁰Ken kwe u ônov mba Shimeon, ka Semuel wan u Amihudi.

²¹Ken kwe u Benyamin, ka Elidadi wan u Kiselon.

²²Ken kwe u ônov mba Dan, ka orhemenegh Buki wan u Yogeli.

²³Ken ônov mba Yosev: Ken kwe u ônov mba Manase, ka orhemenegh Haniel wan u Efodi;

²⁴man ken kwe u ônov mba Eferaim, ka orhemenegh Kemuel wan u Shifetan.

²⁵Ken kwe u ônov mba Sebulon, ka orhemenegh Elisafan wan u Parnaki.

²⁶Ken kwe u ônov mba Isakar, ka orhemenegh Paltiel wan u Asan.

²⁷Ken kwe u ônov mba Asher, ka orhemenegh Ahihudi wan u Selomi.

²⁸Ken kwe u ônov mba Nafetali, ka orhemenegh Pedahel wan u Amihudi.

²⁹Ka mban TER kaa a ve er, ve̱ kar ônov mba Iserael dyako ken tar u Kanaan ye.