Read tiv Nahum 1 Bible Online

Nahum 1 - tiv bible

Nahum 1

¹Ka mkaanem ma Aôndo sha Nineve. Ruamabera u mpase u sha mnenge u Nahum or u Elkoshi.

²TER Aôndo ka u iwuhegh je, man oron iyev; TER ka u oron iyev man A mgbough a iyugh; TER ka u oron iyev sha mbaahendanev Nav, man ishima vihin Un a mbaihomov Nav.

³TER we ishima, tahav Nav vese, kpa u tsahan yô, deen ga. Gbenda Na ngu ken ihiar man ken ijeverahumbe, abeen ka ihundu i shin angahar a Na.

⁴Ka A zôhô a zegemnger, A er un a̱ uma, A uma uifi cii; Bashan use kua Karmel, man imondon u sha Lebanon kpaa use.

⁵Iwo cii tenger sha ishigh Nagh, agungu nga soughon; i kende a tar sha sha ishigh Nagh, tar sha won cii kua mba ve tem sha u cii.

⁶Ka an nana fatyô u hendan ishigh a iyugh Na? Ka an nana fatyô u teman hen mtsee u ishimavihin Na? Iyugh Na ngi haan er ka usu yô, avande nga paven sha ishigh Nagh.

⁷TER doo je, ka ijiir i waren sha iyange i ican; man A fa mba ve suur sha a Na yô.

⁸Sha mngerem ma saren avenge Una tim ijiir na kera cii, man Una tôv mbaihomov Nav, Una haa ve ken ime.

⁹Ka nyi kwaghbo ne henen sha TERE? Una tim kera cii, ican ia va kwa har ga.

¹⁰Gadia shin er ve lu er adagher a usaa nahan, man ve heen ayol er ka sha kwaghman ve la kpaa, á nande ve kera er ayia a ombor nahan.

¹¹Orgen due ken a we, u nan hen kwaghbo sha TER yô, nan hen mbamhen mba dang.

¹²TER ngu kaan nahan er: Shin er ve mgbough a agee, man ve ngee nahan kpaa á tim ve kera, vea saa ishe. Shin er M vande eren we ican nahan, Me kera kimbir eren we ican ga.

¹³Hegen yô, Me kever igbur na sha mon wou kera, man Me tôndo ikangenev you kera.

¹⁴TER wa tindi sha kwagh wou er iti you ia kera seer u zan hemen sha won ga; ken iyou i mbaaôndo ou la Me tim ieev mbi gban man mbi haan la kera; Me tim uwar wou, gadia u kera gba kwagh ga.

¹⁵Nenge sha iwo, angahar a or u van a loho u dedoo, or u yôôn bem! Er uiniongo ou, we Yuda, kure uiceghzwa ou, gadia orifer la una kera kar ker atô wou ga; i tim un kera puru.