Read tiv Numeri 4 Bible Online

Numeri 4 - tiv bible

Numeri 4

²Ôr nen iyenge i ônov mba Kohati ken ônov mba Levi, sha uipaven vev, sha uya mba uter vev,

³hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber, mba ve nyôron tom la cii, sha u eren tom u tenti u kohol ker la.

⁴Tom u ônov mba Kohati ken tenti u kohol ker la yô, ka sha uicighanmbaakaav mba hemban cii.

⁵Á kuman u hemben hen afo yô, Aron a̱ nyôr a ônov nav imôngo, ve̱ sagh ikondo i yisan la, ve̱ cir areki u shiada a mi;

⁶shi ve̱ cir kwaghcirin a mi, u i er sha akôv a ayu yô, man ve̱ mase samber ikondo i lun kwel cii sha mi, shi ve̱ shindi igbough nagh kpaa.

⁷Ve samber ikondo i kwel sha tebul u ubredi mba sha ishi, ve̱ penda utasa man agbande man ugber man ayongo a haan kwagh a mi sha mi; ubredi mba lun her gbem la kpaa, ve̱ lu sha mi;

⁸ve̱ cir ikondo i nyian dindee sha mi, shi ve̱ cir ngila kwaghcirin mi, u i er sha akôv a ayu yô, ve̱ shindi igbough nagh.

⁹Ve̱ tôô ikondo i kwel ve̱ cir daarimenger u a lu sha ci u iwanger la kua amenger a na man akambe a na man utasa mba kuran il nav man ikav mbi mkurev nav cii, mbi i eren tom a mi sha mi yô;

¹⁰ve̱ gema un kua ikav nav cii ve̱ wa ken kwaghcirin a mi, u i er sha akôv a ayu yô, ve̱ penda sha kpande u tôôn kwagh a mi.

¹¹Ve̱ samber ikondo i kwel sha atse a zenaria a nanden nagh sha mi la, ve̱ cir kwaghcirin a mi, sha mi, u i er sha akôv a ayu, ve̱ shindi igbough nagh sha mi;

¹²ve̱ tôô ikav mbi tomov cii, mbi ve eren tom a min ken icighanjiir la, ve̱ wa ken ikondo i kwel, ve̱ cir kwaghcirin a mi, sha mi, u i er sha akôv a ayu yô, ve̱ penda sha kpande u tôôn kwagh a mi.

¹³Ve̱ kura mtwem sha atse a nanden nagh sha mi, ve̱ cir ikondo i nyian dindee sha mi;

¹⁴ve̱ gema ikav mbi á cii, mbi i eren tom a mi, ve̱ penda sha mi; ugbande mba tôôn usu a mi man iyôv mbi dughun inyam a mi man indyuhar kua utasa, ikav mbi atsegh cii; ve̱ samber kwaghcirin a mi, sha mi, u i er sha akôv a ayu yô, ve̱ shindi igbough i a.

¹⁵Zum u Aron a ônov nav vea cir icighanjiir man ikav mbi icighanjiir kera, shighe a kuma u hemben hen afo la yô, ken masejime la, ônov mba Kohati ve̱ va tôô, kpa ve̱ de benden uicighanmbaakaav ave ga, sha er vea kpe ga yô. Ka ikav mbi tenti u kohol ker, mbi ônov mba Kohati vea tôôn je ne.

¹⁶Tom u Eliasar wan u pristi Aron yô, ka u nengen sha mkurem ma imenger man kwaghhumandoon man nagh ku sha samuyia ku ayange ayange la, man mkurem ma shighen; tom u nengen sha tabernakel cii, man akaa ker cii, icighanjiir a ikav nav.

¹⁷TER ôr kwagh a Mose man Aron kaa er:

¹⁸De rumun nen ner i̱ tim kwe u uipaven mba Mbakohati ken Mbalevi kera ga;

¹⁹kpa er nen a ve nahan, sha er vea lu uma, vea kpe ga yô, zum u vea kporom hen uicighanmbaakaav yô, Aron a ônov nav ve̱ nyôr ve̱ ver hanma or sha tom u nan man ikav mbi nan;

²⁰kpa ve̱ de nyer sha u gbirin ashe sha uicighanmbaakaav côhin kpaa ga, er vea kpe ga yô.

²¹TER ôr kwagh a Mose kaa er:

²²Ôr iyenge i ônov mba Gershon cii, sha uya mba uter vev, sha uipaven vev,

²³hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber yô; ôr iyenge ve, mba vea nyôron tom la cii, sha u eren tom u tenti u kohol ker la.

