Read tiv Malaki 1 Bible Online

Malaki 1 - tiv bible

Malaki 1

¹Mkaanem ma TER ôr a Iserael sha ikev i Malaki

²Ne doom ishima, kape TER A kaa ne. Nahan kpaa ne mba pin ner: se doo U ishima hana? Isou ka anngô u Yakob gaa? Kape TER A kaa ne. Nahan kpaa Yakob doom ishima;

³kpa Isou yô, M kôr un ihom, M gema iwo na hingir ice, dyako na kpaa hingir kwagh u ugbaseela mba ken taaikôngo.

⁴Shin er Edom a kaan er: I hembe se, nahan kpaa sé hide, sé shi se maa ajiir a a hingir atse la, TER u akum a Sha gema ngu kaan nahan er: Vea maa, kpa Mo Me yôhôl; ior vea yilan ve er: Tar u ifer, man ior mba ishima i vihi TER a ve gbem sha won yô.

⁵Ashe a en aa nenge man nea kaa ner: TER vese je, A kar akighir a tar u Iserael ca je.

⁶Wan civir ter na, ortom kpaa civir orvesen na; aluer Mea lu ter yô, icivir Yam ngi hana? Man aluer Mea lu orvesen yô, mcia u i ciem ngu hana? Kape TER u akum a Sha A kaa a ven ne, upristi mba ne lahan iti Yam la; nahan kpaa ne kaa ner: Se laha iti You hana?

⁷Ne mba nan nagh sha kwaghyan u hôngorough sha atse Am a nanden nagh sha mi, nahan kpaa ne mba kaan ner: Ka sha nyi se hôngor a we? ka er ne kaan ner: Tebul u TER ka kwagh u injaa ga yô.

⁸Zum u ka nea naan nagh sha kwagh u pirin ashe la, ka kwaghbo gaa? Man zum u ka nea naan nagh sha iwankwagh, shin kwagh u a lu uange yô, ka kwaghbo gaa? Na ase ortaregh wou kwagh la, á doo un a we kpa? Una rumun we kpa? Kape TER u akum a Sha A kaa ne.

⁹Hegen yô, shi zamber nen Aôndo, A̱ zungwe se mhôônom; ka ne ne er akaa ne ye; nahan kpaa shi Una rumun mô wene? Kape TER u akum a Sha A kaa ne.

¹⁰Or ma nan lu ase ken a ven u nana wuhe ihinda sha u né de kera keer usu sha atse Am a nan nagh sha mi la gbilin ga yô! Doom a ven ga, kape TER u akum a Sha A kaa ne, Me ngohol nagh ku sha ave a en la ga.

¹¹Gadia hii sha mdugh u iyange je zan zan ar henpe i mir yô, iti Yam kume ken akuraior; sha hanma ijiir kpaa mba nanden iti Yam nagh ku humandoon kua nagh ku ku lu wang kpaa; gadia iti Yam kume ken akuraior, kape TER u akum a Sha A kaa ne.

¹²Kpa ne hôngor a i er ne kaan ner: Tebul u TER hôngor, man atam a na, ka kwaghyan na je la, ka kwagh u injaa ga.

¹³Shi ne kaa kpaa ner: Nenge er i lu kwagh u zan iyol yô! Shi ne ta un ahenga kpaa, kape TER u akum a Sha A kaa ne; shi ne va a kwagh u iin a ii man iwankwagh, man kwagh u a lu uange; ka nagh ku ne ne je la; nahan doo u Me ngohol ku sha ave a en kpa? Kape TER A kaa ne.

¹⁴Ifan i̱ kôr orcugh, u ka nan lu a nomile ken ikumuile i nan la, man nan tôndo zwa je, kpa nan gema nan na TER nagh sha kwagh u lun a ihogholough iyol; gadia Mo M ngu Zegetor, kape TER u akum a Sha A kaa ne, iti Yam kpaa cier iyol ken akuraior.