Read tiv Sefania 3 Bible Online

Sefania 3 - tiv bible

Sefania 3

¹Kwagh á tser gar u ahendanegh man u hôngorough man u kighir ior!

²Ongo kwagh ga, rumun mkôôm ga, suur sha TER ga, man kporom ikua ikua a Aôndo na kpaa ga.

³Mbatarev mba ker atô na ka ubegha mba tan kume; mbaajiriv nav ka ugbaseela mba aikighe mba ve shin ma kwagh her sha ci u pepe ga yô.

⁴Uprofeti nav kôrough ga, ka mba lun a mimi ga; upristi nav mba hôngor a icighankwagh, ve per atindi sha apera.

⁵TER ka u perapera je ken na, eren iferkwagh ga; hanma sev pasen mimi na ken igbar, ka bundu Un ga; kpa ormimi ga yô, nan fa kunya ga.

⁶M tim akuraior kera, ayouautya a ve a taven hingir alôgh; M vihi igbendagar ve, ma or kera kar sha mi ga; i tim agar a ve, ma or u teman ker shi ga.

⁷M kaa Mer: Ma u shi ciem, ma u rumun mkôôm, sha er i̱ de kera timin ijiir na i teman, er M we ishima sha a na nahan ga; nahan kpaa ve mough fese ve vihi aeren a ve cii.

⁸Nahan yô, keghem nen, kape TER A kaa la, zan zan sha iyange i Me mough sha u yan ishar la; gadia awashima Wam yô, ka u kohol akuraior, sha u Me kohol ityartor ijiir i môm, sha u Me haa iyugh Yam sha a ve, ka ishimavihin Yam cii je la; gadia sha usu u iwuhe Yam la, tar cii ua hia kera.

⁹Gadia hen shighe la Me gema zwa u ior ua hingir zwa u wang, sha u ve cii ve̱ yila sha iti i TER, man ve̱ er Un tom sha ishima i môm yô.

¹⁰Yande u uifi mba Etiopia la je, mbacivir Mo, ior Av mba i sambe ve la, vea vam a nagh.

¹¹Sha iyange la ú kera va ahenge sha ci u aeren a ou, a u erem kwaghbo sha mi la ga; gadia hen shighe la Me kar a mbagengeseyol ken a we kera cii, man mayange ú kera seer tesen imanger you sha icighanwo Wam ga.

¹²Kpa Me undu atereghaior man atsanaior ken atô wou, vea suur sha iti i TER.

¹³Asande a Iserael a a shi her aa kera er ifer ga, man shi aa kera er aie kpaa ga; á kera zua a ma nombor u icughugh ken zwa ve kpaa ga; gadia vea ya kwagh, vea yav inya, ma or u tan ve mciem nana kera lu ga.

¹⁴Wa icam, we wankwase u Shion; genger imo, we Iserael; ember man lu saan saan a ishima i môm, we wankwase u Yerusalem.

¹⁵TER tôô ajir a i ôr u la kera, A kar a orihom wou kera; Tor u Iserael, TER ngu ken atô wou; ú kera shi cia kwagh u bo ga.

¹⁶Sha iyange la á kaa a Yerusalem er: De kera cie ga, we Shion, ave ou a̱ de shirin livaa ga.

¹⁷TER, Aôndo wou, ngu ken atô wou, Orutaha u Una yima yô; Una ember we a iember, Una mem ken dooshima Na, Una ember we a icam i wan.

¹⁸Me kohol mba asema a vihi ve ve gbe ca a mkohol u iniongo la, ka mba ve lu ken a we je, mba iheen i kighir ve la.

¹⁹Nenge, hen shighe la Me ta sha mba ve eren we ican la cii; Me yima mbakeer, man Me kohol mba i zende ve kera la, Me gema ve vea hingir kwagh u wuese man u duen iti, ve mba kunya ve u lu sha won cii la.

²⁰Hen shighe la Me hide a ven, hen shighe u Me kohol ne la, gadia Me na ne̱ due a iti, man ne̱ lu a iwuese kpaa ken akuraior a sha won cii, zum u Me gema mlu wen sha ashe a en la, kape TER A kaa ne.