Read tiv Sekaria 9 Bible Online

Sekaria 9 - tiv bible

Sekaria 9

¹Mkaanem ma TER ôr sha tar u Haderaki, Damaseku una lu ijiir i memen i ma; gadia ashe a TER nga sha ior kua sha ikwe i Iserael cii;

²man sha Hamati kpaa u a lu sha ikighirtar na la; sha Tiru man Shidon kpaa, shin er ve lu a kwaghfan kpishi nahan kpaa.

³Tiru maa iyouutya i taver sha ci na, a ombo azurfa er vuulevu nahan, man zenaria kpaa er angbiôr a sha igbenda yô.

⁴Nenge, TER Una kura kwagh na kera, Una yôhôl kpekpegar na á haa shin zegemnger; man un iyol na á nande un sha usu.

⁵Asekelon una nenge a mi una cia; Gasa una gbidye akarkase iyol, Ekeron kpaa, gadia ishimaverenkeghen na saa dang, tor una saa ken Gasa kera; Asekelon una kera lu a ior mba teman ker ga.

⁶Ikurior i nungwa nungwa ia tema ken Ashedodi, man Me tim ihagh i Mbafiliti kera.

⁷Me kar a awambe a na ken zwa na kera kua akaa a ndôhôrshima a na kpaa ken ahigha a anyiigh a na la; un kpaa una shi asande her sha ci u Aôndo wase, man una hingir er orhemen u kwe nahan ken Yuda, man Ekeron una lu er Oryebushi nahan.

⁸Me wa ya wam afo a utya, Me tser, sha u kuran un sha akumautya a a zenden karen man hiden la; ma ipilaor nana̱ de kera shi karen ker ga, gadia hegen M nenge sha ashe Am.

⁹Ember tsung, we wankwase u Shion! Gbidye iwer we wankwase u Yerusalem; nenge, Tor wou ngu van her a we, Un ka u perapera je, man u hemban kpaa, u hiden a iyol Na ijime, A henda jaki, wan u mgbianjaki.

¹⁰Me tim akekeautya hen Eferaim kera, man anyinya a utya kpaa ken Yerusalem, man á kar a adautya kera kpaa; Una yôô bem hen akuraior cii, Una tema tor á hii hen zegemnger á za ar hen zegemnger man á hii hen Ifi la zan zan á za ar sha akighir a tar.

¹¹We kpaa, sha ci u awambe a ikuryan you la yô, M pase mbauikangenev ou mba ve lu shin ihungwa i lun a mngerem shimi ga la, M tuhwa.

¹²Hide yem nen hen iyou i utya i tiaver ne mbauikangenev mba ne lu a ishimaverenkeghen ne; nyian je, M pase Mer: Me ver u iveren ia kuma iveren kwa har je.

¹³Gadia M henda Yuda er ada Wam nahan, M wa Eferaim sha mi er ka ivaan nahan; Me tor ônov ou mba nomso ityô, we Shion, sha u hendan a ônov ou, we tar u Grika; Me gema u, ú hingir er sanker u ortaveryol nahan.

¹⁴Tsô á nenge a TER Una kar ve sha, ivaan Na kpaa ia due er inyiar nahan; man Ter AÔNDO Una tôngo korough, Una va ken hiar u ken imbusutariyan la.

¹⁵TER u akum a Sha Una kura ve, vea ya, vea ndyar angahar sha awen a ken mzu; vea ma, vea yôôso er ve ma wain nahan, á iv ve er ka gbande nahan, man er ka azongo a atse a nanden nagh sha mi nahan.

¹⁶Sha iyange la TER, Aôndo ve, Una yima ve er ka ikumuile i ior Nav nahan; gadia vea lu er awen a engem a sha idyer i tor yô, vea engem sha tar Na.

¹⁷Mdoom vem gba ikôr, mdooashe ve kpaa vese gande! Samuyia ua er mbayevikaior man wain u he kpaa una er mbayevkasev vea gume.