Read tiv Sefania 1 Bible Online

Sefania 1 - tiv bible

Sefania 1

¹Kwaghôron u TER u a va hen Sefania wan u Kushi, wan u Gedalia, wan u Amaria, wan u Hesekia, sha ayange a Yoshia wan u Amon, tor u Yuda.

²Me kar a akaa ci ca cii sha tar kera, kape TER A kaa la.

³Me kar a or kua zendenya kera; Me kar a inyon i sha kera, man ishu i shin zegemnger, kua atôakaa a nan gbev mbu nôngon, a mbaaferev imôngo; shi Me tim or sha tar kera, kape TER A kaa la.

⁴Me naregh uwegh Agh sha Yuda, man sha mba ve tem ken Yerusalem cii; man Me tim asande a Baal a a shi her la, hen ijiir ne kera, man iti i mba ve civir akombo la, a upristi imôngo,

⁵man mba ve gur ve civir akum a Sha sha ityor i iyoughough, man mba ve civir, ve bumun TER shi ve gem ve bumun Malkam kpaa,

⁶man mba ve hir ijime sha u dondon TER, mba ve keren TER ga, shin ve pin Un kwagh kpaa ga la.

⁷Huan ving sha ishigh ki Ter AÔNDO! gadia iyange i TER mgbôghom; gadia TER sôr nagh ku sôngon, A tsegha mbavannya Nav.

⁸Tsô sha iyange i nagh ku sôngon ku TER la, Me tsaha mbatarev kua ônov mba tor, man mba ve hee akondo a akuraior agen la cii.

⁹Man sha iyange la, Me tsaha mba ve tsugh ve aver igburhunda, mba ve ivin ya u ter ve a ipila man icugh la.

¹⁰Sha iyange la, kape TER A kaa la, shishavaa una due hen Hundagar u Ishu, man mliam hen veghergar u he la, man ihuran i vesen ia kaa sha agungu.

¹¹Vaa nen, ne mba ne tem ken Maketeshi, gadia ior mba teen kasua cii saa ishe; mba ve karen myohom ma azurfa cii i tim ve kera.

¹²Tsô hen shighe la Me ker Yerusalem a amenger; man Me tsaha ior mba ve tse a akase a ve her la, mba ve kaan ken asema ve er: TER Una er kwagh u dedoo ga, shin u bo kpaa ga, la.

¹³Akaa a ve aa hingir ishar, man ayou a ve kpaa á yôhôl a kera; shin vea maa ayou kpaa, vea tema ken a ga; shin vea môôr ikon i wain kpaa, vea ma zar u i ga.

¹⁴Iyange i vesen i TER mgbôghom, ngi van fefa je; ungwa ihuran i iyange i TER! Orageegh ngu vaan tsung heregh.

¹⁵Iyange la ka iyange i iyughugh, ka iyange i ican man i ishima, nyian, ka iyange i mvihi man i myôhôr, ka iyange i ime i wan mgbigh mgbigh, ka iyange i abeen man i angôghime,

¹⁶iyange i tôngon ikor man i geren ityav sha agarautya a taver man sha ayouautya a taver.

¹⁷Me va a ican sha ior vea zenden er mbaapirashe nahan, sha ci u ve er TER kwaghbo yô; á haa awambe a ve inya er ka vuulevu nahan man myam vem kpaa er ka akôngo yô.

¹⁸Azurfa ve shin zenaria ve, vea fatyô u yiman ve sha iyange i iyugh i TER ga; kpa sha usu u iwuhe Na la, tar cii ua hia kera; gadia Una va a mtim, ka mkur u cieryol je, sha mba ve tem ken tar cii.