Read tiv Mateu 10 Bible Online

Mateu 10 - tiv bible

Mateu 10

¹Tsô A yila mbahenen Nav mba pue kar uhar mbala, man A na ve ujijingi mba hôngorouv er ve̱ dugh ve, man shi ve̱ bee hanma inja uange man hanma inja i mkpeyolga kpaa.

²Ati a mbaapostoli mba pue kar uhar mbala yô, ka a ne: u hiihii lu Shimon u i yilan er Peteru la, man anngô na Yohane;

³man Filibu kua Bartolomeu; man Toma man Mateu, orngoholkpandegh la, kua Yakobu, wan u Alefeu, man Tadeu;

⁴man Shimon, or u Kana, man Yuda u Isekarioti la.

⁵Mban ka mba pue kar uhar mba Yesu tindi ve, man A wa ve kwagh A kaa er: De kahan zaan nen sha gbenda u hen atôatyev ga, man shi de nyer nen ken ma gar u Mbasamaria kpaa ga.

⁶Kpa guda yô, za nen hen iyôngo i hen ya u Iserael i i saa la tsô.

⁷Za, za ôr nen kwaghaôndo, kaan nen ner: Tartor u Sha mgbôghom ve.

⁸Bee nen mba ve lu dedoo ga la angev; nder nen mbakpenev; wanger nen mbaamandev; dugh ujijingi mba bov. Ne ngohol gbilin, na nen di gbilin kpaa.

⁹De luun nen a zenaria shin azurfa shin togula ken akpa a inyar a en ga,

¹⁰shin akpa sha ci u zende kpaa ga, gadia or u eren tom kuma u á na nan kwaghyan u nan.

¹¹Man shi hanma gar shin angar u kiriki u nea nyôr yô, ker nen or u injaa keregh, tsa nen her zan zan né kar duen.

¹²Nea nyôr ken ya yô, sugh nen ya la.

¹³Aluer ya la una lu a inja yô, bem wen a̱ lu sha a na; man una lu a inja ga yô, bem wen a̱ hide sha a ven.

¹⁴Man aluer ma or nana rumun ne ga, man shi nana ungwa akaaôron a en kpaa ga yô, shighe u nea duen hen ya la shin hen gar la yô, kure nen ihundu i shin angahar a en.

¹⁵Mimi je, M kaan ne ne, sha iyange i ijirigh yô, guda Sodom man Gomora a gar la.

¹⁶Nenge, M ngu tindin ne er iyôngo ken atô u ugbaseela nahan; yô, lu nen mbafankwagh er iyô nahan man wang er mkungum nahan.

¹⁷Kura nen ayol a en sha ior; gadia vea kôr ne vea za na hen mbamkohol mba mbaajiriv, man vea gbidye ne ken ushinagoge vev kpaa;

¹⁸je yô, á va a ven sha ishigh ki ugomna man utor kpaa sha ci Wam, sha er i̱ hingir mpase her a ve man her atôatyev kpaa yô.

¹⁹Kpa shighe u vea za a ven nahan yô, asema a̱ de nyian ne sha kwagh u né kaa ga, gadia hen shighe la je á na ne kwagh u né ôr yô.

²⁰Gadia ka ne ne ôron kwagh ga, kpa ka Jijingi u Ter wen A ôron kwagh ken a ven ye.

²¹Anngô ugen una na anngô na ugen ken ku, ter ugen di kpaa una na wan na nahan; ônov vea hendan a mbamaren vev, vea na á wua ve.

²²Ior cii vea kôr ne ihom sha ci u iti Yam; kpa u nana taver ishima zan zan mkur yô, ka nan nana war ye.

²³Man er vea tôv ne a ican ken gar ngun yô, yevese, yem nen ken ugen; gadia mimi je M ngu kaan ne, er ne lu a zende sha agar a Iserael cii ga je tsô, Wan u or Una va.

²⁴Orhenen hembe ortesen na ga; wanakiriki kpaa hembe ter na ga.

²⁵Orhenen nana hingir er ortesen u nan nahan yô, kuma; man wanakiriki kpaa nana hingir er ter u nan nahan yô, kuma. Aluer i yila orya er, Belesebu yô, man hire mba ken ya naa?

²⁶Nahan yô, de cie nen ve ga, gadia ma kwagh ngu u i cir man á de pasen un ga, man kwagh ngu u i yer man á de fan kpaa ga.

²⁷Kwagh u M kaa ne ken ime, ôr nen ken igbar; man kwagh u ne ongo ken ato ivarivase yô, yôô nen di un sha ityoriyoughough.

²⁸Man de cie nen mba ve woo iyol tseegh, kpa ve fetyô u wuan uma ga la ze; guda cia nen Un u A fetyô u timin uma kua iyol cii ken gehena.

²⁹Mba teen mbaatsator uhar sha toro gaa? Nahan kpaa mô ve môm tsô kpaa una gba gban shin inya ga saa Ter wen Una fa.

³⁰Zan zan ice yen i sha ityou kpaa, i ôr i cii.

³¹Nahan yô, de cie nen ga; mbaatsator kpishi kpaa ne hemba ve.

³²Nahan hanma or u nana pasen Mo sha ishigh ki iorough yô, ka nan je Me pase nan sha ishigh ki Terem u A lu Sha kpaa ye.

³³Kpa hanma or u nana nyiman Mo sha ishigh ki iorough yô, ka di nan je Me nyiman nan sha ishigh ki Terem u A lu Sha kpaa ye.

³⁴De henen nen ner, M va sha u van a bem sha won ga; M va sha u van a bem ga, kpa ka ishôm.

³⁵Gadia M va sha u nan mpav her atô u or a ter u nan, man wankwase kpaa a ngô u nan, wankem di a ngôkem u nan.

³⁶Man mba ken ya u or vea gema vea lu mbaihomov mba nan je.

³⁷Or u ter u nan shin ngô u nan a hembe doon nan ishima a Mo yô, nan kumam ga; man shi or u wan u nan u nomso shin u kwase a hembe doon nan ishima a Mo yô, nan kumam ga;

³⁸man u nan tee terankon u nan, nan dondon sha a Mo ga yô, nan kumam ga.

³⁹U nan zough a uma u nan yô, una saa nan a saa; man or u uma u nan a saa sha ci Wam yô, nana zua a zua a mi.

⁴⁰U nan rumun ne yô, ka Mo, nan rumun ye; man u nan rumun Mo yô, nan ngu rumun Un u A tindim la.

⁴¹U nan rumun profeti sha ci u i lu profeti je yô, nana ngohol injar i profeti je; u nan rumun orperapera sha ci u i lu orperapera yô, nana ngohol injar i orperapera je.

⁴²Man hanma or u nana na u môm ken mbakiriki mban iyongo i mngerem ma ndôhôr tseegh, sha ci u i lu orhenen yô, mimi je M kaa ne, injar i nan ia bunde nan je ga.