Read tiv Mika 5 Bible Online

Mika 5 - tiv bible

Mika 5

¹Hegen yô, kohol akum akum, we wankwase u akumautya; i kase se sha utya; vea gbidye ortaregh u Iserael gbough sha henge.

²Kpa we Betelehem-efarata, er u lu kpeghee ken ikwe i Yuda, nahan kpaa ka ken a we or una duem, u una lu Orkurantar ken Iserael ye, mdugh Na hii tsuaa je sha ayange a ngise ngise la.

³Nahan yô, Una na ve kera zan zan shighe u un u toghol mar la una mar; nahan asande a anmgbianev Nav a a shi her la aa hide a Mbaiserael imôngo.

⁴Tsô Una tile, Una koso ikumuile Na ken agee a TER, sha icivir i iti i TER, Aôndo Na; vea tema bem bem, gadia hegen Una hemba zan zan á za ar sha akighir a tar je.

⁵Una lu bem; zum u Ashiria una nyôr ken tar wase, man zum u una ndyaren ayou a ase a tor, nahan sea ver mbakuranilev utaankaruhar man mbatarev ken ior anigheni, sha u eren num a na.

⁶Vea kuran tar u Ashiria sha sanker kua tar u Nimrodi kpaa sha ajiir a nyôron ken u la; Una yima se sha ikev i Ashiria, zum u una va ken tar wase man una ndyar angahar ken tar wase la.

⁷Asande a Yakob a a shi her la, aa lu ken atô u akuraior kpishi er avure a a dugh hen TER nahan, man er aber a ura sha toho nahan, a a keghen or ga, shin á ngôôr her sha ci u ônov mba iorov kpaa ga yô.

⁸Asande a Yakob a a shi her la, aa lu ken akuraior, ken atô u ior kpishi, er begha a lu ken atô u inyamtoho nahan man er gumbegha ken atô u akum a iyôngo nahan, u zum u ka una nyôr ker yô, a ndyar, a tuse caver caver, man ma oryiman kpaa nan kera lu ga.

⁹Á kende a uwegh ough sha, sha mbaahendanev ou, á tim mbaihomov ou kera cii.

¹⁰Tsô sha ayange la, kape TER A kaa ne: Me tim anyinya a ou ken atô wou kera, man Me vihi akekeautya a ou kera;

¹¹shi Me tim agar a ken tar wou, man Me yôhôl ajiir a taver a ou cii;

¹²Me tim mbaasorov ken uwegh ough kera, ú kera lu a mbaahiriv ken a we ga;

¹³Me tim ieev you mbi gban man mtôm ma awenem ou ken atô wou kera, ú kera gure tomaveegh wou inya ga.

¹⁴Me wuhe Asherim wou ken atô wou kera; Me tim agar a ou.

¹⁵Me or iyev sha iyugh man ishima i vihin sha akuraior a a ongo kwagh ga yô.