²⁴Kwagh u uipaven mba Mbagershon vea eren sha kwagh u tom la man ikav mbi tôôn yô, ka un ne:

²⁵Ve̱ tôôn akondo a tabernakel man tenti u kohol ker la man kwagh u cirin un a mi, man kwaghcirin mi u i er sha akôv a ayu yô, u a masen sha la, man kwagh u yisan hunda u tenti u kohol ker la a mi;

²⁶man akondo a kasen tembe a mi man kwagh u yisan hunda u nyôron sha tembe la a mi u u kase tabernakel man atse a nanden nagh sha mi la, man ikor ve man ikav mbi tomov vev cii; akaa a eren sha mi cii, ve̱ eren a.

²⁷Ka sha imo i Aron a ônov nav, ônov mba Gershon vea eren tom ve cii ye, ikav vev mbi tôôn kua tom ve u eren cii; ka ne né tesen ve ikav vev cii mbi vea tôôn ye.

²⁸Ka tom u uipaven mba ônov mba Mbagershon sha tenti u kohol ker la je ne; ka Itamar wan u pristi Aron una nengen sha tom ve ye.

²⁹Ônov mba Merari yô, ôr iyenge ve sha uipaven vev, sha uya mba uter vev,

³⁰hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber yô; ôr iyenge ve, mba vea nyôron tom la cii, sha u eren tom u tenti u kohol ker la.

³¹Ikav mbi vea tôôn, sha kwagh u tom ve u ken tenti u kohol ker la cii yô, ka mtôm ma ipeem ma tabernakel man itiran na man mtôm nam man agbur a ma;

³²man mtôm ma ma kasen tembe la, man agbur a ma, man amande a ma kua ikor i ma a ikav mbi tomov cii, man akaa a eren sha mi cii; tesen nen ve ikav mbi tomov sha ati ati, mbi vea tôôn yô.

³³Ka tom u uipaven mba ônov mba Merari je ne, ityom ve cii sha tenti u kohol ker la; lu Itamar wan u pristi Aron nengen sha ve ye.

³⁴Tsô Mose man Aron kua mbahemenev mba mkohol u ior, ve ôr iyenge i ônov mba Kohati sha uipaven vev, sha uya mba uter vev,

³⁵hii sha mba ve kom anyom ikundugber man mba ve hembe nahan, za kighir hen mba ve kom anyom akunduahargber yô, mba vea nyôron tom la cii, sha u eren tom u tenti u kohol ker la;

³⁶mba i ôr iyenge ve, sha uipaven vev yô, lu ior dubu uhar man deri utaankaruhar man akunduahargber.

³⁷Mban ka uipaven mba Kohati, mba i ôr iyenge ve, mba ve eren tom u tenti u kohol ker la cii, mba Mose man Aron ôr iyenge ve sha imo i TER, sha ikev i Mose je la.

³⁸Ônov mba Gershon mba i ôr iyenge ve sha uipaven vev sha uya mba uter vev,

³⁹hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber yô, mba vea nyôron tom la cii, sha u eren tom u tenti u kohol ker la yô,

⁴⁰mba i ôr iyenge ve sha uipaven vev, sha uya mba uter vev yô, lu ior dubu uhar man deri ataratar man ikundugber.

⁴¹Mban ka uipaven mba ônov mba Gershon, mba i ôr iyenge ve, mba vea eren tom u tenti u kohol ker la cii, mba Mose man Aron ôr iyenge ve sha imo i TER yô.

⁴²Uipaven mba ônov mba Merari mba i ôr iyenge ve sha uipaven vev sha uya mba uter vev,

⁴³hii sha mba ve kom anyom ikundu man mba ve hembe nahan, za kighir sha mba ve kom anyom akunduahargber, mba vea nyôron tom la cii, sha u eren tom u tenti u kohol ker la yô,

⁴⁴mba i ôr iyenge ve sha uipaven vev yô, lu ior dubu utar man deri uhar.

⁴⁵Mban ka uipaven mba ônov mba Merari mba i ôr iyenge ve, mba Mose vea Aron ôr iyenge ve sha imo i TER sha ikev i Mose je la.

⁴⁶Mbalevi mba i ôr iyenge ve cii, mba Mose vea Aron man mbahemenev mba Iserael ve ôr iyenge ve sha uipaven vev sha uya mba uter vev yô,

⁴⁷hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber yô, mba vea nyôron tom la cii, sha u eren tom man u tôôn ikav mbi tenti u kohol ker la yô,

⁴⁸mba i ôr iyenge ve yô, lu ior dubu anigheni man deri utaan man akunduanyiin.

⁴⁹Ka sha imo i TER i ôr iyenge ve sha ikev i Mose ye, hanma or sha tom u nan man sha ikav nav mbi tôôn; kape i ôr iyenge ve la, er TER kaa Mose nahan.